Read Tobelo O YEHEZKIEL 4 Bible Online

O YEHEZKIEL 4 - Tobelo bible

O YEHEZKIEL 4

¹Ma Jou Madutu wotemo, ”Hei o nyawa nokokakaliua, nal̄e moi o tela, nakelengauku ani himangoka deʼ nariri mal̄okuoka o Yerusalem makota madulada.

²Daha natulada moi o higiloliti o kotaika gënanga, de hagala o baiti hagala o tonaka madoporono, o tau-tau deʼ o pakakaha-pakakaha ihikokilianga makota o mehele magilolitino.

³Na l̄e o panci o behi deʼ napulono gënanga moi o bebeno o behi; nakelengauku o panci gënanga ngona deʼ o Yerusalem makota nia hidogoronaka. Ipaha nohimangika o kotaika gënanga matero-tero ngona nohigilolitino. Genanga aha idadi manonako mangale o Israel manyawa.

⁴Daha nomarubaiha nomakumuruku o higilika, deʼ Ngohi aha tonihitapal̄u o Israeloka manga howono ngonauku. O wange o ratuhu hange de morihiwo madekana ngona aha nomaluluiha hoko gënanga deʼ natagongo o hangihara karana toönanga manga howono. O wange moi ngona nomaluluiha hoko gënanga ihi nonako o taongo moi o Israeloka manyawa manga hukumanga.

⁶Iboto gënanga, nomarubaiha nomakumuruku o nirakika deʼ namao o hukumanga mangale o Yehuda manga howono o wange moruata madekana, o wange moi ihi nonako o taongo moi toönanga manga hukumanga.

⁷Napulono o Yerusalem ihi gogiloliti. Nohi metaika ani bokoto o kotaika gënanga deʼ nohiadono Ahi behehongo mangale o hukumanga onangika.

⁸Ngona aha Toniliko hiädono nakunua na idulu ani röehe o higiloka o nirakika ekola o nirakoka o higilika hiädono ihi giloliti gënanga ipaha.

⁹O öraha nënanga, nal̄e o gandum, o tanuma madoka-dokara, o tanuma opoho, omui-mui deʼ o gandum maaluhu. Nohikaganu gënanga mata-mata deʼ nadiai o roti. Genanga ani inomo o wange o ratuhu hange de morihiwoino madekana ngona nomarubaiha nomakumuruku o higilika gënanga.

¹⁰O roti gënanga kiani naregu hoko gënanga marupa hiädono owange higetongo ngona na ol̄omo duga-duga o garam o ratuhu hinoto de moruange. Iholoi de gënanga yakunua.

¹¹O akere naoke-okere yakunua iholoi, enagënanga o wange moi o belu-belu hinoto.

¹²Notofo o uku de o nyawa manga ioko hokä magota ihi haro-harongo. Nal̄ofo ani roti o uku gënanga mal̄okuoka deʼ naol̄omo o roti gënanga o nyawa mata-mata manga himangoka.”

¹³Ma Jou wotemo, ”Hoko gënanga madodagi o Israeloka manyawa aha yaol̄omo o inomo o Musa ai tita yalara-laranga, maöraha önanga Taumo hagala o berera mahomoaika.”

¹⁴Mä ngohi tohaluhu, ”Adede Jou Duru noko Kurutil̄e! Mulaenge ahi etetekohi hiädono öraha nënanga, komaiwahi ngohi tapeseke ahi diri de o inomo o aiwani mahonenge ekola o aiwani ihohatera magoli mahou. Komaiwahi ngohi taol̄omo o inomo yapulono iharamu.”

¹⁵Done ma Jou Madutu wotemo, ”Kayaoa, hokä madagali o nyawa manga ioko, ngona yakunu napake o hapi maioko mangale nohiharongo ani roti.”

¹⁶Ipaha Unanga wotemoli, ”Hei o nyawa nokokakaliua, Ngohi aha tabinaha o inomo isosadia o Yerusalemoka. De yohawana deʼ yohawatere hagala o nyawa aha iholoiua oinomo önanga yaol̄omo deʼ o akere önanga yaokere.

¹⁷Onanga aha manga nganono itoaka karana imataka o roti deʼ o akere, deʼ mabaha önanga yohonenge karana toönanga manga baradoha.”