Read Tobelo O YEHEZKIEL 40 Bible Online

O YEHEZKIEL 40 - Tobelo bible

O YEHEZKIEL 40

¹O öraha gënanga o wange mangimoi o mede mahira, o taongo monaoko deʼ motoa magoronaka maöraha ngomi o tabuangoka, o taongo ngimoi de iata o Yerusalem yahohihanga ipahaino, ngohi tamao ma Jou Ai kuaha, daha ngohi ihiao toiki.

² Moi o lolega magoronaka, ma Jou Madutu wohiao ngohi o Israel matonakika de wohihigogere ngohi ol̄oku magögurutil̄eoka. Ahi himangoka tamake o tau ma ago-agomo o doomu moi imahirupa moi o kota.

³ Ngohi ihiao genangika deʼ timake womatengo o nauru kawomahidoleletonguku hokä o tabaga womaokoino o ngorana ma amo-amoko madatekoka. Unanga wasöino o duduga magumini o lenanino ikali o duduga magota.

⁴O nauru gënanga wohitemo ngohino, ”Hei o nyawa nokokakaliua, noihene nohidodiai de natailako nohidodiai hagala moi-moi Tonihimö mato-matoko ngonaika, hababu mangale gënanga ngona iniao nenangino. Nohingahu o Israel manyawaika mata-mata aha namö make-make.”

⁵ Daha ngohi tamake ma Jou Ai Tau yakilolitino o bebeno o mehele gënanga deʼ maduduga o gota magurutu o metere hange. Inyata o bebeno o mehele gënanga magurutil̄e o meter hange deʼ ma birinö o meter hange.

⁶Ipaha ünanga woiki mangorana maamo-amokika ihö hima-himanga o wange mahiwaroko. Unanga wadoa mangute deʼ womahiadonil̄e mal̄okuoka, ünanga watuga mangorana mahita gënanga mangoata o meter hange.

⁷O ngorana ma amo-amoko maporetoka gënanga naga moi o ngekomo maiteteke deʼ madatekoko yogetongo naga yogoa-goana manga kamari o gahumu hange. Mata-mata o kamari gënanga ima koketero mapako; madüku ipahagi iata, deʼ magurutu madateke yogetongo ganga o meter hange. Mabebeno o mehele mabatingi o kamari yogetongo imakoketero mabirini, enagënanga o meter hinoto de mahononga. O ngekomo maiteteke gënanga magurutika o meter hangeoli de mameta o kamari ma amo-amokika yohimangika ma Jou Ai Tauika. O nauru gënanga watuga o kamari ma amo-amoko gënanga de inyata mangoata o meter iata; magogere mangorana ma amo-amoko mabahaoka, magoronaika idaduoka, enagënanga duru itigi deʼ ma Jou Ai Tau. Hagala o bebeno o mehele ma Jou Ai Tauika yohima-himanga idaduoka, mabirini o meter moi.

⁸

⁹

¹⁰

¹¹Ipaha o nauru gënanga watuga o ngekomo maiteteke mangoata o ngorana ma amo-amokoka; o meter butanga deʼ mahononga, dema ngoata o ngorana ma amo-amoko gënanga o meter motoa.

¹²O gogoana makama-kamari mahimangoka maduduga magurutu o metere hange, mangoata o metere hange de magurutil̄e o metere hange gënanga, naga o bebeno o mehele madodipokouku magurutil̄e o metere mahononga, de mabirini o metere mahonongaoli.

¹³Daha o nauru gënanga watuga ma agurika o bebeno o mehele maporetoko moi okamari yogoa-goana hiädono o bebeno o mehele maporetoko moi okamari yo goa-goana mahonongaka enagënanga o metere ngimoi de hinoto de mahononga.

¹⁴Unanga watuga makamari ma amo-amoko gënanga: magurutu o metere ngimoi. O kamari mangorana gënanga madumutu ma Jou Ai Tau maloa maporetika.

¹⁵Ma aguru o ngorana ma amo-amoko maporetoka deʼ yaino hiädono o kamari ma amo-amoko mabebeno o mehelika ma Jou Ai Tau yohima-himangika idaduoka ganga o metere monaoko de motoa.

¹⁶O bebeno o mehele maporetoka deʼ o bebeno o mehele ihi bati-batingi hagala o kamari gënanga naga hagala o jangela mai teteke. Hagala o bebeno o mehele magoronaika idadadu yohima-himanga o ngekomo maitetekika, yaporomu deʼ hagala o garade o palem magota mautu.

¹⁷Ipaha o nauru gënanga wohiao ngohi mianonu o ngorana ma amo-amoko ma Jou Ai Tau malooa maporetika. O bebeno o mehele maporetoka madatekoka ma Jou Ai Tau magilolitino gënanga ihigoko o kamari moruange. Hagala o kamari mahimangoka gënanga naga malante o helewo

¹⁸yakilolitino malooa mata-mata gënanga. Malooa maporetoka gënanga iholoi itipokouku ngaro deʼ malooa magoronaka.

¹⁹Genangoka naga mangorana ma amo-amoko mahomoa magogere iholoi i kurutil̄e deʼ mameta malooa magoronaka. O nauru gënanga watuga ma aguru o ngorana ma ago-agomo hinoto gënanga mahidogoronaika: o metere moritoa.

²⁰Ipaha o nauru gënanga watuga o ngorana ma ago-agomo o koremieuku mameta o looaika magogoronaka.

²¹O ngorana ma amo-amokoka gënanga, o gogoana makamari hange mangekomo maiteteke madatekoko moi-moi, hagala o bebeno o mehele mabatingi ikali mangorana ma amo-amoko, mata-mata imaketero maduduga deʼ naga o ngorama ma ago-agomo o wange mahiwaroko idaduoka. Mangorana ma amo-amoko mangekomo maiteteke gënanga ingodumu magurutu o metere monaoko de motoa de mangoata o metere ngimoi deʼ hinoto de mahononga.

²²Makamari ma amo-amoko, hagala majangela, deʼ magarade-garade o palem magota-magota mautu kaimaketero deʼ naga o ngorana ma amo-amoko o wange mahiwaroko. O ngute madodoko tumidi madumutu o ngorana ma amo-amokika gënanga, deʼ mabobahaka naga o kamari ma amo-amoko yo himangika ma Jou Ai Tau ma looa maporetoka.

²³Ima rihimangino deʼ o ngorana ma amo-amoko o koremieuku, naga o ngorana ma ago-agomo mahomoa madumutu malooaika magogoronaka, hokä imatero naga o ngorana ago-agomo o wange mahiwaroko idaduoka. O nyawa gënanga watuga ma aguru o ngorana hinoto ma ago-agomo mahidogoronaoka gënanga: o metere moritoa.

²⁴Gila-gila, o nauru gënanga wohiao ngohi o ngorana ma amo-amokika o koreharail̄e deʼ watuga. Inyata o ngorana ma amo-amoko gënanga kaimatero deʼ hagala o ngorana ma ago-agomo mahomoa.

²⁵Hagala majangela makama-kamaroka kaimatero deʼ naga hagala mangorana ma amo-amokoka mahomoa. Mangorana ma amo-amoko mangekomo maiteteke gënanga magurutu o metere monaoko deʼ motoa, deʼ mangoata o metere ngimoi deʼ hinoto deʼ mahononga.

²⁶O ngute o doko-doko tumidil̄e madumutu o ngorana maamo-amokika gënanga deʼ makamari ma amo-amoko naga mabobahaoka, yohimangika ma Jou Ai Tau malooa maporetoka. Hagala o bebeno o mehele magoronaika idaduoka yohimangika o ngekomo maitetekika, ihiporomo deʼ hagala o garade o palem magota mautu.

²⁷Genangoka naga o ngorana ma ago-agomo madumutu malooa magogoronaika. O nauru gënanga watuga maaguru o ngorana maago-agomo hinoto gënanga mahidogoronaoka: o metere moritoa.

²⁸Gila-gila o nauru gënanga wohiao ngohi mia nonu o ngorana ma amo-amoko o koreharail̄e iwö woha-wohama o looa magogoronaika. Unanga watuga o ngorana ma ago-agomo o koremieil̄e gënanga maduduga kaimatero hagala o ngorana ma ago-agomo maporetika idaduoka.

²⁹Magogoana makama-kamari, o kamari ma ago-agomo, deʼ hagala mabebeno o mehele magoronaka kaimaketero de naga hagala o ngoranoka ma ago-agomo mahomoa. Hagala o kamari mangorana ma amo-amokoka nënangö toenanga de majengela-jengela. O ngorana ma amo-amoko mangekomo maiteteke gënanga magurutu o metere monaoko demotoa de mangoata o metere ngimoi deʼ hinoto de mahononga.

³⁰

³¹Mä makamari ma amo-amoko yohimangika malooa maporetoka. Hagala mabebeno o mehele magoronaika idaduoka yohimangika o ngekomo maitetekika, maporomuö deʼ magarade-garade o palem magota mautu. O ngute madoko-doko tufange gënanga madumutu o ngorana ma amo-amokika gënanga.

³²Iboto gënanga o nauru gënanga wohiao ngohi mianonu o ngorana ma amo-amoko o wange mahiwaroko iwoha-wohama malooa magogoronaika. Unanga watuga o ngorana ma amo-amoko gënanga de maduduga kaimaketero de hagala o ngorana ma ago-agomo mahomoa.

³³Magogoana makama-kamari, hagala mabebeno o mehele magoronaka deʼ makamari ma amo-amoko maduduga hokä naga hagala o ngoranoka mahomoa. Hagala o kamaroka gënanga deʼ makamari ma amo-amokoka naga majangela-majangela. O ngorana ma amo-amoko mangekomo maiteteke gënanga magurutu o metere monaoko de motoa de mangoata o metere ngimoi deʼ hinoto de mahononga.

³⁴Ma kamari ma amo-amoko yohimangika o looaika maporetoka. Hagala mabebeno o mehele magoronaika idaduoka yohimangika o ngekomo maitetekika, ihiporomu de hagala o garade o palem magota mautu. O ngute madodoko tufange madumutu o ngorana ma amo-amokika gënanga.

³⁵Mabobaha o nauru gënanga wohiao ngohi o ngorana ma amo-amokika o koremieuku. Unanga watuga o ngorana ma amo-amoko gënanga deʼ maduduga kaimatero deʼ hagala o ngorana ma ago-agomo mahomoa.

³⁶Magogoana makama-kamarö, hagala mabebeno o mehele magoronaka deʼ makamari ma amo-amoko kaimatero deʼ naga hagala o ngorana ma ago-agomoka mahomoa. Hagala makamaroka deʼ makamara ma ago-agomoka naga majangela-jangela. O ngorana ma ago-agomo ma ngekomo maiteteke gënanga magurutu o metere monaoko demotoa dema ngoata o metere ngimoi de hinoto demahononga.

³⁷Makamari mahimangokaö yohimangika o looa maporetika. Hagala mabebeno o mehele magoronaika idaduoka yohimangika o ngekomo maitetekika, ihi poromu de hagala o garade o palem magota mautu. O ngute ma doko-doko tufange madümutu o ngorana ma amo-amokika gënanga.

³⁸Malooa maporetoka naga moi o kamara madogo o ngorana ma amo-amoko magoronaka o koremieuku idaduoka. O kamari madogoka deyaino gënanga naga moi o ngorana madumutu o ngorana ma amo-amokika. Genangoka yoihoro hagala o aiwani mangale o huhuba ituhu-tuhuku.

³⁹O kamari ma amo-amokoka gënanga, naga o meja o gahumu iata, madateke yogëtongo o meja hinoto. Hagala o meja mal̄okuoka gënanga yotoaka o aiwani mangale o huhuba ituhu-tuhuku, ekola o huhuba o baradoha ma apongo ekola o huhuba o rugi madagali.

⁴⁰O kamari ma amo-amokoka maporetoka gënanga nagali o meja iata, o meja hinoto o ngorana ma amo-amoko o koremieuku madateke yogetongo gënanga.

⁴¹Ho, mata-mata naga o meja o gahumu tufange o huhuba yatoa-toaka mangï: iata magoronaka, deʼ iata o looa maporetoka.

⁴²O meja o gahumu iata o kamari madogoka yapake mangale ihidiai o huhuba ituhu-tuhuku o helewoino yohonotoko. O meja gënanga magurutil̄e o metere mahononga, mal̄okuil̄e idaduoka ipahagi iata, magurutu deʼ mangoata moi-moi senti mori tumidi demotoa. Hagala o meja gënanga mal̄okuoka yogogono o pakakaha mangale ihitoa-toaka o aiwani ihi huba-huba.

⁴³Ma meja-meja gënanga toenanga madatekika mangoata o senti tumidi de mahononga. Mata-mata o hiode ma akeme aha ihihö huba-huba yakelengauku hagala meja mal̄okuoka gënanga.

⁴⁴Ipaha o nauru gënanga wohiao ngohi o looa magoronaika. Genangoka naga hinoto o tau ma ago-agomo, moi o ngorana ma amo-amoko o koremieuku madatekoka deʼ yohimangika o looaika, ho deʼ moioli o ngorana o koreharail̄e madatekoka ihimanga o koremieuku.

⁴⁵O nauru gënanga wohitemo o tau ma ago-agomo ihö hima-himanga o koreharail̄e gënanga yasadia mangale o imam-imam yomomanarama ma Jou Ai Tauoka,

⁴⁶ho, o tau ma amo-amoko ihima-himanga o koremieuku yasadia mangale o imam-imam yomomanarama o huhuba mangïoka. Mata-mata o imam gënanga kokiani o Zadok aidifauku. Hababu o Lewi ai hoanino duga-duga o Zadok aidifauku yakunu iwïhimanga ma Jou mangale iwileleani Unanga o puji magoronaka.

⁴⁷O nauru gënanga watuga o looa magoronaka. Madüku ipahagi iata: magurutu dëma ngoata moi-moi o metere moritoa. Ma Jou Ai Tau gënanga naga o wange madumuniha idaduoka, deʼ mahimangoka naga moi o huhuba mangï.

⁴⁸Ipaha ünanga wohiao ngohi o kamarika ma Jou Ai Tau mahimangoka deʼ miadoa o ngute o doko-doko muruono nagail̄e. Unanga watuga o kamari howö woha-wohama; ma amokika o metere ngimoi deʼ tumidi de mahononga, deʼ mabebeno-bebeno madateke hinoto mabirini o metere moi deʼ mahononga. Mahigili dema niraka naga moi o liate mabuturungu. O kamari mahimangoka gënanga mahirete magurutu o metere ngimoi de mangoata o metere butanga.