Read Tobelo O DANIEL 3 Bible Online

O DANIEL 3 - Tobelo bible

O DANIEL 3

¹Maöraha moiuku ma Koano Nebukadnezar wodiai o gahumu moi o dulada o gurasi magurutil̄e o meter monaoko de tumidi deʼ mangoata ngade-ngade o meter hange. Unanga wohigoko o Dura matonaka i rata-rataka o Babel mapropinsioka.

²Deipaha ma koano wäahoko mata-mata o wilayah ma koano, magubernur, mabupati, o negara manonasehati, mabendahara, o hakimi, yososawaro o hukumu, deʼ mata-mata o daera mahae-haeke mangale yöhimanga o upacara o dulada yaresmi wohi goko-gokoka gënanga.

³Ibotoka önanga yoboainoka deʼ imaokoino o dulada gënanga mahimangoka,

⁴wopooka aiajudan wopöaka de ma kuatile, ”Roriadodoto hagala o hoano deʼ o berera deʼ suku o bahasa! Niihene ma koano aipareta nënanga:

⁵Nako o trompet mailingi, ihiginiki o suling mailingi, o kecapi, rarebab, o gambus, serdan o musik deʼ ma pakakaha mahomoahi, ahiroria dodoto kokiani nimahitudukuku niahuba o dulada o gurasi wohigoko-gokoil̄eoka ma Koano Nebukadnezar.

⁶Onagonahonanga ihingounua o pareta nënanga, aha kagila-gila yahikaweli o uku o kalero i toka-tokara magoronaika.”

⁷Done yoihene o musik ma pakakaha gënanga yatoilingi mailingi, hagala o nyawa o hoana de o suku, berera deʼ o bahasa, imahituduku deʼ yahuba o dulada o gurasi gënanga.

⁸O Babel manyawa yamuruono naga yapake o ngekomo maoa gënanga la yahibodito o Yahudi manyawa.

⁹Onanga iwitemo ma Koano Nebukadnezarika, ”Nowango ahi Tuanga kahiado-adonika!

¹⁰Ahi Tuanga mahirete nohihupuoka o pareta, demataitoka o musik mapakakaha mailingi kadeyoihenoka kokiani mata-mata o nyawa kokiani imahitudukuku yahuba o dulada o gurasi gënanga,

¹¹deʼ o nagonahonanga ihingounua o pareta gënanga aha yahikaweli o uku o kalero itoka-tokara magoronaika.

¹²Mä yamuruono naga o Yahudi manyawa ahi Tuanga nalapahioka o popareta o Babel mapropinsioka yapulonikaua ahi Tuanga anipareta gënanga. Onanga ganga o Sadrakh, o Mesakh deʼ o Abednego. Hagala o nyawa gënanga yoluku yapuji anigikiri ahi Tuanga deʼ yolukoli yahuba o dulada o gurasi ahi Tuanga nohi goko-gokoil̄e.”

¹³Woihene gënanga ma koano idadi duru iwitohata, daha wohidoaka o pareta hupaya o nyawa yäruange gënanga yaao iwihimanga unangika.

¹⁴Ma koano wäleha onangika, ”Sadrakh, Mesakh, deʼ Abednego! I goungu ngini nioluku niahuba hagala ahigïkiri deʼ niolukoli nimahitudukuku niahuba o dulada gurasiika gënanga tohigoko-gokoil̄eoka gënanga?

¹⁵Aa, orahanënanga, nimasadiaka ngini, mangale nimahitudukuku deʼ niahuba o dulada gënanga maöraha o musik mailingi? Nako ngini nioluku, ngini aha kagila-gila inihikaweli o kalero mauku itoka-tokara magoronaika. De ogikiri okia aha yäkunu inihihalamati ngini ahikuahaino?”

¹⁶O Sadrakh, o Mesakh deʼ o Abednego yohaluhu, ”Jou koano nomomulia ngomi ahami oluku mihitaili miodemo mio riwo mia diri.

¹⁷Nako Ma Jou Madutu miwihöhuba-huba wäkunu womi hihalamati ngomi o kalero i toka-tokarino gënanga deʼ anikuaha ino ahi Tuanga, maraioka Unanga aha Wadiai.

¹⁸Mä o hohiade Unanga kowadiaiuaö, kokiani ahi Tuanga nohioriki ngomi aha komia pujiua ahi Tuanga anigikiri deʼ komia hubauäli o dulada o gurasi ahi Tuanga nohi goko-gokoil̄e gënanga.”

¹⁹Daha ai dohata i rama ma Koano Nebukadnezar o Sadrakh, o Mesakh, deʼ o Abednegoika, hiadono aibiono idadi mamodokara kama hongo-hongoto. Unanga wohipareta hupaya makalero mauku yadiai mahauku i dogo matumidi.

²⁰Daha ünanga wähuloko yämuruono naga duru yokökua-kuata ai tentara la yäliko o Sadrakh, o Mesakh deʼ o Abednego, ikali yahikaweli önanga o kalero mauku i toka-tokarika gënanga.

²¹Itai-taiti o nyawa yäruange gënanga ö i tai-taiti yäliko yakëkekete de ingodu-ngodumu popakeangika, ona gënanga de manga kemeja, manga juba, manga sapeo de manga pakeanga mahomoaohi, daha yahikaweli o kalero mauku itoka-tokara magoronaika gënanga.

²²Karana ma koano aipareta gënanga hokogënanga ma kuata, done o kalero mauku gënanga yahaukoka deʼ kabiahaua hiadono o uku madokara yätuhuku hohonenge o nyawa yogögora-goraka o Sadrakh, o Mesakh deʼ o Abednego o kalero mauku ma datekika.

²³Hoko gënanga, o nyawa yaruange yäliko yakëkeketoka gënanga yotifa o kalero mauku itö toka-tokara magoronauku gënanga.

²⁴I todokanino ma Koano Nebukadnezar duru iwitodokana. Unanga womataiti womaoko deʼ wäböaka ai pegawe-pegawe ika, ”Koigoungua ngone kangano häliko yäruange deʼ hahikaweli önanga o uku gënanga magoronaika?” Onanga yohaluhu, ”I goungu itiai ahi Tuanga.”

²⁵Wohaluhu ma koano, ”Mä yadodoaho tämake o nyawa yaruata yotagi-tagi o uku gënanga mahigoronaka? Onanga koyä likoikaua deʼ hakali-kali koyädodoaua. Deʼ o nyawa maiatoka gënanga airupa hokä o gikiri.”

²⁶De o Nebukadnezar womahitigi o uku makalero gënanga mangoranika deʼ wopöaka, ”Sadrakh, Mesakh deʼ Abednego, Ma Jou Madutu duru Wokökurutile aigogilaongo! Nihupu o uku makaleroino gënanga!” Done önanga yohupu.

²⁷Mata-mata ma koano aiwakili, o gubernur-gubernur, bupati, deʼ o pegawe-pegawe mahomoaohi yahigilolitino o nyawa yaruange gënanga, deʼ yamake önanga hakali-kali yäpekeua o uku. Manga tadauru toönanga youkua deʼ manga pakeanga toreua yo ukuua, ma boboloi kaouku manofo mabounu makoiwa onangoka.

²⁸Daha ma koano wotemo, ”Niwihigiriri Ma Jou Madutu iwihöhuba-huba o Sadrakh, o Mesakh deʼ o Abednego. Unanga wa hulokoka Ai malaekat la yahihalamati Aigilaongo yaruange iwingöngaku-ngaku Unangika. Onanga yatilakuroka ahiperintahku deʼ i holoi yöigo yohonenge nako yahuba ekola yapuji o gikiri okia sawaliua toönanga manga Jou Madutu mahirete.

²⁹Hababu gënanga ngohi tohipareta moi-moi o hoana deo berera manyawa ekola o hoana deʼ o bahasa okiadika, ihidemo o hikauku ma Jou Madutuika iwihöhuba-huba o Sadrakh, o Mesakh deʼ o Abednego, aha yatëtetoruku deʼ manga tau aha yakilianga deʼ yadiai kaitotoporono iwede-wederuku. Hababu koiwa naga o gikiri yakunu yadiai okianaga wadodiaioka Ma Jou Madutu gënanga.”

³⁰Gënanga de iboto ma koano wohidoa manga pangkati o Sadrakh, o Mesakh deʼ o Abednego mangapangkati, hiadono önanga yodadi o pegawe yokökurutil̄e o Babel mapropinsioka.