Read Tobelo O YEHEZKIEL 8 Bible Online

O YEHEZKIEL 8 - Tobelo bible

O YEHEZKIEL 8

¹O wange mamotoaka o mede mabutanga o taongo mabutanga magoronaka maöraha ngomi imitabuanga, o Yahudi manyawa yatotabuanga manga tutuda-tutuda yoboa ahi tauino deʼ mima gogogere dede ngohi. Itodokanino ma Jou Duru woko Kurutil̄e ai kuata ihikuaha ngohi.

² Ngohi tomamataga de tamake okianaga moi imahirupa o nyawa. Magoronaino de ihikauku ënanga hapulo-pulono hokä o uku, deʼ magoronaino de ihi kail̄e ënanga mamoleletongo hokä o tabaga de o hori hohiganuino mahaëkoka.

³Enanga itoakika okianaga moi imahirupa o giama daha yautukika ahi tadauru. Ipaha ololega gënanga magoronaka, ngohi ihi goraka magurutil̄e o gitaoail̄e, mangale ma Jou Madutu Ai womaha de ihiao ma Jou Madutu Ai Tauika o Yerusalemoka, mangoranika howö woha-wohama malooa magoronaka o koremieuku idaduka. Genangoka naga o gomanga madulada yamö momikoka ma Jou Madutu Ai muruka.

⁴ Daha ngohi tahakihi o dararono iloleletongo ihi nonako o Israeloka manga Jou Madutu Ai boa, hokä ngohi tamake maöraha ngohi naga o Kebar ma Ngairi madatekoka.

⁵Ma Jou Madutu wohitemo ngohino, ”Hei o nyawa nokokakaliua, napulono mameta o koremieuku.” Ngohi tohimoteke, de ohuba mangï mahonongaka o ngekomo howö woha-wohama madatekoka, tamake ogomanga yamö momikoka ma Jou Madutu gënanga Ai muruka.

⁶Ma Jou Madutu wohitemo ngohino, ”Hei o nyawa nokokakaliua, namake okia magogiria idadi? Natailako nohidodiai hagala manga manarama haemo-emono o Israeloka manyawa yadödodiai, ihihi kurutika Ngohi de Ahi Tau! Naino, aha Tonihidumutu ngonaika hagala o hali iholoioli itorou.”

⁷Daha ihiao ngohi o looa maporetoka howoha-wohama mangoranika de wohihimatoko moi o pidaha o bebeno o meheloka.

⁸Wotemo, ”Hei o nyawa nokokakaliua, naamoko o pidaha nënanga.” Tadiai ibötino, tamake moi o ngorana.

⁹Wohitemo ngohino, ”Nowohama deʼ nolega hagala manga manarama ipese-peseke deʼ haemo-emono önanga yadiaioka genangoka.”

¹⁰Ngohiö towohama deʼ tamake. Hagala o bebeno o mehele o kamaroka gënanga yoduladaika deʼ hagala rupa o dodiha deʼ hagala o aiwani ihoharamu mahomoa, irupa-rupa o gomanga madulada yapö puji-puji o Israeloka manyawa.

¹¹O Israeloka manyawa manga tutuda yamoritumidi naga genangoka, wodogoika o Yaazanya o Safan aingohaka. Moi-moi imahi jöika moi o dupa manofo ikokapupu.

¹²Ma Jou Madutu wohitemo ngohino, ”Hei o nyawa nokokakaliua, namake okia yadodiai o Israeloka manga tutuda-tutuda deʼ kaimahibongonika? Onanga yapuji o kamari magoronaka iomanga o gomanga deʼ ihihababuino Ngohi tamal̄aka o berera nënanga deʼ Ta makeua toönanga manga manarama.”

¹³Daha ma Jou wohitemo ngohino, ”Ngona aha nämake önanga yamanarama o hali iholoi haemonoli.”

¹⁴Done wohiao ngohi o ngorana ma amo-amokika ma Jou Ai Tau o koremieuku deʼ wohihimatoko ngohino o ngongoheka yododora o Tamus magikiri ihonenge.

¹⁵Ma Jou wohileha ngohino, ”Hei o nyawa nokokakaliua, namake o hali gënanga? Mangoëohioli duru haemo-emono.”

¹⁶Wohiao ngohi o looa doka magoronaika ma Jou Ai Tauoka. O ngorana howoha-wohama o ngï itebi-tebinika madatekoka, o huba mangï deʼ o ngekomo maiteteke mahi dogoronaka, naga o nyawa yamonaoko deʼ yamotoa. Onanga yöporetika o ngï itebi-tebini, deʼ yatilabukuku manga himanga o wange mahiwaroko yahuba o wange malako ibö boa-boail̄e.

¹⁷Ma Jou wohitemo ngohino, ”Hei o nyawa nokokakaliua namake gënanga? Hagala o Yehuda manyawa nënanga yogihounua nako duga-duga yadiai hagala o hali haemo-emono gënanga deʼ yadiai o jojobo-jojobo ipatu-patutua imahi kokanyawa o berera yamode-modekika. Onanga koaholi yadiai mata-mata gënanga nenangokadau, Ahi Tau magoronaka deʼ ihidiai Ngohi iholoi ihi tohatoli. Nä make sarakia önanga ihihikauku Ngohi deʼ madodagi duru ipese-peseke nënanga!

¹⁸Onanga aha yamao Ahi muruka yoboborohono! Ngohi aha tahi maafua deʼ Tahiapongua önanga. Ngaroka önanga ihiboa-boaka manga niata Ngohino deʼ yakua-kuatil̄e, Ngohi toluku toihene!”