Read Tobelo O YEHEZKIEL 47 Bible Online

O YEHEZKIEL 47 - Tobelo bible

O YEHEZKIEL 47

¹ O nauru gënanga wohi aooli ngohi ma Jou Ai Tau mangorana howoha-wohamika. Tamake o akere ihahuru o ngorana matimiil̄e gënanga mameta o wange mahiwaroka, hokä ma Jou Ai Tau yohimangoko o wange mahiwaroko. O akere gënanga ihahuru ma Jou ai Tau mangorana ma amo-amoko matimil̄e o koreharail̄e idaduoka yanonu madateke o koreharail̄e o huhuba mangï ino.

²Ipaha o nauru gënanga wohiao ngohi wohihihupu mia tilakuru o ngorana ma amo-amoko o koremieuku deʼ wohituda ngohi o ngorana ma amo-amokika o wange mahiwaroko. O ngairi maiteteke gënanga ihahuru o ngorana ma amo-amoko o koreharail̄e madatekino gënanga.

³Daha watuga deʼ ai duduga o diki-diki, o nauru gënanga wohiao ngohi mianïki o ngairi mahahuru gënanga o wange mahiwaroko magurutika o metere o ratuhu motoa, daha wohihuloko ngohi totobongo. O ngïoka gënanga duga-duga maluku nanga pupungino.

⁴Ipaha ünanga watuga o metere o ratuhu motoaoli, deʼ genangoka ma akere hiädono manga bukuino. Unanga watuga o metere o ratuhu motoaoli, dë ma akere hiädono nanga goronaino.

⁵Wohigalioli ünanga watuga magurutika o metere o ratuhu motoa, de genangoka ma akere ilukuholi mangale hödobongo. Nako o nyawa yomau yodobongo kiani önanga kayodiboko.

⁶Daha o nyawa gënanga wato ngohino, ”Hei o nyawa nokokakaliua, matailako mata-mata nënanga nohidodiai.” Ipaha ünanga wohiaooli ngohi mia igoriha o ngairi,

⁷deʼ ngohi tamake madateke hinoto o ngairi gënanga naga duru Kohangöe o gota mautu.

⁸Unanga wohitemo ngohino, ”O ngairi nënanga ihahuru o wange mahiwaroko yatilakuru o berera nënanga dë yatilakuru o Yordan ma Ngairi ma Wai madumutu o Honenge ma Ngötika; Nako ma akere imahiadono o Honenge ma Ngöto magoronaika done o ngöto ma akere magahi-gahi gënanga yatagali deʼ o akere ma ake-akere.

⁹Kiaikaö o ngairi nënanga ihahuru, genangokaoli aha hamake hagala rupa o nawoko deʼ o aiwani mahomoa. O Honenge ma Ngöto ma akere aha yadiai idadi iakere, deʼ okiaikaö o akere gënanga ihahuru, genangoka aha naga o wowango.

¹⁰Hagala matitino o En-Gedioka ma akere hiädono hagala matitiika o akere o En-Eglaimoka, madate-datekino aha irame dëo nawoko yotago-tagoko yongöere toönanga manga jä genangoka. Hagala irupa o nawoko aha naga o akere gënanga magoronaka, hokä naga o Ngöto ikokorona magoronaka.

¹¹Mä o akere o lepa-lepaoka deo wayamatoka o hohana magurutu gënanga aha idadi iakerua, mä kahirahi marupa o gahi matiti.

¹² O ngairi madateke hinoto magurutu gënanga yongango hagala rupa o hohoko magota mautu. O gota mautu mahoka gënanga komaiwahi ima ai, de hagala mahohoko komaiwahi i mata. Hagala o gota mautu gënanga aha ihihasili hagala o hohoko mahungi o mede ihigetongo, hababu o akere ihi ngeko-ngekomo ihahuru ma Jou Ai Tauino. Hagala mahohoko idadi o inomo deʼ hagala mahoka ibaraguna mangale o houru.”

¹³Ma Jou Duru woko Kurutil̄e wotemo, ”Nenanga mabati-batingi o tonaka aha yahikodoku o Israel manga hoana ngimoi de hinotoika. O Yusuf aihöana yatarima o hidoku hinoto.

¹⁴Ngohi tokobotoka o tonaka gënanga aha Tahidöaka nia ete deʼ nia tohoraika. Hababu gënanga, nia l̄ë o tonaka gënanga deʼ nihikodoku deʼ ma adili ngini niahidogoronaka.

¹⁵Ma hiribatingi o koremieuku idaduoka imulaenge o Ngöto i Kokorona deyaino madumutu o wange mahiwaroko hiädono o Hetlon makotaika, mameta o Hamatika, gila-gila o Zedad makotaika,

¹⁶O Berotaika deʼ o Sibraim (hagala o kota gënanga magogere o Damsyik makota deʼ o Hamat makota mahidogoronaka), ipaha o Hazar-Enan makotaika, maribatingoka o Hauran makota.

¹⁷Ho, maribatingi o koremieuku idaduoka imulaenge o Ngöto i Kokorona hiädono o wange mahiwaroko, o Hazar-Enan makotaika; done o Damsyik madaera deʼ o Hamat naga maribatingi gënanga o koremieuku idaduoka.

¹⁸Maribatingi o wange mahiwaroko idaduoka madumutu o koreharail̄e, o ngï moioka deyaino o Damsyik madaera de o Hauran madaera mahidogoronaka. Ho, o Yordan ma Ngairi marupa mabatingi o Israel manga tonaka o wange madumuniha idaduoka de o Gilead o wange mahiwaroko idaduoka mahidogorona, hiädono o Tamarika o Honenge ma Ngöto mahohanoka.

¹⁹Mahiribatingi o koreharail̄e idaduoka madumutu o wange madumuniha o koreharail̄e idaduoka, o Tamar de yaino o Kades-Meriba majobubuika, daha o ngöto o wange madumuniha magurutika maribatingi o Mesir hiädono o Ngöto i Kokorona.

²⁰Maribatingi o wange madumuniha yanïki madüku o Ngöto i Kokorona, daha madumutu o koremieuku o ngï moika o wange madumuniha idaduoka o ngekomo howoha-wohama o Hamatika.

²¹Nihikodoku o tonaka gënanga ngini nia hidogoronaka, imamoteke o Israeloka manga hoa-hoana;

²²deʼ o tonaka gënanga ganga tingini madutu mangale kahi ado-adonika. Hagala o nyawa maporetino yotatapu yogogere nia hidogoronaka, deʼ toönanga manga ngoha-ngohaka imakil̄au genangoka, kianiö yamake o hidoku o tonakino. Onanga kiani niä pulono hokä o Israel manga hoanino manyawa madutu, deʼ önanga kiani yonïki youndi mangale yamake o tonaka maöraha yodiai o tonaka imahikodoku o Israel manga hoana mahidogoronaka.

²³O nyawa maporetino moi-moi kiani yahidöaka o tonaka kamamoi o Israeloka manyawa kiaka ünanga wogogere. Ngohi o Jou Duru toko Kurutil̄e to temoka.”