Read Tobelo O YEHEZKIEL 30 Bible Online

O YEHEZKIEL 30 - Tobelo bible

O YEHEZKIEL 30

¹Ma Jou wotemooli wato,

²”Hei o nyawa nokokakaliua, nohidodemo deʼ nohiädono o Mesir manyawaika okia Ngohi o Jou Duru toko Kurutil̄e totemo onangika. Nopöaka deʼ nododora hoko nënanga: Adede! Ma Jou Ai wange itigioka! Unanga aha de majapati wodiai. O wange gënanga ihuhutu de malobi, maöraha o hoana deʼ o berera ma ago-agomo yatarima o hukumanga.

⁴O bodito ma ago-agomo aha yatapal̄u o Sudan. O Mesiroka aha naga o parangi. Yohö hone-honenge aha yokokitifa; o berera yamode-modekika yäora de ihidadi magilianga.

⁵O parangi gënanga magoronaka aha yätoma o hagala o tentara yähewa-hewa o Sudanino, o Libiaino, o Arabino, o Kub deʼ Ahi hoanino mahirete.”

⁶Ma Jou Duru woko Kurutil̄e wotemo, ”O Migdolino o koremieuku hiädono Aswan o koreharail̄e, o Mesir manga dodiawo mata-mata aha yohonenge o parangi magoronaka. De o Mesir manga tentara imaö ede-edenge gënanga aha yowedere hahi kokabarihi. Ngohi o Jou Duru toko Kurutil̄e totemoka.

⁷O berera gënanga aha idadi o berera duru kairïdika hagala o berera irörirïdi mahomoa mahidogoronaka, deʼ makota-kota aha idadi kamagogilaongö.

⁸Nako Ngohi tatuhuku o Mesir deʼ tä Toma mata-mata manga dodiawo, önanga ihi öriki Ngohila o Jou.

⁹Nako mawange gënanga iboa, deʼ o Mesir iwederoka, Ngohi aha tahidingoto huhuloko-o huhuloko deʼ hagala o kapa mangale yatodokana hagala o Sudan manyawa yangaku okaua gënanga, done önanga aha yohawana, Igoungu o wange gënanga aha iboa!”

¹⁰Ma Jou Duru woko Kurutil̄e wotemo, ”Ngohi aha tipäke ma Koano Nebukadnezar o Babelino mangale wawedere o Mesir makaya mata-mata.

¹¹O Nebukadnezar imakinïki aitentara yanö nako-nakoua o apongo aha yoboa deʼ yawedere o tonaka nënanga. Onanga aha yaparangi o Mesir deʼ o oworo, deʼ hagala o maiyeti aha ima hikabarihika o bereraka nënanga.

¹²Ngohi aha taowaha o Nil ma Ngairi deʼ tohilapahi o Mesir ingodumu hagala o nyawa madorouika. Hagala o nyawa maporetino aha Tähuloko yabinaha o berera gënanga ingodumu. Ngohi, o Jou, totemoka.”

¹³Ma Jou Duru woko Kurutil̄e wotemo, ”Ngohi aha tä wedere hagala o gomanga deʼ hagala o gikiri o Memfisoka. Aha koiwakaoli o koano o Mesiroka. manyawa yongodumu aha Tadiai yohawana.

¹⁴O Mesir o koreharail̄e yomode-modekika aha Tohidadi duru kairïdika deʼ o Soan makota o koremieuku aha Tatuhuku. O Tebe o kota matiti gënanga aha Tahukumu,

¹⁵deʼ makaya aha Tabinaha. Ngohi aha tadogopoa Ahi gangamo o Pelusiumuku, o kota idadi o Mesir mabebeno o mehele,

¹⁶deʼ o kota gënanga aha kohagiria yatagongo o hangihara. Igoungu, Ngohi aha tatuhuku o Mesir. Hagala mabebeno o mehele o Tebe makota aha ikilianga deʼ o kota gënanga aha yaolu o nguihi.

¹⁷O Heliopolis deʼ o Bubastis makota magogoduru aha yohonenge o parangi magoronaka, deʼ o ngongoheka aha Tatagoko.

¹⁸O öraha Ngohi tohibobaha o Mesir makuaha ikökurutil̄e deʼ Tal̄ë makuaha hoko gënanga ihi amo-amoko, o Tahpanhes aha yakilolitino o huhutu deʼ mangongoheka aha yätagoko.

¹⁹Hoko genangala Ngohi aha tahukumu o Mesir, done ihi öriki önanga Ngohi o Jou.”

²⁰O wange matumidoka o mede mahira o taongo mangimoi de moioka maöraha ngomi mitabuanga, ma Jou wohitemo ngohiino,

²¹”Hei o nyawa nokokakaliua, Ngohi tatobikoka o Mesir manga koano ai giama, deʼ moiua yadehioro ai giama gënanga ekola yatino hupaya itogumu deʼ idadi iyaoaka makuata mangale wohisö oli o oworo.

²²Ngohi o Jou Duru toko Kurutil̄e totemo: Ngohi nënanga o Mesir manga koano ai haturu, deʼ ai giama hinoto aha Tatobiki, yaoa kai kua-kuatohi yaoa itotobi-tobikoka. Done o oworo gënanga aha ai giamoka de itifa.

²³Ngohi aha tahikokabarihika o Mesir manyawa o dunia yamode-modekika.

²⁴Daha Tohikuata o Babel manga koano aigiama, deʼ Togelenga Ahi oworo ai giama magoronaka. Ma o Mesir manga koano ai giama aha Tatobiki hiädono ünanga aha wokururihi deʼ wohonenge o Babel manga koano ai himangoka, ai haturu.

²⁵Igoungu, o Mesir manga koano aha Tibole, ena hioko o Babel manga koano aha Tihikuata. Nako Tihidöaka Ahi oworo unangika, deʼ ünanga wohitumutika mameta o Mesirika, önanga aha ihi öriki Ngohi o Jou.

²⁶Ngohi aha tahibarihi hagala o Mesir manyawa o dunia yamode-modekika. Done önanga ihi öriki Ngohila o Jou.”