Read Tobelo O YEHEZKIEL 42 Bible Online

O YEHEZKIEL 42 - Tobelo bible

O YEHEZKIEL 42

¹Ipaha o nauru gënanga wohiao ngohi o looa maporetika de wohituda ngohi o bangunan mahomoaika ma Jou Ai Tau o koremieuku idaduoka, ikurutikaua deʼ o bangunan ma ago-agomo ma Jou Ai Tau o wange madumuniha idaduoka gënanga.

²O tau mapako-pako gënanga magurutu o metere moritoa, deʼ mangoata o metere monaoko deʼ motoa.

³Moi madateke o bangunan gënanga ihimanga o gandariaika mangoata o metere ngimoi gënanga, ho dema dateke mahomoa yohimangika o lante o helewo o looa maporetoka. O bangunan gënanga ilape hangeil̄e; malape yogetongo iholoi iwohama magoranaika ngaro demalape itimi-timiuku.

⁴Hagala o kamari gënanga mahimangoka, magoronaika idaduoka naga o ngekomo maiteteke mangoata o metere motoa de magurutu o metere moritoa. Hagala mangorana o koremieuku yohimanguku.

⁵Hagala makamari malape il̄oku-l̄oku iholoi ieteke ngaro de hagala o kamari malape itö timi-timi hababu hagala mangekomo maiteteke hagala o kamari il̄oku-l̄oku mahimangoka gënanga iholoi iwöata ngaro de naga matimioka.

⁶Hagala o kamari gënanga ilape hangeil̄e deʼ koiwa o liate ihi tiki-tiki hokä o tau ma ago-agomo o looaoka.

⁷Mahononga malape itimi-timi, magurutu o metere monaoko demotoa marupa o bebeno o mehele dika, ma demaboloi, magurutö o metere monaoko de momotoa, ihigoko o kama-kamari. Malape duru i l̄oku-l̄okuil̄e naga o kama-kamari imahi tugauku magurutu o tau ma amo-amoko gënanga.

⁹Hagala o kamari matimioka o tau mapako-pako nënanga o wange mahiwaroko mabobahaka, de o bebeno o mehele magoauku, naga moi o ngorana madumutu o looa maporetika. Ma Jou Ai Tau o koreharail̄e madatekoka, naga o bangunan kaima rupa moi, magogere ikurutikaua deʼ o bangunan o wange madumuniha idaduoka.

¹¹Hagala o kamari mahimangoka naga moi o ngekomo maiteteke o koremieuku idaduoka. Maduduga imatero, madüku imatero de mangora-ngoranö imaketero.

¹²Hagala o kamari matimioka madatekoka o koreharail̄e, enagënanga mabarene o wange mahiwaroka o bebeno o mehele magoauku, naga o moi o ngorana.

¹³O nauru gënanga wohitemo ngohino, ”O bangunan hinoto gënanga itebini. Genangoka, o imam-imam yakunu yohimanga ma Jou Ai boa, yaol̄omo o huhuba-huhuba duru itebi-tebini. Genangokaö kokiani önanga ihigogere hagala o huhuba duru itebi-tebini, enagënanga: o huhuba o gandum de o huhuba o baradoha ma apongo ekola o rugi madagali mahuhuba.

¹⁴Nako o imam-imam iböto yomanarama ma Jou Ai Tauoka deʼ yomau yöiki malooa maporetika, done o pakeanga yodinga-dingakoka önanga yapake maöraha yaleleani o puji, kokiani önanga yamal̄a hagala o kamaroka gënanga. Onanga kokiani yapake o pakeanga mahomoa, iböto gënanga dahao önanga yakunu yöiki o kawaha imatotoomu mangïika.”

¹⁵O nauru gënanga watuga ibotino ma Jou Ai Tau mabangunan magoronaika idaduoka ünanga wohiao ngohi tohupu tanonu ngorana ma amo-amoko o wange mahiwaroko, daha watuga ma Jou Ai Tau magilolitino.

¹⁶De ai duduga o diki-diki ünanga wohituga madatekoko o wange mahiwaroko: o metere o ratuhu hinoto deʼ moritoa.

¹⁷Ipaha ünanga watuga madateke o koremieuku idaduoka, madateke o koreharail̄e idaduoka, madateke o wange madumuniha idaduoka; madateke yogetongo magurutu imaketero, enagënanga o metere o ratuhu hinoto demoritoa.

²⁰Ho, ma Jou Ai Tau madaera yakilolitino o tonaka o batingi moi ipahagi iata, maduduga o metere o ratuhu hinoto deʼ moritoa madateke yogetongo. O tonaka o batingi moi gënanga yakilolitino moi o bebeno o mehele mangale ihi kitingaka o daera ihi tinga-tingakoka mangale ma Jou de o daera mangale o kawaha.