Read Tobelo O YEHEZKIEL 5 Bible Online

O YEHEZKIEL 5 - Tobelo bible

O YEHEZKIEL 5

¹Ma Jou wotemo, ”Hei o nyawa nokokakaliua, nal̄e o oworo idoto-doto deʼ napake gënanga mangale nohikori ani parahi de ani tadauru namata-mataoka. Ipaha natibanga o tadauru gënanga o didibangoka daha naregu idadi o regu hange.

²O hidoku moi iregu hange o regu moi kiani natuhuku o kota gënanga mahidödogoronaka nohigiloliti ipaha ibotino. O hidoku moi o regu hange o regu moi nohi topokika de ani oworo daha nohigiloliti o kota gënanga. Deʼ o hidoku moi o regu hange o regu moi mabobahaoka kiani nohi barihi o gitawail̄e, daha Ngohi aha taginïki de Ahi oworo.

³Namal̄aika mahuhutulu anitadaurino gënanga deʼ nahawoino ani juba madupukoro magoronaka.

⁴Ipaha nal̄e mahuhutuloli anitadauruini gënanga, nohikaweli o uku magoronaika deʼ namal̄aika yöuku. Genangino o uku aha itahe o Israel manyawa yämode-modekika.”

⁵Ma Jou Duru woko Kukurutil̄e wotemo, ”Nolega, nënanga o Yerusalem. O kota nënanga Tohigogere o dunia matitioka, de hagala o negara mahomoa yakokilolitino.

⁶Mä o Yerusalem yätilaka Ahi pareta deʼ inyata iholoi itorou ngaro de o hoana deo berera ma ago-agomo mahomoa, ikali i holoi koiwa manga hingounu ngaro de hagala o negara yakokilolitino. O Yerusalem yatilakuru hagala Ahi pareta deʼ yoluku ihi ngounu hagala Ahi tita.”

⁷Ma Jou Duru woko Kurutil̄e wotemo, ”Hei Yerusalem, noihene! Ngona nohi ngounua hagala Ahi pareta deʼ hagala Ahi tita; ngona iholoi notomotekua ngaro de o hoana deo berera ma ago-agomo mahomoa ini higilolitino, deʼ nanikoka hagala manga adati o hoana deo berera ma ago-agomo gënanga.

⁸Done Ngohi, o Jou Duru tokö Kurutil̄e, ihinyata Ngohi ganga ani haturu. Ngona aha toni hukumu hagala o hoana deo berera ma ago-agomo mahomoa manga himangoka.

⁹Karana hagala ani manarama Todoha-dohata, ani nyawa aha Ta hukumu kohagiria komaiwahi Tadiai deʼ aha Tadiaiokauaoli.

¹⁰ Manga dimono aha ya ol̄omo manga ngohaka mahirete deʼ manga ngohaka aha yaol̄omo manga dimono. Hoko gënanga önanga Tahukumu, deʼ yowango-wangohi aha Tahikabarihi hagala okiaika honanga.

¹¹Ngohi ganga ma Jou Madutu towango-wango, o Jou Duru tokö Kurutil̄e, deʼ nënanga Ahi demo: Karana ngona napesekoka Ahi Tau de hagala ani manarama itotorou deʼ haemo-emono, Ngohi aha toni wedere ngona koiwa ma apongo.

¹²Ani nyawa o regu hange o regu moi aha yohonenge karana o panyake o bobaku ikali o huha o habirokata yaparono o kota. O hidoku hange o hidoku moi aha yätoma de o oworo o kota maporetoka, deʼ o hidoku hange o hidoku moioli aha Tahibarihi hagala okiaika honanga deʼ aha Tahiginïki de o oworo.

¹³Ngona aha namao magiria Ahi gangamo deʼ Ahi hininga mahauku hiädono Tamao iyaoaka. Mata-mata gënanga idadi ibotino, ngona aha nongaku Ngohi, o Jou, totemooka ngonaika karana Ngohi tongamo mangale ani satiaua.

¹⁴Ngona aha nodadi kaani gilianga mata-mata deʼ o hoana deo berera maago-agomo inihigogilolitino aha inihohedu ngona; moi-moi o nyawa yakaino aha imahikurutika de ngona.

¹⁵Nako Ngohi ihi tohata deʼ duru toningamo ngonaika ikali Tonihukumu, mata-mata o hoana deo berera inikokilolitino aha yamao yaporohono. Onanga ini make aha ini hohedu deʼ yatokä yowunanga.

¹⁶Ngohi aha tabinaha nia inomo niasosadiauku deʼ Tamal̄aika ani nyawa yahahini. Onanga aha yamao manga hininga yohiri yamao yahahini, hokä o toimi madoto madoto-doto initotara deʼ inibinaha ngona.

¹⁷ Mahomoa de o balä o habirokata aha Tohiboa o panyake o bobaku, mahayanga koiwa deʼ o parangi mangale yätoma ani nyawa, deʼ hagala o aiwani ihohatera mangale yätoma toönanga manga ngoha-ngohaka. Ngohi, o Jou, totö temo-temoka.”