Read Tobelo O DANIEL 1 Bible Online

O DANIEL 1 - Tobelo bible

O DANIEL 1

¹ O taongo hange ipalaika ma koano Yoyakim woparetaka o Yehuda o taongo hange, o Nebukadnezar o Babel manga koano, waparangi o Yerusalem makotaika deʼ wohigilolitoka.

² Ma Jou wohigumal̄a ünanga wïutumu ma koano Yoyakim deʼ waora ohidoku moi o bara-baranga dema ija-ijaka Ma Jou ai Tau oka. Hegala o nyawa wä tago-tagokino, ünanga wäao aigikiri ma pupuji matauika o Babeloka, de hagala o bara-baranga dema ija-ijaka waora-oraino, wa gogono aigikiri mapupuji ma tau ma gudang gënanga magoronaika.

³Deipaha ma koano wihipareta o Aspenas, o kadato ma tau ma dol̄a manga baluhu, la wäiriki manga hidogoronaino o Israel manyawa yototabuangino, yamuruono naga o gogoduru, o kokoano manga difauku ekola o nyawa yomomulia manga awunu difauku.

⁴Onanga kokiani o gogoduru manga roehe mabodito koiwa. Onanga kokiani yokaramata, yohakola ikurutil̄e, Yosawaro deʼ manga ganako iwatika iwöe de inoli yopatutu mangale yomanarama o kadatoka magonaka. O Aspenas kokiani wädotoko önanga yo basa deʼ yotulihi o Babel oka manga demo.

⁵Ma koana wohitantuoli manga inomo deʼ manga ngokere la önanga kokiani imaketero deʼ yahidia dema koano aitau madol̄a mayawa. Iboto o täongo hange madekana yädotoko yahibiaha dei botoönanga kokiani iwïhimanga ma koano mangale yomanarama o kadatoka.

⁶O gogoduru manga hidogotonaka gënanga nagao o Daniel, o Hananya, o Misael de o Azarya, mata-mata o Yehuda aihoanino.

⁷O kadato ma tau madol̄a manga haeke watagali toönanga manga roma-romanga idadi: O Beltsazar, Sadrakh, Mesakh de o Abednego.

⁸De Ma Jou Madutu airoriwo Daniel, o Aspenas wïhayanga dewï aora o Daniel. O Daniel de aihininga magahumu mangale wapesekua aidiri deo inomo deo angguru ma koano aikadatoino, hababu gënanga ünanga wogahako o Aspenasika hupaya yakunu wamake o inomo mahomoa.

¹⁰Karana wïmodongo ma koanoika, o Aspenas wïtemo, ”Ma koano mahirete wohitatapuoka ani ngolomo deʼ aningokere, hoʼ nako imoteke aidamake ngona woni make i kuranga notumuloa deo gogoduru mahomoa, maraioka ngohi aha wohitoma.”

¹¹Deipaha o Daniel ima tatoro hiade-ade o hali gënanga dewä goa-goana wihiparetaka o Aspenas la wahidailako o Daniel deʼ aidodiawo yaruange. Wato o Daniel,

¹²”Numiuji nohitaili ngomi o wange ngimoi madekana; nomihidoaka ngomi hidöaka duga-duga o gauku deʼ o akere mangale miangol̄omo deʼ miangokere.

¹³Ipaha o wange ngimoi deipaha, nohitero-tero tongomi miarupa de o gogoduru manga rupa yaol̄o-ol̄omo o inomo wohi totatapuoka ma koano, daha nal̄e maputuhu imoteke anilolegaka gënanga.”

¹⁴Wä goa-goana gënanga wohimoteke deʼ wadiai wa soka wo hitaili gënanga o wange ngimoi ma dekana.

¹⁵Maöraha gënanga dei mata ka, önanga yäpulo-pulono iholoi yotumuloa deʼ yokuata ngaro de mata-mata o gogoduru yamömake-make o inomo ma koano aimejaino.

¹⁶Genangoka de yaino wägoa-goano gënanga wahidiai hidoakokaua onangika o inomo deʼ o akere wohitötantu ma koano, mä duga-duga o gau-gauku deʼ o akere dika.

¹⁷Ma Jou Madutu wahidöaka o goduru yaruatika gënanga o barija deʼ duru yo sawaro o bahasa ya tuli-tulihi magoronaka deʼ o ganako. Mahomoa de gënanga iwihidoakali o Danielika o sawaro mangale wohitararono yamö make-make deʼ mananere.

¹⁸Mahibobahaka o taongo hange maöraha imä dotoko ma koano wohitötantuoka gënanga, o Aspenas waao o gogoduru gënanga mata-mata iwïhimanga ma koano Nebukadnezar.

¹⁹Ipaha ima koke leha dede önanga mata-mata dei boto, ma koano wämake o Daniel, o Hananya, o Mesael de o Azarya yoholoi demahomoa, hagala o hali mamanarama magoronaka. Daha önanga yomulaenge yomanarama ma koano aikadato magoronaka.

²⁰Wohigeto-getongo ma koano wohidöaka o leleha ipöparalu o hitararono deʼ o dibanga, ünanga wamake goduru yaruata gënanga manga nasihati deʼ manga damake i holoi yaoa ihigali mangimoi ngaroko mata-mata manga nasehati deʼ manga damake ihingöngahu-ngahu o kianaga aha idädadi inoli duru yososawaro yomatara aipopareta yamode-modekika.

²¹O Daniel kahirahi womanarama o kadatoka hiadono ma koano Kores o Persiaino wahoninaga o Babel.