Read Tobelo O YEHEZKIEL 35 Bible Online

O YEHEZKIEL 35 - Tobelo bible

O YEHEZKIEL 35

¹ Ma Jou wohitemo ngohino,

²”Hei o nyawa nokokakaliua, nalolai o Edom maberera.

³Nohiädono manyawaika okia Ngohi o Jou Duru toko Kurutil̄e totemo onangika, ’Ngohi nënanga nia haturu, hei Edom mal̄oku madukuru manyawa! Ani tonaka aha Tohidadi duru kai rïdika koiwa manyawa, de hagala ani kota aha Tohidadi kamagogilianga. Done ngini nihi öriki Ngohi o Jou.

⁵Maöraha mahira ngini niä haturu o Israeloka de niä mal̄aika önanga yätoma maöraha önanga yatapal̄u o bodito hokä o hukumanga mabobaha mangale toönanga manga baradoha.

⁶Karana gënanga, mangale Ngohi, o Jou Madutu towango-wango, o Jou Duru to ko Kurutil̄e, o honenge ganga inininïki, deʼ ngini niakunua nimahirehene dede enanga. Ngini nia howonoka hababu niadiai o doma, done o domaö aha iniginïki.

⁷Hagala nia kota o Edom ma l̄oku mabuturungu aha Tohidadi kai rïdika de moi-moi o nyawa yatilakuru aha Tätoma.

⁸Hagala o l̄oku aha Tätamunu dë hagala ani maiyeti, o doporono deʼ o wai aha Tahi ömanga deʼ yopoparangi manga honenge.

⁹Nia berera aha Tohidadi o tonaka makokakaha mangale kahi ado-adonika, deʼ hagala nia kota aha moiua o nyawa yogogere. Done ngini nihi öriki Ngohi o Jou.

¹⁰Ngini nitemo yaoa o Yehuda yaoa o Israel deʼ manga tonaka moi-moi ganga nia haku, deʼ ngini aha nima hitingini ngaroka Ngohi, o Jou, ganga toönanga manga Jou Madutu.

¹¹Hababu gënanga, mangale Ngohi, o Jou Madutu towango-wango, o Jou Duru toko Kurutil̄e, Ngohi aha tabalahi o hininga magogono nginika, karana ngini ningamo, nia hininga ihauku deʼ niä dohata Ahi umatika. Onanga aha ihi öriki ngini Tinï hukumu karana nia manarama onangika.

¹²Done ngini nihiöriki Ngohi, o Jou toihenoka nia hohedu maöraha ngini nitemo: Hagala o l̄oku o Israel matonakoka idadioka duru kai rïdika deʼ ihilapahi idadi tongone nanga inomo.

¹³Hei o Edom manyawa, ngini nia uru ilamoko deʼ nitemo dema edenge Ngohino. Ngohi toihenoka mata-mata gënanga.

¹⁴Ngohi o Jou Duru toko Kurutil̄e totemo: O dunia yamode-modekika aha isanangi maöraha nia berera yamode-modekika Tohidadi o tonaka ilua-luasi duru kairïdika,

¹⁵hokä imatero nginiö nisanangi maöraha niä make o Israeloka Tongohi madutu, idadi duru kai rïdika, Hagala o l̄oku o Seir, ikali o Edom matonaka yamode-modekika aha idadi duru kairïdika. Done mata-mata o nyawa aha ihi öriki Ngohila o Jou.’ ”