Read Tobelo O DANIEL 10 Bible Online

O DANIEL 10 - Tobelo bible

O DANIEL 10

¹O taongo mahangeoka aipareta o Kores ma koano mangale Persia, aipopareta, moi o behehongo ihinyata o Danielika ekola o Beltsazar. O behehongo gënanga itiai, mä duru ihuha mangale yomangarati. Maöraha ihidailako yamangarati o Daniel watarima o hitararono mangale o behehongo gënanga toënanga mamangarati moi o lolega magoronaka.

²Oraha gënanga magogiria ngohi tohaharu o minggu hangeino itötotomo.

³Oraha madekanino gënanga ngohi taol̄omua o inomo i hemo-hemoro ekola o hiode maakeme; ngohi tokerua o angguru, deʼ ahi tadauru ma kotawuhiua.

⁴O wange monaoko de iatoka o mede madodihiraka o taongo gënanga, ngohi magogiriaka tomaokoino o Tigris ma Ngairi ma lamo-amoko gënanga madatekoka.

⁵ Ngohi toma mataga daha tamake o nyawa womatengo wapake o pakeanga o lenan deʼ o gorona maninikutu o gurasi madutu.

⁶Ai röehe imahi doleletonguku hokä o paramata, aibiono mamodararono hokä o cahaya oleletongo, deʼ ailako i janga-janga hokä o uku. Ai giama deʼ ail̄ou maletengo hokä o tabaga ha ehe-eheoka, deʼ aiilingi ho ihene hokä o nyawa manga ngöe manga ilingi.

⁷Duga-duga ngohi mahirete tamake o lolega gënanga. Hagala o nyawa dede ngohi genangoka koyamakeua, mä önanga yohawana hiadono yopiringana deʼ imangiunu.

⁸Ngohi ihima l̄aika genangokadau tomatengoka, deikali tatötailako o lolega ihitotodokana gënanga. Ngohi kotomangakunokauali deʼ ahibiono imule-muleoka.

⁹Maöraha ngohi toihene aiilingi, ngohi toruba de tokiditoko hiadono o tonakoka tomotumuku.

¹⁰De ipaha naga o giama ihipeke ngohi deʼ yadiai ngohi tomomiki de inoli toma hidudukuku ahigiamuku deʼ ahi bukuku.

¹¹O Malaekat gënanga wohitemo ngohino, ”Daniel, ngona ma Jou Madutu wonïdora. Nomomiki deʼ nomaokoil̄e daha noihene ahidemo-demo nënanga nohidodiai. Ngohi nënanga ihihulokoka ngonaino.” Maöraha ünanga wahetongo o hali gënanga, ngohi toma okoino detohahara.

¹²Daha wohitemo ngohino, ”Daniel uha nohawana, ma Jou Madutu wo ihenoka ani niniata kao wange ma dodihiraokahi ngona naputuhu mangale nohi tipokouku anidiri hupaya idadi nobarija. Ngohi toboaka hokä anininiata mabobaluhu.

¹³ O malaekat o Persia mapopareta magogoana wohilawani ngohi o wange monaoko de moi madekana. Daha o Mikhael, womatengo o Malaekat manga tutuda, woboa wohïriwo ngohi. Unanga tïmalaika dokengoka o Persia mabereraka.

¹⁴Ngohi toboa mangale tadiai ngona nomangarati okianaga aha idädadi anihoanika. O lolega nënanga mangale o wange mahimangika.”

¹⁵Maöraha ünanga wahetongo o haligënanga, ngohi tomarukuku deʼ takunua totemo.

¹⁶De ipaha o Malaekat marupa hokä o nyawa gënanga aigiama watoakika deʼ wohipeke ahiuruika. Ngohi tïtemo unangika, ”Tuanga, o lolega nënanga yadiai ngohi duru kahidubuho hiadono ngohi okia-kiakaua takunu.

¹⁷Ngohi hokä womatengo o gilaongo womaokoino ai Tuanga aihimangoka. Sarakia yakunu ngohi totemo ngonaika Tuanga? Ahi kuata imata deʼ ahingomaha madöaka.”

¹⁸Dema moioli ünanga wohipeke ngohi, daha tamao ahikuata idogo.

¹⁹Unanga wohitemo, ”Ma Jou Madutu wonïdora ngona, hababu gënanga uha anihininga iruae ekola nohawana, ika idadi nokuata!” Magogiriaka ünanga wahetongo o hali gënanga, ngohi tamao i holoi tokuatoli deʼ tïtemo, ”Ika notemo Tuanga. Tuanga nödogoka ahi kuata.”

²⁰Daha ünanga wohaluhu, ”Ngona nohioriki yadodoaho toboaino? Madungutu enagenangala mangale tahetongo ngonaika okianaga yatötuli-tulihi o Diai maBuku magoronaka. Oraha nënanga ngohi kokiani tomaidulu la tïparangi tïlawani o malaekat o Persia magogoana. Gënanga deiboto o malaekat o Yunani magogoana aha woboa. Moiua aha ihïriwo sawaliua o Mikhael, o malaekat o Israel, aninegara magogoana.