Read Tobelo O YEHEZKIEL 41 Bible Online

O YEHEZKIEL 41 - Tobelo bible

O YEHEZKIEL 41

¹O nauru gënanga wohiao ngohi magoronaika o kamari mahidodogoronaka, yahetongo o Ngï i Tötebi-Tebini. Unanga watuga o ngekomo maiteteke madumutu genangika: magurutu o metere hange,

²deʼ mangoata o metere motoa. O bebeno madateke hinoto mabirini o metere hinoto deʼ mahononga. Daha ünanga watuga o Ngi i Tötebi-Tebini gënanga: magurutu o metere monaoko de mangoata o metere ngimoi.

³Ipaha ünanga wongohama o kamari magoronaka. Unanga watuga o ngekomo maiteteke madumutu genangika magurutu o metere moi, mangoata o metere hange, dë mabebeno madateke hinoto mabirini o metere hange de mahononga.

⁴Daha ünanga watuga makamarö gënanga: madüku i pahagi iata, magurutu dema ngoata moi-moi o metere nginoi. Ipaha ünanga wohitemo ngohino, ”Nenanga o Ngï Duru i Tebi-Tebini.”

⁵Iboto gënanga o nauru gënanga watuga o bebeno o mehele ma Jou Ai Tau magoronaka: mabirini o metere hange. O bebeno o mehelika ma Jou Ai Tau magilolitino gënanga naga o kama-kamari mangoata o metere hinoto.

⁶O kama-kamari gënanga o lape hangeil̄e deʼ malape yogetongo naga o kamari moruange. Mabebeno o mehele maporetoka malape yogetongo iholoi ena ngaro deʼ mabebeno o mehele malape itimi-timi, hiädono o kama-kamari gënanga yakunu yodatoro yapidahua ma Jou Ai Tau mabebeno o mehele gënanga.

⁷Ma Jou Ai Tau, mabebeno o mehele maporetino gënanga holega-lega kaimatero mabirini dau de yail̄e hiädono dakuil̄e. Ma Jou Ai Tau mabebeno o mehele maporetino, o kama-kamari maporetika idaduoka gënanga, naga hinoto o ngute ma ago-agomo hiädono o nyawa yakunu yodöa malape itimi-timi de yail̄e malape hinoto de hangeil̄e.

⁸Ma kama-kamari mabebeno o mehele maporetino gënanga mabirini o metere hinoto deʼ mahononga. O bangunan gënanga toenanga mangorana madumutu o kama-kamarika ma Jou Ai Tau o koremieuku idaduoka, deʼ mangorana mahomoa madumutu makama-kamarika o koreharail̄e idaduoka. Ma Jou Ai Tau magilolitino naga o lante mangoata o metere hinoto deʼ mahononga; magogere o tonakoka de o metere hangeil̄e, deʼ yadiai imatero magurutil̄e deʼ o kama-kamari mafandasi ma Jou Ai Tau mabebeno o meheleika. O lante de o tau ma ago-agomo yapake o imam-imam, naga o gandaria mangoata o metere ngimoi, ma Jou Ai Tau ma higili de maniraka.

¹²O looa mahonongaka o wange madumuniha idaduoka, naga o bangunan ma ago-agomo magurutu o metere moruata demotoa de mangoata o metere moruange demotoa, ho deʼ mabirini hagala mabebeno o metere hinoto de mahononga.

¹³O nauru gënanga watuga ma Jou Ai Tau magurutu o metere moritoa. Ma Jou Ai Tau maporetoko idaduoka deyaino hiädono o bangunan mapako-pako maporetoko mabebeno o mehelika o wange madumuniha idaduoka gënanga ma aguru o metere moritoa.

¹⁴Ma Jou Ai Tau mahimangiha idaduoka yohö hima-himanga o wange mahiwaroko deʼ malooa mahigili de manirakoka, mangoata o metere moritoa.

¹⁵O nauru gënangö watuga o bangunan mapako-pako yohimanga o looaika o wange madumuniha: mangoata o metere moritoa, idogoika hagala mabebeno mahigili deʼ manirakoka. Ma Jou Ai Tauoka makama-kamari, o Ngï i Tebi-Tebini, de o Ngï Duru i Tebi-Tebini,

¹⁶Ihiporomu de mariwoto o gota, malanteoka deya il̄e gënanga yakunu ihitamunu de o guba.

¹⁷Mabebeno ingodumu magoronaika idadadu yaporomu de o garade-garade.

¹⁸O palem magota mautu de o dodadi o horogaino dema gogahuhuoka, o palem magota mautu moi mahidogoronaka yogetongo hinoto o dodadi o horogaino dema gogahuhuoka. O dodadi o horogaino dema gogahuhuoka gënanga toenanga mabiono hinoto,

¹⁹moi mabiono o nyawa yohimangika o palem magota mautu o higilika, de mabiono o singayo hima-himangika o palem magota mautu o nirakika. O garade-garade gënanga magogere ma Jou Ai Tau yamode-modekika,

²⁰mulaenge malanteoka deyail̄e hiädono mangorana mal̄okuil̄e.

²¹Mangorana maliate-liate o Ngï Duru i Tebi-Tebini ma düku ipahagi iata. O Ngï Duru iTebi-Tebini mahimangoka naga moi hapulo-pulono hokä o huba mangï o gotaino.

²²Magurutil̄e o metere moi de mahononga de mangoata o metere moi. Malibuku-libuku, mahohole deʼ mabebeno yadiai o gota. O nauru gënanga wohitemo ngohino, ”Nenanga o meja naga ma Jou Ai biono mahimangoka.”

²³O ngekomo maiteteke mabahaka yameta o Ngï i Tebi-tebinika naga moi o ngorana, hoko genangö o ngorana maiteteke mabahaoka madumutu o Ngï Duru i Tebi-Tebinika.

²⁴O ngora-ngorana gënanga toenanga mangorana mabebeno mahoka hinoto ihelengaika mahidogoronaka.

²⁵O Ngï i Tebi-tebini mangora-ngorana ihiporomu deʼ o garade-garade o palem magota mautu de hagala o dodadi o horogaino dema gogahuhuoka, hokä mabebeno-bebenoika. Makamari mahima-himangoka mahimangiha enagënanga maporetika i daduoka, naga o guba o gota.

²⁶Mabebeno madateke hinoto magumurukoka naga majangela, de mabebeno ihi poromu de o garade-garade o palem magota mautu.