Read Tobelo O YEHEZKIEL 29 Bible Online

O YEHEZKIEL 29 - Tobelo bible

O YEHEZKIEL 29

¹ Mawange ngimoi deʼ hinotoka o mede mangimoi, o taongo mangimoi magoronaka maöraha ngomi imi tabuanga, ma Jou wohitemo ngohino,

²”Hei o nyawa nokokakaliua, nihidaaere o Mesir manga koano. Nahetongo unangika ünanga deʼ o Mesir makawaha mata-mata aha yahukumu.”

³Ma Jou Duru woko Kurutil̄e wohihuloko ngohi tohiädono o Mesir manga koanoika o behehongo nënanga, ”Ngohi nënanga ani haturu, hei gohomanga mapako-pako imarubaiha o ngairi mahidö dogoronaka. Ngona nomahi ngaroko o Nil ma Ngairi ganga tongona madutu deʼ ngona madiai.

⁴Ngohi aha tohipake o lalakete ani okokika deʼ ima hitataulu hagala o nawoko ani unahika. Daha ngona Tonitauru tonihihupu o Nil ma Ngairi l̄e deʼ hagala o nawoko imahito tataulika ani unahika gënanga.

⁵Ipaha ngona deʼ hagala o nawoko gënanga Tini hikaweli o tonaka makokakahaika. Ani röehe aha imahi paka-paka o tonakika deʼ iluluika genangoka. Moiua o aha ini jere ngona. Ani röehe aha Tohidöaka hagala o totaleoika deʼ hagala o aiwani mahomoa mangale yaol̄omo.

⁶ Done o Mesir makawaha yongodumu ihi öriki Ngohila o Jou.” Ma Jou wotemo, ”Hei o Mesir manyawa! O Israel manyawa yonganono roriwo, mai nyata ngona duga-duga hokä o diki-diki mabole-bole dika.

⁷Maöraha önanga imahiake ngonaika, ngona notobiki deʼ yatohoko toönanga manga gugutil̄e, hiädono toönanga manga porete makobongo ihirikitoka.

⁸Hababu gënanga Ngohi, o Jou Duru toko Kurutil̄e, totemo aha ini parangi ngona deʼ o oworo, deʼ yätoma ani nyawa ikali ani gigini.

⁹O Mesir aha idadi matonaka kairïdika. Done nihi öriki ngini Ngohila o Jou.” Ma Jou wotemo, ”Hei o Mesir manga koano! Karana ngona notemo o Nil ma Ngairi ganga tongona madutu deʼ ngona nadiai,

¹⁰done Ngohi todadi ani haturu deʼ ani Nil mangairi ma haturu. O Mesir yamode-modekika aha Tohidadi matonaka kai rïdika mulaenge o Migdol makota okeremieuku de yail̄e hiädono o Aswan makotaika o koreharail̄e, hiädono o Sudan maribatingi.

¹¹Koiwa naga o nyawa ekola o aiwani aha yanonu. O taongo moruatino madekana aha koiwa naga o nyawa yögogere.

¹²Ngohi aha tadiai o Mesir kairïdika hiädono hagala o berera mahidogoronaka mahomoa irirïdi, o Mesir la duru kohamï rïdi. O taongo moruatino madekana hagala o kota o Mesiroka aha marupa kamagogilianga duru iholoi i tubuho ngaro deʼ o kota kiaka o dika magogilianga. O Mesir manyawa aha Tahidadi imahi dito-ditoko. Onanga aha yodogerewoto hagala o bereraika deʼ yogogere o hoana deʼ o berera mahomoa manga hidödogoronaka.”

¹³Ma Jou Duru woko Kurutil̄e wotemo, ”Hei o Mesir manyawa, o taongo moruata ipaha gënanga, ngini aha Tini aookali hagala o berera mangï ngini nimahi kokabarihoka deʼ niaino.

¹⁴Ngini aha Tini ïriki deʼ Tinihuloko nigogere o Mesiroka o koreharail̄e idaduoka, nia ahali matonaka. Dokengoka ngini aha nimahigoko o pareta mabole-bole,

¹⁵duru kohamobol̄e o dunia yamode-modekika. Ngohi aha tinidiai ngini duru kaniamobole hiädono ngini aha niakunua nia pareta o hoana deʼ o berera ma ago-agomo mahomoa ekola nima edenge nia diri onangika.

¹⁶O Israeloka aha yogahokokauaoli o roriwo nginika. Nia wowango hei o Mesir manyawa aha yohininga o Israeloka hokokia yahowono yangaku o Mesir, hokä mamoi iböto yadiai. Done nihi öriki Israel Ngohila o Jou Duru toko Kurutil̄e.”

¹⁷O wange madodihiraka o mede mahira o taongo monaoko deʼ tumidi magoronaka maöraha ngomi o tabuangoka, ma Jou wohitemo ngohino,

¹⁸”Hei o nyawa nokokakaliua, ma Koano Nebukadnezar o Babelino wakiria ai parangi o Tirusika. Unanga wähuloko hagala o tentara yamoku hagala manga momoku hoko gënanga madubuho, hiädono toönanga manga häeke idadi ipalala deʼ toönanga manga beleka ma ipurutu, mä yaoa makoano yaoa aitentara deʼ manga kangela gënanga o kia-kiaua yamake mahasili.

¹⁹Hababu gënanga, Ngohi o Jou Duru toko Kurutil̄e totemo: o Mesir matonaka aha Tihidöaka ma Koano Nebukadnezarika. Unanga aha wal̄ë waora ikali watoraka mata-mata o Mesir makaya hokä aitentara manga hewa.

²⁰O Mesir matonaka Tihidöaka unangika hokä ai oa-oa mabalahi, hababu aitentara yokarajangoka mangale Ngohi. Ngohi, o Jou Duru toko Kurutil̄e totemoka.

²¹Maöraha okia mahali gënanga idadi, Ngohi aha tahidadi o Israeloka manyawa yokuata deʼ yakunu ngona Yehezkiel, notemo-temo deʼ madadatoko koiwa hiädono mata-mata o nyawa yakunu inigihene ngona. Done ihi öriki önanga Ngohi o Jou.”