Read Tobelo O YEHEZKIEL 9 Bible Online

O YEHEZKIEL 9 - Tobelo bible

O YEHEZKIEL 9

¹Ipaha ngohi toihene Ma Jou Madutu wopoaka, ”Niaino nenangino hei hagala o nyawa aha nihidö dagi-dagi Ahi hukumanga mangale o kota nënanga. Niao hagala nia dae.”

²Imakutuonika yohupu o nyawa yabutanga o ngorana ma amo-amoko maporetoka ma Jou Ai Tau o Koremieuku idaduoka, moi-moi imagao o dae. Imakinïki dede önanga naga o nyawa imahipakeanga o lenan imagaoino okia honanga ihituli-tulihi. Onanga yowohama de imaokoino o huhuba mangï o tabaga imaganu de o hori madatekoka.

³Daha sahaya maloleletongo ihi nonako o Israeloka manga Jou Madutu aiboa, ihoropu o dodadi o horogaino de magogahuhuokaino daha imatururu mangï madodihiraka gënanga deʼ yaino ma Jou Ai Tau howoha-wohama mangoranika. Done ma Jou wä ahoko imahi popakeanga o lenan gënanga, wato,

⁴ ”Nioki hagala o kota deʼ nänonako o nyawa moi-moi manga bimaoaoko yamö mao-mao manga hininga iduka deʼ ihuha karana mata-mata manga manarama haemo-emono yadodiai o kotaka gënanga.”

⁵Ngohi toihene ma Jou Madutu wätemo hagala o nyawa mahomoaika, ”Niwi nïki ünanga hagala o kota malibukuika deʼ niatoma o nyawa moi-moi koiwa ma apongo.

⁶Nia toma mata-mata onau-nauru deʼ o ngongoheka, yatotimono deʼ yogögö, o balu-baluhu deʼ o ngoha-ngohaka. Mä uha nia tigi, kaimatengö mä naga o nonako manga bimaoaoko. Mulaenge nenangoka, Ahi Tauoka deʼ yaika.” Done önanga yamulaenge toönanga manga manarama deʼ yätoma o Israeloka manga tutuda-tutuda magogiria imaokoino ma Jou Ai Tauoka.

⁷Ma Jou Madutu wätemo onangika, ”Nia peseke Ahi Tau nënanga! Hagala malooa iomanga deʼ o mayeti-mayeti. Mulaenge!” Done onangö mulaenge yätoma hagala o kota magoronaka.

⁸O doma itagi madekanino gënanga, ngohi naga genangoka toma tengoka. Ngohi tatilabukuku deʼ topoaka, ”Jou nokokurutil̄e, hoko gënanga Ngona ani dohata o Yerusalemika hiädono nomau Nätoma mata-mata o nyawa kanagahi o Israelokaka nënanga?”

⁹Ma Jou Madutu wohaluhu, ”Hagala o Israeloka deʼ Yehuda manyawa yodiaioka obaradoha duru kohä amoko. Onanga yodiai o doma hagala o ngïoka, deʼ o Yerusalem yapeseke deʼ o dorou. Onanga yato Ngohi tamal̄aka o berera nënanga hiädono takunua tamake toönanga manga manarama.

¹⁰Ngohi aha tadoraua önanga. Aha Tadiai onangika okia önanga yadodiai o nyawa mahomoaika.”

¹¹Ipaha o nyawa wapö pake-pake o pakeanga o lenan gënanga womaidulu de wohingahu ma Jouika, wato, ”Hagala ma Jou Ai pareta miadiaioka.”