Read Tobelo O YEHEZKIEL 34 Bible Online

O YEHEZKIEL 34 - Tobelo bible

O YEHEZKIEL 34

¹Ma Jou wohitemo ngohino,

²”Hei o nyawa nokokakaliua, nataaere o Israeloka manga kokoano, deʼ nohiädono okia Ngohi, o Jou Duru toko Kurutil̄e totemo onangika, ’Nibodito ngini, hei o Israel manga gogoana. Ngini duga-duga niapikiri nia diri mahirete maparalu, nia duba-dubaua ma diri maparalu.

³Mahuhu ngini niaokere, hagala magogo ngini niadiai o pakeanga, deʼ o duba duru iboburere ngini niatoaka de niaol̄omo. Ngini komaiwahi niapaliara niaduba-duba.

⁴Hagala o duba ima sosikaua ngini niapaliaraua, ipopanyake niahourua, yanabo-nabo niadehorua, irörehe-rehene deʼ ihihihanga ngini nia lingirua deʼ niao nihigilio. Kaaholi nia duba mata-mata gënanga ngini nihidiai dema hayanga koiwa.

⁵ Karana toenanga koiwa magogoana, o duba-duba gënanga ima kokitingakoka deʼ idadi o aiwani madorou mainomo.

⁶Done hagala Ahi duba idadi yodadagi hagala o doporono magogurutil̄eoka deʼ hagala ol̄oku-l̄okuoka. Enanga imahikabarahi o dunia yamode-modekika, moiua yolegaika ekola yalingiri enanga.

⁷Aa, gogoana-gogoana, niihene okia Ngohi o Jou Duru toko Kurutil̄e totemo nginika:

⁸Mangale Ngohi, ma Jou Madutu towango-wango, niatailako nihidodiai! Ahi duba-duba yagolioka deʼ yaol̄omo o aiwani madorou, karana moiua yogoa-goana enanga. Ngini Ahi gogoana-gogoana niolegaikaua o duba-duba gënanga. Ngini duga-duga nia pikiri nia diri mahirete, nia duba-dubaua maparalu.

⁹Ho, niihene hei gogoana-gogoana,

¹⁰Ngohi, o Jou Duru toko Kurutil̄e totemo nginika, Ngohi nënanga nia haturu. Hagala Ahi duba gënanga aha Tal̄ëoli nginioka deʼ Tinihi gogoanokauaoli nginika; ngini Tinihi gumal̄aokauaoli nia pikiri nia paralu mahirete. Hagala Ahi duba aha Tohihalamati nginioka hiädono enanga idadiokauaoli nia inomo.’ ”

¹¹Ma Jou Duru woko Kurutil̄e wotemo, ”Ngohi mahirete aha Talingiri hagala Ahi duba deʼ enanga Tapaliara,

¹²hokä womatengo o gogoana walingiri deʼ watoomu ai duba-duba imahikokabarihika daha enanga wapaliara. Enanga aha Tao tohigilio hagala o ngï enanga imahikokabarihokaika o wange mahohuhutuoka deʼ itotorou gënanga.

¹³Onanga aha Tahihupu o hoana deʼ o berera ma ago-agomo manga hidogoronaino deʼ hagala o berera maporetino daha Tatoomu deʼ Taao manga bereraika mahirete. Onanga aha Tagoana to Israeloka hagala manga l̄okuoka deʼ hagala manga waioka de Tatuda önanga o momo matonaka malua-luasika de kaitotumuloa.

¹⁴Igoungu, ngohi aha tasadia mangale önanga o momo i boburere matonaka ilua-luasi ol̄oku madukuroka deʼ o Israel matonaka iwai-waioka. Dokengoka enanga aha imahibatongo deʼ i ol̄omo o momo deʼ kayotö tumuloa.

¹⁵Ngohi mahirete aha todadi o gogoana hagala Ahi duba de Ta sadia o ngï imahibatongo mangale enanga; Ngohi, o Jou Duru toko Kurutil̄e totemooka.

¹⁶Ihihihanga aha Talingiri, irö rehe-rehene aha Tao tohigilio, yanabo-nabo aha Tapakiti, ipopanyake aha Tahoouru; mä iboburere de ikua-kuata aha Tabinaha, hababu Ngohi o gogoana tadiai okia maoa-oa.

¹⁷Niihene, hei Ahi duba-duba! Ngohi, o Jou Duru toko Kurutil̄e tini temo nginika Ngohi aha tinï juru hakimi ngini moi-moi deʼ Tohikitingaka maoa-oa deʼ madodorou, hagala o duba deʼ hagala o kabingi.

¹⁸Nia hidogoronaoka ngini naga yogihounua duga-duga deʼ yamata o momo duru maoa-oa, mä yapito-pitoko o momo önanga yaol̄o-ol̄omua! Onanga yokere o akere madododono daha yagawa o akere önanga yaö oke-okerua!

¹⁹Hagala ahi duba mahomoa kiani i ol̄omo o momo yapö pito-pitokoka deʼ yaokere o akere yagö gawa-gawaoka.

²⁰Hababu gënanga, Ngohi, o Jou Duru toko Kurutil̄e totemo nginika, hei hagala o duba iboburere, Ngohi aha toboa dadi o hakimi o duba ikua-kuata deʼ o duba ibole-bole mahidogoronaka.

²¹Ngini nia hito-hitomo ikali nia taduku o duba ipopanyake hiädono enanga iduhu deʼ o duba matika.

²²Ma Ngohi mahirete aha tahihalamati hagala Ahi duba, hupaya enanga ibotohi ihidiai deʼ mahayanga koiwa. Ngohi aha tajuru hakimi Ahi duba-duba moi-moi deʼ tohikitingaka maoa-oa dema dodorou.

²³ Ngohi aha tigoraka womatengo o koano hokä Ahi gilaongo o Daud, mangale wodadi to ona manga gogoana womatengo-tengoka, deʼ ünanga aha wäpaliara önanga.

²⁴ Ngohi, o Jou, aha todadi toönanga manga Jou Madutu, deʼ o koano hokä Ahi gilaongo o Daud gënanga aha wodadi wäkokuaha önanga. Ngohi o Jou totemoka.

²⁵Ngohi aha todiai o jaji dede önanga, yatagongo toönanga manga halamati. Ngohi aha taduhu mata-mata o aiwani madorou o berera i ngodumu, hiädono Ahi duba-duba yakunu igogere deʼ irïdi o tonaka i lua-luasoka deʼ imaidu o honga-honganoka.

²⁶Ngohi aha tahibarakati önanga deʼ tahigumal̄a önanga yogogere Ahi doporono itebi-tebini magilolitino. Onanga aha Tahidöaka o awana nako önanga yoparalu.

²⁷Hagala o gota mautu aha ihohoko, hagala o dumule aha ihidöaka mahasili, deʼ mata-mata o nyawa aha yogogere de marïdi manga tonakoka mahirete. Nako Ahi umati manga liliko o rante Tatoakoka de önanga Tahibebasoka hagala o nyawaino imä gogilaongo önanga, ihi öriki önanga Ngohila o Jou.

²⁸Onanga aha yaoraokaua o hoana deʼ o berera ma ago-agomo ihi nako-nakoua Ngohi, ekola yägoli hagala o aiwani madorou. Onanga aha yowango deʼ malola, deʼ koiwa imatengö aha yadiai önanga yohawanoli.

²⁹Ngohi aha taburere toönanga manga dodumule hiädono koiwa o habirokata maöraha o bereraka gënanga. Onanga aha yahikaukuokauaoli o hoana deʼ o berera ma ago-agomo mahomoaino.

³⁰Done mata-mata o nyawa ihi öriki o Israeloka ganga Ahi umati, deʼ Ngohi tä hohongino. Ngohi, o Jou Duru toko Kurutil̄e totemoka.

³¹Igoungu, nginila Ahi duba matika Tohidö döa-döaka o inomo. Ngini ganga Ahi umati, deʼ Ngohi nia Jou Madutu. Ngohi, o Jou Duru toko Kurutil̄e totemoka.”