Read Tobelo O YEHEZKIEL 46 Bible Online

O YEHEZKIEL 46 - Tobelo bible

O YEHEZKIEL 46

¹Ma Jou Duru woko Kurutil̄e wotemo, ”O ngorana ma amo-amoko o wange mahiwaroko madumutu o looaika magoronaka kiani kahirahi ibenoino madekana o wange butanga o karajanga mawange. O ngorana ma amo-amoko gënanga duga-duga yakunu yahelenga o Sabat mawangeoka deʼ o Mede ma Hungi ma Rameangoka.

²Hagala o wange gënanga yokokuaha kiani yowohama o looa maporetoka dë yaino yanonu o kamari ma amo-amoko daha imaokoino o ngorana ma amo-amoko maliate madatekoka, hagala o imam magogiria ihihuba o huhuba ituhu-tuhuku deʼ o dame mahuhuba yakokuahaino. O ngorana ma amo-amoko gënanga ünanga kiani watilabukuku deʼ wïhuba ma Jou, daha woiki. Ipaha hiädono yohutu, o ngorana ma amo-amoko gënanga yakunua ibeno.

³O ngorana ma amo-amoko mahimangokaö gënanga, o kawaha yongodumu kiani yatilabuku iwihuba ma Jou o Sabat mawange magetongo deʼ o Mede ma Hungi ma Rameanga.

⁴O Sabat mawangeoka yokokuaha kiani ihihuba ma Jouika o huhuba ituhu-tuhuku enagënanga o duba mangohaka o dutu butanga deʼ o duba manauru o dutu moi, mata-mata koiwa naga manabo.

⁵Ihikinïki deʼ o duba manauru gënanga kiani ihihubaö o huhuba o gandum ma amoko o litere ngimoi de tumidi de mahononga, deʼ ihikinïki de o duba mangohaka yogetongo, kiani ihihuba o huhuba o gandum ma amoko imoteke manga mau. O huhuba o gandum yogetongo kiani ihikinïki deʼ o huhuba o zaitun maminya o litere hange.

⁶O Mede ma Hungi ma Rameangoka o huhuba gënanga kiani marupa o hapi manauru o dutu moi, o duba mangohaka o dutu butanga, deʼ o duba manauru o dutu moi, mata-mata koiwa manabo.

⁷Ihikinïki deʼ o hapi manauru magetongo deʼ o kabingi manauru, ünanga kiani wohihuba o gandum ma amoko o litere ngimoi dë tumidi deʼ mahononga, deʼ ihikinïki deʼ o duba mangohaka magetongo, muruono dika imamoteke manga ngigo. O huhuba o gandum yogetongo kiani ihikinïki deʼ ihihuba o zaitun maminya o litere hange.

⁸Nako yokokuaha yomau yopuji Ahi Tauoka, ünanga kiani wowohama wanonu o kamari ma amo-amoko, deʼ wolio wananu o ngekomo genangoli.

⁹Idulu yaino, nako hagala o wange ma ago-agomoko o kawaha yoboa mangale yopuji ma Jouika, done önanga yowohama yanonu o ngorana ma amo-amoko o koremieuku, yolio kiani yanonu o ngorana ma amo-amoko o koreharail̄e nako önanga yopuji ibotino. De önanga yowohama yanonu o ngorana ma amo-amoko o koreharail̄e, yolio kiani yanonu o ngorana ma amo-amoko o koremieuku. Hagala o nyawa yaduhunu yolio yatilakuru o ngekomo yanononu maöraha yowohama; önanga kiani yolio yanonu o ngekomo ma amo-amoko mahononga.

¹⁰Yokokuaha kiani yowohama ma Jou Ai Tauika imakinïki deʼ o kawaha deʼ yolioö kiani imakinïkoli.

¹¹Hagala o rameanga mawangeoka deʼ o wange ma ago-agomoka, ihikinïki o hapi manauru magetongo deʼ o duba manauru magetongo kiani ihihuba o gandum ma amo-amoko o litere ngimoi deʼ tumidi de mahononga, deʼ ihikinïki deʼ o duba mangohaka yogetongo muruono dika imamoteke manga igo o nyawa yopö puji-puji. O huhuba o gandum yogetongo kiani ihikinïki de ihihuba o zaitun maminya o litere hange.

¹²Nako yokokuaha yoigo ihidöaka o huhuba o hininga maguwinoka ma Jouika, yaoa marupa o huhuba ituhu-tuhuku, yaoa o dame mahuhuba, done o ngorana ma amo-amoko o wange mahiwaroko madumutu o looaika magoronaka kiani yahelenga mangale ünanga. Unanga kiani wohihuba o huhuba gënanga deʼ madodagi kaimatero hokä yadodiai o Sabat mawangeoka, mä de ma japatioka ünanga wolio ibotino, o ngorana ma amo-amoko gënanga kiani yabenooli.”

¹³Ma Jou wohitemo, ”O wange ihigetongo maöraha o ngoru-ngorumino, o duba mangohaka o dutu moi maumuru o taongo moi deʼ koiwa manabo kiani ihihuba mangale o huhuba ituhu-tuhuku ma Jouika.

¹⁴Mahomoa deʼ gënanga, o ngorumino magetongo kiani ihihubaö o gandum o kilo hinoto deʼ o zaitun maminya o litere moi mangale ihiganu deʼ o gandum gënanga. Genangala o huhuba o gandum o wange ihigetongo kiani ihihuba ma Jouika; o datoro gënanga idadi mangale kahi ado-adonika.

¹⁵O ngorumino magetongo, kiani salalu ihihuba ma Jouika: o duba mangohaka o dutu moi, o huhuba o gandum de o zaitun maminya.”

¹⁶Ma Jou Duru woko Kurutil̄e wohidöaka o pareta, wato, ”Nako yokokuaha yopopareta yahidöaka o tonaka manga puhakaino o batingi moi aingohaka o naurika o tonaka gënanga idadi aingohaka o nauru madutu, de marupa o tau manyawa manga arata.

¹⁷ Mä nako wokokuaha gënanga ihidöaka ai puhakaino matonaka o batingi moi ai gilaongika womatengo, o tonaka gënanga aha ilio idadi wokokuaha madutu o Higilio ma Taongoka gënanga. O tonaka gënanga ganga toünanga madutu deʼ duga-duga ünanga deʼ ai ngoha-ngohaka o nauru dika yakunu gila-gila yapake.

¹⁸Wo kokuaha gënanga yakunua wal̄ë mahuhutulö ai kawaha manga puhaka ma arataino. Duga-duga ai tonaka mahirete yakunu wahidöaka aingoha-ngohaka o naurika hiädono moiua o Ahi umatino yakunu yahikitingaka manga haku madutu.”

¹⁹Ipaha o nauru gënanga wohiao ngohi tanonu o ngorana madatekoka o ngorana ma amo-amoko, hagala o kamari itebi-tebinika yohimanguku o koremieuku. Hagala o kamari gënanga yasadia mangale o imam-imam. O nauru gënanga wohihidumutu o kamarika mabobahaoka o wange madumuniha idaduoka,

²⁰deʼ wotemo, ”O ngïoka nënanga o imam kiani yabö boho-bohoko o huhuba o baradoha ma apongo deʼ o huhuba o rugi madagali ikali ya l̄ofo o huhuba o gandum, hupaya mahuhutulö o huhuba madebi-debinino gënanga yaoua o looaika maporetoka hiädono yahibodito o kawaha.”

²¹Ipaha ngohi wohiao o looaika maporetoka deʼ wohihimatoko ngohino malibuku iatoka, moi-moi naga o looa iholoi ieteke, magurutu o metere monaoko deʼ mangoata o metere ngimoi de motoa.

²³Malooa yogetongo gënanga yakilolitino o bebeno o mehele o helewo, o bebeno o mehelika gënanga naga hagala o rikana.

²⁴O nauru gënanga wohitemo ngohino, ”Nenangala hagala yohohakai manga ngï ma Jou Ai Tau yolö leleani yabohoko hagala o huhuba ihihö huba-huba o kawaha manga huhuba.”