Read Tobelo O YEHEZKIEL 38 Bible Online

O YEHEZKIEL 38 - Tobelo bible

O YEHEZKIEL 38

¹Ma Jou wohitemo ngohino,

² ”Hei o nyawa nokokakaliua, nihilai o Gog o koano womomulia hagala o berera o Mesekh de o Tubalino o Magog matonakoka.

³Nahetongo unangika Ngohi o Jou ma Dutu toko Kurutil̄e ganga ai haturu.

⁴Ngohi aha tileboto ünanga, tihipake o lalakete ai okokika, deʼ tililiara ünanga tihihupu imakinïki aitentara manga duduono yongodumu. Duru komanga ngöe o kudauku yobare-barene manga duduono manga pakeanga kao rupa moi gënanga. O tentara moi-moi imagao o dadatoko deʼ o oworo.

⁵Ma koano iwinïki hagala o tentara o Persiaino, o Sudanino deʼ o Libiaino, moi-moi imagao o oworo deʼ o sapeo o waja.

⁶Mata-mata yopoparangi o Gomer deʼ o Bet-Togarma o koremieuku mabereraino, yotagi manga himangika imakao dede ünanga, deʼ o hoana mahomoa kamanga ngöeö yonïki.

⁷Nïhuloko ünanga womahidiai deʼ napareta o tentara yongodumu imahidö dogo-dogo dede ünanga hupaya imahidiai yanïki aipareta.

⁸O taongo muruono nagaoli ünanga aha Tipareta waparangi moi o berera deʼ manyawa watotoomuino okaoli o hoana manga ngöe-ngöeino manga hidogoronaka deʼ ipaha wogogere o bereraka gënanga deʼ masanangi. O Gog aha wogogere o Israeloka manga l̄oku madekanoka kairïdika deʼ iomanga magogilianga, mä o öraha nënanga yogogere o kawaha yowango dema dame.

⁹Unanga deʼ aitentara ikali o hoana deʼ o berera manyawa manga ngöe iwinö ninïki aha yoboa yoparangi hokä o rato mangutuku deʼ yatamunu o berera mata-mataika hokä o lobi.”

¹⁰Ma Jou Duru woko Kurutil̄e witemo o Gogika, ”Maöraha gënanga ngona aha nodiai o datoro madorou.

¹¹Ngona naputuhu mangale naparangi o berera koö iwa-iwa mabebeno o mehele gënanga, kiaka manyawa yowango dëmadame de magigoro koiwa hagala o kotaoka koö iwa-iwa mabebeno o mehele deʼ koiwa toenanga mapakakaha imahigogoana.

¹²Ngona aha nal̄ë deʼ naora o kotaoka manyawa mahira kamagogilianga. Manyawa yatoomu o hoana deʼ o bereraino manyawa, o öraha nënanga toönanga mangöeoka manga arata deʼ manga gigini deʼ önanga yogogere o dunia matitioka.

¹³O Syeba deʼ o Dedan ikali imahö huku-hukunu o Spanyol maberera makotaoka inïleha nginika hoko nënanga, ’Boteka ngona natoomu ani tentara duga-duga mangale yoora de yal̄ë o gurasi, o haaka, o gigini deʼ o arata, ikali yatoraka mata-mata gënanga?ʼ ”

¹⁴Hababu gënanga ma Jou Duru woko Kurutil̄e wohihuloko ngohi mangale tohiädono o Gogika o behehongo nënanga, ”Hababu maöraha Ahi umati o Israeloka yowango demadame deʼ magigoro koiwa, ngona noboa naparangi.

¹⁵Ngona nomagoraka ani ngï nogogogeroka deʼ naino, magurutuku o koremieuku ininïki o tentara kamanga ngöe deʼ yokuata, mata-mata o kudauku yobare-barene manga duduono hagala i rupa o hoana dë o bereraino manyawa.

¹⁶Daha ngona naparangi Ahi umati o Israeloka hokä o rato mangutuku yaparono o dunia. Nako maöraha iboa, ngona aha Toni hidingoto mangale nögogere Ahi tonaka. De Ahi manarama i tilakuru ngona, hei Gog, o hoana deʼ o berera ma ago-agomo aha ihi öriki onagona Ngohi, enagënanga o Jou Madutu totö tebi-tebini.

¹⁷Koigoungua mangale ngona Ngohi mahira totemo itilakuru Ahi gogilaongo o Israeloka manga nabi-nabi? Onanga ihidodemoka maöraha aha iboa Ngohi aha tihuloko womatengo mangale waparangi o Israeloka. Ngohi o Jou Duru toko Kurutil̄e totemoka.”

¹⁸Ma Jou Duru woko Kurutil̄e wotemo, ”Mä demajapati o Gog waparangi o Israel ibotino, Ngohi aha tongamo kohagiria.

¹⁹De tongamo kohagiria Ngohi aha tadobuturungu, o wange gënanga naga o ohu höboborohono o Israel manga tonakoka.

²⁰Mata-mata o nawoko de o totaleo, mata-mata o aiwani mapako-pako deʼ mahohumujuru, deʼ mata-mata o nyawa o dunia mal̄okuoka aha yohawana yohaharoka ihï himanga Ngohi. Hagala o l̄oku aha itoropaha, hagala o bakoro aha itopaha deʼ mata-mata o bebeno o mehele aha iruba.

²¹Daha o Gog aha Titodokana deʼ hagala rupa o bodito. Ngohi, o Jou Duru toko Kurutil̄e totemoka. Ai ngoha-ngohaka aha imateke parangi deʼ toönanga manga oworo.

²²Unanga aha Tihukumu deʼ o bobaku o panyake deʼ o awunu ikopoa. O awana iriki-rikimi dë o awana o es, o uku de o walira aha Tidogopoa unanguku deʼ aitentara deʼ o hoana deʼ o berera yowöe-wöeuku imahidogo-dogoka dede ünanga.

²³De madodagi gënanga aha Tohidumutu hagala hoana de o bereraika Ngohi nënanga tomulia deʼ totebini. Done önanga ihi öriki Ngohila o Jou.”