Read Tobelo O YEHEZKIEL 31 Bible Online

O YEHEZKIEL 31 - Tobelo bible

O YEHEZKIEL 31

¹O wange mahira o mede mahange o taongo mangimoi deʼ moi magoronaka maöraha ngomi o tabuangoka, ma Jou Wohitemo ngohino,

²”Hei o nyawa nokokakaliua, nohiädono Ahi behehongo nënanga o Mesir manga koanoika deʼ aihöana yongodumu: Igoungu ani mulia kohagiria! Koiwa yakunu idadi nimaketero!

³Ngona hokä o Libanon maliwewuru ikua-kuata iomanga majaga irubu-rubu deʼ ihailoa. Madengeoti irikoto deʼ itiail̄e madekara o lobioka yail̄e.

⁴Enanga iwango hababu ma akere yawedono. O ngairi o tonaka matimioka ihi döaka o inomo, yatuagi hagala mangutuku, deʼ yapehaka hagala o gota mautu mahomoa.

⁵Karana ma akere komaiwa laikuranga, iwango iburere, majaga madengeoti ipako deʼ ikurutu. Hagala o gota mautu o honga-honganoka, enanga duru ikurutil̄e madol̄umo.

⁶O totaleo irupa-rupa imä igutu mararagaoka. O aiwani ihühuhuku ingohaka mahohongo magoronaka. Mata-mata o hoana dë o berera ma ago-agomo o dunia yamode-modekika yogogeruku imahohongo matimioka.

⁷O gota mautu gënanga ihailoa mangale hapulo-pulono; maröehe irikoto, majaga madengeoti ikurutu. Mangutuku iyatotara iwohama daukuku magurutuku yadono o akere matiti o tonaka magoronaka.

⁸ Hagala o liwewuru mautu o Edenoka, ma Jou ma Dutu ai dumule hakunua hohitero dede enanga. Koiwa o liwewuru yakunu imateroino, koiwa o gota mautu hoko gënanga magurutu majaga madengeoti. Igoungu, ma Jou ma Dutu ai dumuleoka koiwa o gota mautu imatero mahailoa deʼ enanga.

⁹Ngohila tadiai enanga marupa mahailoa deʼ hagala majaga madengeoti magurutuku de irubu. Hagala o gota mautu ma Jou Madutu Ai dumuleoka yamao mahininga yohiri enangika.

¹⁰Hababu gënanga, Ngohi, o Jou Duru toko Kurutil̄e, Tohingahu ngonaika okia aha idadi o gotaika matubu hiädono o lobil̄e gënanga. Hababu iholoi ikurutil̄e, iholoi enanga ima edenge.

¹¹Done Ngohi tatila enanga deʼ aha Tohilapahi yokokuaha maporetinoika, aha ihidiai enanga imamoteke deʼ madorou.

¹²O tentara maporetino yanako-nakoua o apongo aha yatol̄anga enanga daha yodogumal̄aika. Ma jaga itötobi-tobikoka aha iturabaha mata-mata ol̄oku deʼ o waiuku o bereraka gënanga. Mata-mata o hoana de o berera yogögogere matimioka aha yöiki yodogumal̄a enanga.

¹³Hagala o totaleo aha iboa deʼ yodangiuku o gota mautu irö ruba-rubaukuoka gënanga deʼ hagala o aiwani ihühuhuku aha yapito-pitoko majaga-jaga.

¹⁴Mata-mata gënanga idadi hupaya mulaenge o öraha nënanga, aha koiwaoli o gota mautu iwango imatero magurutil̄e gënanga; koiwaoli mautu matubu yadono o lobil̄e ngaroka imämake o akere maboboloi. Mata-mata kiani ihonenge hokä o nyawa yokokakal̄iua, deʼ imatoomu deʼ hagala o nyawa yoö uti-utioka o nyawa yohone-honenge manga duniauku.”

¹⁵Hoko nënanga wotemo ma Jou Duru woko Kurutil̄e, ”Nako o gota mautu gënanga iuti o nyawa yohone-honenge manga duniauku, Ngohi tahuloko o akere o tonaka matimiuku yaolu hokä manonako o hininga mahuha. Ngohi aha tatumunu o ngairi mabauhu deʼ tajumu o ngairi maiti-iti. Karana o gota mautu gënanga ihonengoka, Ngohi aha todotagao o huhutu o Libanon hagala mal̄oku-mal̄okuoka deʼ yadiai imaai mata-mata o gota mautu o honganika.

¹⁶Maöraha o gota mautu gënanga Tohiguti o nyawa yohone-honenge manga duniauku, iruba matühu aha yahahara o hoana deʼ o berera ma ago-agomo. Mata-mata o gota mautu o Edenoka de hagala o gota mautu i iri-iriki o Libanonoka imamake o akere maboboloi, deʼ iutioka o duniauku duru matimi-timiuku aha isanangi deʼ iotaka o gota mautu gënanga.

¹⁷Onanga aha yanïki o nyawa yohone-honenge manga duniauku deʼ imatoomu dede önanga yäotakoka iholoi ihira. De mata-mata mahira yogogogere o gota mautu gënanga matimioka aha ihigerewoto hoana deʼ berera ma ago-agomo manga hidogoronaka.

¹⁸O gota mautu gënanga ihinonako o Mesir manga koano deʼ aihöana. Koiwa o gota mautu o Edenoka hoko gënanga magurutil̄e deʼ mamulia. Mä öraha nënanga, hokä hagala o gota mautu o Edenokaö, o gota mautu o gënanga aha iuti o nyawa yohone-honenge manga duniauku deʼ imatoomu dede önanga iwino nako-nakoua ma Jou Madutu dede önanga yohonenge o parangi magoronaka. Ngohi, o Jou Duru toko Kurutil̄e totemoka.”