Read Tobelo O YEHEZKIEL 45 Bible Online

O YEHEZKIEL 45 - Tobelo bible

O YEHEZKIEL 45

¹O tonaka gënanga ihikodokuuahi mangale idadi manga puhaka matonaka mangale o hoana yogetongo, kiani yatingaka o hidoku moi mangale ma Jou. O tonaka gënanga magurutu kiani o kilo ngimoi deʼ hinoto deʼ mahononga, deʼ mangoata o kilo nginoi. O daera gënanga yamode-modekika ihinyata itebini.

²Mangale ma Jou Ai Tau yasadia o tonaka gënanga o hidoku moi ipahagi iata, maduduga o metere o ratuhu hinoto de moritoa madateke yogetongo, de yakilolitino o lapanga mangoata o metere monaoko deʼ motoa deʼ genangoka kiani ihigoko ma Jou Ai Tau.

³Mahononga o tonakino gënanga, nagurutu o metere ngimoi de hinoto dë mahononga, dëma ngoata o kilo motoa kiani ya sadia mangale ihigoko ma Jou Ai Tau, enagënanga madaera duru itebi-tebini.

⁴O tonaka gënanga itebini, deʼ ya sadia mangale o imam-imam yomomanarama yaleleani o puji ma Jou Ai Tauoka. O hidoku moi o tonakino gënanga aha idadi o ngï mangale toönanga manga tau, de o hidoku moioli mangale ma Jou Ai Tau.

⁵Ma honongali o tonakino gënanga ma amoko o kilo ngimoi deʼ hinoto deʼ mahononga deʼ mangoata o kilo motoa kiani yasadia mangale hagala o Lewi manyawa yokokarajanga ma Jou Ai Tau magoronaka. Genangoka aha ihigoko hagala o kota kiaka önanga yakunu yögogere.

⁶O tonaka madebi-debini madatekoka gënanga, kiani yatingaka o tonaka o batingi moi magurutu o kilo ngimoi deʼ hinoto deʼ mahononga de mangoata o kilo hinoto deʼ mahononga, mangale moi o kota yakunu yögogere onagona dika o Israel manyawaino.

⁷Mangale yokokuaha yopopareta kokianiö yasadia o tonaka. O tonaka gënanga ihoheika mabatingi o wange ma dumuniha madaera ihitinga-tingakoka mangale ma Jou gënanga, hiädono o Ngöto iko Koronaika, deʼ mabatingi o wange mahiwaroko madaera ihito tinga-tingakika gënanga, hiädono mahiribatingi o wange mahiwaroko o berera gënanga. Ho magurutu kaimatero deʼ magurutu de o tonaka o hidoku moi ani yahidö döa-döaka o Israel manga hoanika.

⁸O tonaka gënanga idadi madutu yokokuaha yopopareta o Israel matonakoka, hupaya ünanga uha wätukuoli Ahi umati, mä wahi döaka o daera maboloi gënanga idadi madutu o Israeloka manga hoana.

⁹Ma Jou Duru woko Kurutil̄e wotemo, ”Iyaoaka hagala nia baradoha, hei niä kokokuaha o Israeloka! Nia mal̄a nia manarama nimahihininga mahö huka-huka deʼ niä tuku o kawaha gënanga. Nia diai okia madiai deʼ iadili. Ngohi o Jou Duru toko Kurutil̄e tohi pareta gënanga nginika.

¹⁰ Nia pake o didibanga deʼ o susupa madiai:

¹¹O efa moi mangale o baranga madoolenge masusupa kiani imatero madol̄a deʼ o bat moi mangale o baranga o akere masusupa. Madudungü kiani o homer moi. Ho, hagala o susupa gënanga kiani hoko nënanga: o homer moi kaimatero o efa ngimoi deʼ kaimatero o bat ngimoi.

¹²Nia didibanga kiani hoko nënanga: O syikal moi kaimatero o gera monaoko o mina moi kaimatero o syikal moributanga.

¹³Nenanga mahohole o duduga mangale nihitatapu hagala o huhuba: o gandum: o hidoku moributanga o regu moi nia gugutuku mahasilino o buapo: o hodiku moributanga o regu moi nia gugutuku mahasilino o zaitun maminya: o hidoku o ratuhu moi o regu moi hagala o gota mautuino mahasili. (O duduga imamoteke o bat: o bat ngimoi kaimatero o homer moi kaimatero o kor moi) o duba: o dutu moi o duba o dutu o ratuhu hinotoino yogetongo. Ngini kiani nihihuba o huhuba o gandum, o huhuba ituhu-tuhuku, deʼ o dame mahuhuba, hupaya hagala nia baradoha i apongo. Ngohi, o Jou Duru toko Kurutil̄e tohidö döa-döaka o pareta mangale gënanga.

¹⁶O berera manyawa yongodumu kiani yao hagala o huhuba gënanga yokokuahaika yäpopareta o Israeloka.

¹⁷Unanga kiani woija o gigini mangale o huhuba ituhu-tuhuku deʼ o bara-baranga mangale o huhuba o gandum deʼ o huhuba o angguru mangale o Israel manyawa yongodumu hagala o wange ma ago-agomoka, o Mede Ma Hungi ma Rameanga, hagala o Sabat mawange, de hagala o wange ma ago-agomo mahomoa. Unanga kiani wasadia o huhuba o baradoha ma apongo, o huhuba o gandum, o huhuba ituhu-tuhuku, deʼ o dame mahuhuba mangale yogahoko o apongo mangale o Israel manyawa.”

¹⁸Ma Jou Duru woko Kurutil̄e watemo Ai umatika, ”O wange mahira o mede mahira, ngini kiani nihi tebini Ahi Tau deʼ nihihuba o hapi manauru magö o dutu moi koiwa manabo.

¹⁹Ma imam kiani wal̄ë o awunu o huhuba o baradoha ma apongino gënanga, daha wohiehe o ngorana maloliateika Ahi Tauoka, o huhuba mangï malibuku iatikaö, dë o ngorana ma ago-agomo maliate-liateika madumutu o looaika mangoronaka.

²⁰Nia diai hoko genangoli mawange tumidoka o mede gënanga, mangale moi-moi o nyawa yobaradohaoka deʼ yohangajaua ekola karana ihiorikua. De madodagi gënanga ngini aha nio goana Ahi Tau madebini.

²¹ Mawange ngimoi deʼ iyatoka o mede mahira, ngini kiani nihimulia o Paska ma Rameanga. O wange tumidino madekana mata-mata o nyawa kiani yol̄omo o roti iragi ragiua.

²²O wange madodihiraoka, yokokuaha yopopareta kiani ihihuba o hapi manauru o dutu moi mangale o baradoha ma apongo mangale ai diri deʼ mangale o kawaha yongodumu.

²³O rameanga itagi madekanino o wange tumidi gënanga, o wange higetongo ünanga kiani wohihuba ma Jouika o hapi manauru o dutu tumidi deʼ o duba manauru o dutu tumidi koiwa manabo, daha yatuhuku ihi dodagahumika. O wange higetongo unangö kiani wohihuba o kabingi manauru o dutu moi mangale o huhuba o baradoha ma apongo.

²⁴Mahomoa deʼ gënanga, kiani wohihuba o gandum ma amoko o liter ngimoi de tumidi de mahononga mangale o hapi manauru yogetongo ikali o zaitun maminya o litere hange mangale o duba manauru yogetongo.

²⁵ O tau-tau ihikatu o Hoka-hoka ma Rameangoka, imulaenge mawange ngimoi de motoa o mede matumidi, o wange higetongo o wange tumidino madekana yokokuaha kiani ihihuba o huhuba-huhuba kaimatero, enagënanga o huhuba o baradoha ma apongo, o huhuba i tuhu-tuhuku, de o huhuba o gandum ikali o zaitun maminya.”