Read Tobelo O DANIEL 5 Bible Online

O DANIEL 5 - Tobelo bible

O DANIEL 5

¹O wange moiuku ma Koano Belsyazar wäahoko yäribuhu moi o nyawa yolago-agomo mangale yöhimanga airameanga o ngolomo mahohailoa, deʼ o angguru imahikookere.

²Oraha utu magogiriaka önanga magogiria imahikookere, o Belsyazar wahipareta la yal̄e hagala o mangko o gurasi deʼ o haaka, waora-oraka aiama, o Nebukadnezar, ma Jou Ai Tau magoronaka o Yerusalem mabereraka. Ma Koano Belsyazar aidungutu ena gënangala hupaya o nyawa yolago-agomo, aiheka-hekata, aiheka-hekata paliara deʼ ünanga mahirete, imahiökere o mangkoino gënanga.

³Dema japati o mangko-mangko gënanga yao unangika, daha önanga mata-mata o angguru yokere deo ngongokere mangi gënanga.

⁴Magogiriaka yökere, önanga ihigogiriri hagala o giriri yadodiai deo gurasi, o haaka, o tabaga, o gota deʼ o helewo.

⁵I todokanino yamake o nyawa magiama yatulihi okianaga moi o kadato mabebenoika mangi duru madodararonoka yakokorona o hilo madararono, hiadono ma koano wakunu wamake madodiai.

⁶Unanga womule-muleoka deʼ hokogënanga wohawana hiadono aibuku ihahara.

⁷De wopöaka ünanga wogahoko hupaya duru yososawaro ihingahu-ngahu okianaga aha idädadi, duru yososawaro yo matara deʼ duru yososawaro o murumu yotailako yäahoko. Maöraha önanga yoboaino, ma koano wätemo, ”Onagona honanga yakunu yabasa o dulihi gënanga deʼ ihihingahu toënanga mamangarati ngohino, aha tahidöaka o popareta mapakeanga marupa o juba maungu deʼ o gule o gurasi o horomati manonako. Mahomoa de gënanga aha tïgoraka wo dadi yokokuaha mahangeoka ahipareta magoronaka.”

⁸Hagala yosösosawaro yoaguru yo tagi mahimangiha, mä moiua onangino yakunu yabasa o dulihi gënanga ekola ihingahu mamangarati makoanoika.

⁹Ma koano Belsyazar idadi holoi wohawana deʼ womuleoli; hagala aipegawe yolago-agomo duru yobingu.

¹⁰Yoihene ma koano deʼ aipegawe yolago-ägomo yopoa-pöaka, ma koano ngoiayo mowohama o rameanga mangïika. Daha münanga motemo, ”Nowango ahi Tuanga kahiado-adonika! Nohi ridi anihininga ahi Tuanga deʼ! Uha nomule.

¹¹Hababu ahi Tuanga anipopareta magoronaka naga womatengo o nauru iwiomanga o gikiri itebi-tebini mawomaha. Ma orahoka ahi Tuanga aniama ahi Tuanga, o nyawa gënanga i nyata i goungu wosawaro, de aimangarati deʼ wobarija, hokä o gikiri mabarija. Ani ama ahi Tuanga ani ama ma Koano Nebukadnezar wïgorakoka ünanga wodadi manga tutuda duru yososawaro yomai-maihi yososawaro yo matara, hagala o nyawa de manga goganakoka deʼ duru yososawaro o murumu yotailako.

¹²Unanga kabiahaua wosawaro deʼ wobarija i doto de inoli duru wosawaro wohitararono o nänere, wöbelenga irörahasia deʼ wöbaluhu hagala o loleha ihühuha. Ai romanga o Daniel, mä ma koano wihiromanga o Belsyazar. Niwi ahoko ünanga. Unanga aha woni hingahu ahi Tuangika okia mamangarati o dulihi nënanga.”

¹³Dema japati o Daniel iwiao wïhimanga ma koano. Daha ma koano wïleha unangika, ”Boteka ngona o Daniel, o Yahudi manyawa yototabuanga, watora-torakoka ahiama o Yehuda matonakino?

¹⁴Toihene ngona iniomanga o gikiri i tebi-tebini mawomaha, deʼ ngona nosawaro, deʼ anibarija kabiahaua, no mangarati.

¹⁵Yososawaro deʼ duru yososawaro o matara, ihi tailoka yabasa o dulihi nënanga deʼ ihihingahu ngohino. Mä önanga yakunua.

¹⁶Nënanga dahao toihene ngona nakunu nö belenga hagala o rahasia deʼ nöbaluhu hagala o loleha ihühuha. Nako ngona nakunu nabasa o dulihi gënanga deʼ nohihingahu to ënanga mamangarati ngohino, ngona aha tonihidöaka o popareta mapakeanga marupa o juba maungu deʼ o gule o gurasi o horomati manonako. Mahomoa de gënanga ngona aha tonigoraka nodadi yokokuaha mahangeoka ahipareta magoronaka.”

¹⁷O Daniel wohaluhu, ”Ahi Tuanga i paraluua nohihidoaka o hadia-hadia gënanga nohihidöaka ngohino, nahidöaka dika o nyawa mahomoaika. Ngohi aha tabasa dülihi gënanga mangale ahi Tuanga deʼ toni hingahu toënanga mamangarati.

¹⁸Ma Jou Madutu Duru Wokokurutil̄e wadiai o Nebukadnezar aniama ahi Tuanga wodadi o koano womomulia deʼ wihidöaka o kabaharanga deʼ kaiwi heto-hetongo.

¹⁹Unanga hokogënanga ai amoko, hiadono hagala o nyawa o hoana deo bereraino, o hoana deʼ o bahasa, yohaharoka deʼ iwïmodongo unangika. Nako ünanga wonahihu womau o nyawa wätoma, kawä toma dika o nyawa gënanga. Nako ünanga wähihalamati o nyawa moiani, wä hihalamati o nyawa gënanga. Unanga wahikurutil̄e ekola wahitipokouku o nagona dika imoteke aimau.

²⁰Mä maöraha ünanga idadi woedenge, aihaeke i togowini deʼ hayanga koiwa ai hayanga koiwa, ünanga aipopareta makuruhioka de iwi lulu iwi higuti hiadono ünanga aimulia i hihanga.

²¹Unanga iwiduhu o kawahaoka deʼ aiakali idadi hokä o aiwani maakali. Unanga wowango deo keledai o honganino, waol̄omo o momo hokä o hapi deʼ womä idu madodewedangoka hiadono iwipehaka de odumunitara. Ma baha ünanga wohigoungu ma Jou Madutu Duru Wokökurutil̄e wa kuaha o nyawa mapopareta deʼ o popareta gënanga wahidöaka o nagonaika dika Wairi-iriki.

²²Mä aingohaka o nauru, enagënanga ahi Tuanga mahirete, noluku nohitipokouku anidiri, ngaroko ahi Tuanga nohioriki mata-mata gënanga.

²³Ahi Tuanga noma hikurutil̄e anidiri ma Jouika o horogaka deʼ nobarani nähuloko yao ihingohama hagala o mangko yaora-oraka ma Jou Ai Tauino. Daha ahi Tuanga inoli anipegawe yolago-agomo, aniheka-hekata deʼ aniheka-hekata paliara ahi Tuanga hagala o mangkouku gënanga. Ahi Tuanga nohi gogiriri ani giki-gikiri o gurasi, o haaka, o tabaga, o behi, o gota deʼ o helewo, o giki-gikiri gënanga yakunua imahimake ekola iihene ekola i mangarati okiaua naga. Ahi Tuanga ni horomatiua ma Jou Madutu wohitötantu aningango deʼ anihonenge ahi Tuanga deʼ wohitatapu aningango mangekomo ahi Tuanga.

²⁴Ma hababu gënanga ma Jou Madutu wohi dingoto o giama gënanga layatulihi aibehehongo.

²⁵Nenangadoka madulihi gënanga, ’Yaetongo, yaetongo, yatibanga, yaregu.’

²⁶Deʼ nenangadoka toënanga mamangarati: yaetongo, maöraha anipareta ahi Tuanga ma Jou Madutu deʼ waetongoka deʼ wohibobahaka;

²⁷yatibanga, ahi Tuanga ini tibangoka deʼ yamake aniguguwini;

²⁸deʼ yaregu, anipopareta ahi Tuanga deʼ waregu deʼ wahidöaka o Media deʼ o Parsi manyawaika.”

²⁹Dema japatioka o Belsyazar wohipareta aipegawe-pegawe hupaya iwihipake o Daniel o juba maungu deʼ iwihigule o gule o gurasi aitomaruku. Daha ünanga wïgoraka o Daniel wodadi yokokuaha mahangeoka aipopareta magoronaka.

³⁰O hutu gënanga dika iwitoma o Belsyazar o Babel ma koano gënanga.