Read Tobelo O YEHEZKIEL 3 Bible Online

O YEHEZKIEL 3 - Tobelo bible

O YEHEZKIEL 3

¹ Ma Jou Madutu wotemo, ”Hei o nyawa nokokakaliua, naol̄omo o buku ilululuino nënanga, daha noiki deʼ natemo-temo hagala o Israel manyawaika.”

²Daha tahelenga ahi uru deʼ ma Jou Madutu wohihidöaka o buku ilüluluino gënanga ngohino hupaya taol̄omo.

³Wato, ”Hei o nyawa nokoakakaliua, naol̄omo! Nohi dol̄a ani mamata de o buku ilüluluino nënanga.” Daha taol̄omo o buku gënanga deʼ tamao mamutiti hokä o ohungu magula.

⁴Ma Jou Madutu wotemoli, ”Hei o nyawa nokokakaliua, noiki hagala o Israel manyawaika deʼ nohiadono hagala Ahi behehongo onangika.

⁵Onangika ngona Tonihuloko, deʼ ko ohoana deoberera manga demo ihuhuhaikaua, imahowono deʼ nomangaratiua. Hohiade ngona Toni huloko o hoana deo berera hokä hoko gënanga, done önanga aha ihi gihene ani demo-demo.

⁷Mä o Israel manyawa yoluku inihigihene ngona, ikali Ngohiö önanga ihilegaikaua. Onanga mata-mata manga häeke itogowini deʼ yoigo ihilawani.

⁸O öraha nënanga ngona aha Tonidiai ani häeke itogowini deʼ noputurungu hokä onangoli.

⁹Ngona aha Tonihidadi kaimatero mabitumu o nuha deʼ kaimatero madogowini o intan. Uha namodongo yolölawa-lawanika gënanga.”

¹⁰Gila-gila ma Jou Madutu wotemo, ”Hei o nyawa nokokakaliua, natailako nohidodiai deʼ nohohininga hagala aha Taheto-hetongo ngonaika.

¹¹Noiki ani hoanika naga o tabuanga magoronaka gënanga, deʼ nohiadono okia Ngohi, o Jou Duru tokokurutil̄e totemo onangika, boteka önanga yomau yoihene ekola kowali.”

¹²Daha ma Jou Madutu Ai Womaha ihi goraka ngohi deʼ ahi poretoka toihene o ilingi igiloanga itemo, ”Nihigiriri ma Jou Ai mulia o horogaka!”

¹³Toihene hagala o dodadi gënanga magahuhu mailingi ihi kokepeleke, deʼ mailingi maboriti o lululu-lulu gënanga makuatil̄e hokä o ohu mailingi.

¹⁴Ma Jou Ai kuaha ihi dotoboa ngohi de magiria, deʼ maöraha ngohi ihi goraka deʼ ihiao Ai Womaha, ahi hininga tamao mamali deʼ mahauku.

¹⁵Done ngohi tomahiadono o ngï yogögogere yototabuanga o Tel-Abiboka o Kebar ma Ngairi madatekoka. O wange tumidi madekana ngohi togogere genangoka; ngohi ihi todokana hagala okianaga daha toihene deʼ tamake gënanga.

¹⁶O wange tumidi ipaha, ma Jou wohitemo ngohino,

¹⁷”Hei o nyawa nokokakaliua, ngona Tonigoraka nodadi o Israeloka manyawa manga gogoana. Nohiadono onangika o hohininga Tohidö döa-döaka nënanga.

¹⁸Nako Ngohi tohingahu womatengo o nyawa madorou aha wohonenge, mä ngona nitaaerua ünanga hupaya ünanga wangali ai kalakuanga hiädono ünanga wohalamati, done ünanga aha wohonenge hokä womatengo o nyawa baradohaohi, deʼ watagongo ma bobaluhu mangale ai honenge aha todotagahoko ngonaino.

¹⁹Nako ngona nitaaere o nyawa madorou gënanga deʼ ünanga woluku womatogumu wodiai o dorou, ünanga aha wohonenge hokä o womatengo o nyawa baradoha, mä ngona mahirete aha nohalamati.

²⁰Nako womatengo o nyawa maoa mulaenge wodiai o baradoha, deʼ ünanga tihihimanga de o bahaya, done ünanga aha wohonenge nako ngona nitaaerua. Unanga aha wohonenge karana hagala ai baradoha, deʼ hagala ai manarama maoa-oa aha tohiningaokaua. Mä natagongo mabobaluhu mangale ai honenge gënanga aha todotagahoko ngonaino.

²¹Nako o nyawa maoa gënanga nitaaere hupaya uha wodiai o baradoha, deʼ ünanga wamoteke ani nasihati, done ünanga aha Tihukumua deʼ ngona aha nohalamati.”

²²Tamao Ai kuata ma Jou Ai boa deʼ toihene Unanga wohitemo ngohino, ”Nomomiki deʼ noiki o waiika. Dokengoka Ngohi aha toni temo-temo ngonaika.”

²³Done ngohi toiki o waiika, deʼ genangoka tamake o dararono mameletongo ihi dumutu ma Jou Ai boa hokä tamö make-makeoka o Kebar ma Ngairi madatekoka. Daha ngohi toruba tomotumuku o tonaka mal̄okuoka,

²⁴mä ma Jou Madutu Ai Womaha ihi ngohama deʼ ihioko. Ma Jou wohitemo ngohino, ”Nolio deʼ noma kurumika o tau magoronaka.

²⁵Hei o nyawa nokokakaliua, ngona aha iniliko de o gumini hiädono nakunua nohupu deʼ nakunua nimakamake de o nyawa.

²⁶Ngohi aha tadiai ani akiri itaulu hiädono ngona nakunua nahidaaere o hoana deo berera manyawa ima lawa-lawani gënanga.

²⁷Dama, nako Ngohi tonitemooli ngonaika deʼ Tohigilio ani sawaro mangale notemo-temo, ngona kiani nohiadono okia Ngohi, o Jou Duru tokokurutil̄e totemo onangika. Mahononga onangino aha ihigihene, mä mahonongali kowali, karana önanga igoungu o hoana deo berera yototalawani.”