Read Tobelo O YEHEZKIEL 7 Bible Online

O YEHEZKIEL 7 - Tobelo bible

O YEHEZKIEL 7

¹Ma Jou wohitemo ngohino,

²”Hei o nyawa nokokakaliua, Ngohi, o Jou Duru toko Kurutil̄e, tomau tahetongo nënanga o Israel manga tonakika: Nenanga majarita mabobaha o berera nënanga ingodumu!”

³Ma Jou wotemo, ”Hei Israel, öraha nënanga iboaoka ani hibobaha. Ngona aha namao Ahi muruka. Ngona Toni juru hakimi imamoteke de ani manarama itotorou.

⁴Ngohi aha tonïdoraua ekola tonihidöaka o apongo ngonaika. Ngohi aha toni hukumu ngona imamoteke de hagala ani dorou nadodiaioka. Done ngona nohiöriki Ngohi ma Jou.”

⁵Nenanga wotö temo-temooka ma Jou Duru woko Kurutil̄e o Israel manyawaika, ”Obodito tagali o bodito aha inïtapal̄u ngini.

⁶Oraha nënanga hagala moi-moi ipahaka. Nenanga ani hibobaha. Koiwakali o nganono ngonaika.

⁷Hagala moi-moi ipahaka ngonaika, hei o hoana deo berera nigogogere o tonakoka nënanga. Oraha nënanga koiwakaoli hagala o rameanga hagala o huhuba mangï de mal̄oku-l̄okuoka, nanaga duga-duga kai ruaeuku dika.

⁸Itedekanokauaoli ngini aha niamao Ahi muruka niomodo-modongo. Ngini Tini juru hakimi imamoteke de niamanarama. Aha Tabalahi nginika hagala nia manarama itotorou.

⁹Ngohi aha tinï doraua ekola tinihidöaka o apongo nginika. Ngohi aha tinï hukumu ngini imamoteke de hagala niadorou ngini nia dödodiaioka. Done ngini nihiöriki Ngohi o Jou deʼ Ngohi tinï huku-hukumu ngini.”

¹⁰O bodito mawange mangale o Israeloka manyawa iboaka. Imateke dobuturungu kaitaurika. O edenge yadono matubuil̄e.

¹¹O hayanga koiwa mahasili iholoi iwöe o dorou. Mata-mata toönanga manga kaya, manga mulia deʼ manga utumu aha imata koiwa mario.

¹²Maöraha de majapati iboa, mawange itigioka! Yoija-ija deʼ yohuku-hukunu okia-kiaua yamake o utumu, hababu ma Jou Madutu ai hukumanga aha yatapal̄u mata-mata o nyawa.

¹³Koiwa womahuku-hukunu aha wakunu wakiliooli okia wahuku-hukunoka, hababu ma Jou Madutu Ai muruka yatapal̄u o nagona dika. O nyawa madorou aha yohalamatua.

¹⁴O trompet mailingi deʼ mata-mata o nyawa kaimahidodiai. Mä moiuaö imagoraka o parangi mangï ika, hababu ma Jou Madutu ai muruka yatapal̄u o nyawa mata-mata.

¹⁵O kota mangeko-ngekomo naga o parangi, o tau-tauoka naga o panyake o bobaku deʼ o habirokata. O nagona dika naga o kota maporetoka aha yohonenge o parangi magoronaka, deʼ yogögogere o kotaoka aha idadi o panyake deʼ o habirokata ihihonenge.

¹⁶O hidoku moi aha yo otana deʼ ihi oara manga diri o l̄oku mabuturungika. Genangokadau önanga aha hokä o namodara o wai-waioka de yaduhu; mata-mata aha yotaiana karana toönanga manga baradoha.

¹⁷O nyawa moi-moi aha idadi yabole manga giama deʼ manga buku ihahara.

¹⁸Onanga aha imahinoa o pakeanga o karongo deʼ manga röehe ingodumu aha ihahara. Toönanga manga häeke aha yapalala deʼ önanga yahimal̄eke.

¹⁹O gurasi deʼ o haaka aha önanga yaumo o ngekomoka hokä o wal̄e, hababu ma Jou Ai wangeoka Ai gangamo iharabaka, o gurasi deʼ o haaka gënanga yakunua yahihalamati önanga, makoaholi yodiodakoka önanga o baradoha magoronauku. Onanga yakunua ihipake mangale ihiaiki manga nahihu ekola ihidol̄a toönanga manga mamata.

²⁰Mahira önanga manga hininga ilamoko toönanga manga intan de manga folori mahohailoaika, mä karana önanga yapake mangale yadiai hagala o gomanga haö emo-emono, ma Jou wadiai toönanga manga arata gënanga okianaga moi höboborohono.

²¹Ma Jou watemo o Israel manyawaika, ”Ngohi aha tämal̄aika hagala o nyawa maporetino inï ora ngini. Hagala o nyawa madorou aha inï ora nia arata deʼ yapeseke.

²²Ngohi aha torigaoua nako Ahi Tau yakilianga deʼ yapeseke mangale yaö ora-ora.

²³O berera yamode-modekika idadi iruaeuku; kiaoka honanga naga o doma dema hayanga koiwa.

²⁴O hoana deo berera ma ago-agomo duru yohohatera aha Ta dotao mangale yögogere hagala nia tau. Nia nyawa yobobarani duru yopoputurungu aha yohahara nako o hoana deo berera ma ago-agomo gënanga Tamal̄aika yawedere hagala nia puji mangï.

²⁵Onanga yatapal̄u o hininga mahuha deʼ manga nganono itoaka, daha yolingiri o dame, mä yamakeua.

²⁶O bodito deʼ o abari madorou aha iboa itoa-toakua. Ngini aha nigahoko hupaya o nabi-nabi yomau ihi ngahu idadadiuahi, mä önanga yakunua. O imam-imamö manga kia-kiaua mangale yahidotoko o umatika, deʼ hagala o tutuda imataka manga nasihati.

²⁷Ma koano aha wododora, makoano aingohaka o nauru aha wi tagali ai ama ai nganono itöaka deʼ o kawaha aha yohawana yohaharoka. Ngohi aha tinï hukumu ngini imamoteke de hagala nia manarama deʼ tinïjuru hakimi ngini hokä ngini nia juru hakimi o nyawa mahomoa. Done nihiöriki ngini Ngohila ma Jou.”