Read Tobelo O DANIEL 6 Bible Online

O DANIEL 6 - Tobelo bible

O DANIEL 6

¹O Belsyazar iwitoma dei boto, o Darius o Media manyawa waora o popareta makuruhi. Ma orahoka gënanga ünanga aiumuru o taongo moributanga de hinoto.

²O Darius waregu aipopareta idadi o propinsi o ratuhumoi de monaoko moi-moi yapareta magubernur womatengo.

³O Daniel deʼ yahinotohi mahomoa yägoraka mangale yatötailako o gubernur-gubernur gënanga hupaya makoano uha iwihirugi.

⁴Dema japati i nyata o Daniel aikarajanga i holoi yaoa ngaro de o gubernur-gubernur manga karajanga deʼ yotötailako mahomoahi. Karana gënanga, ma koano wöigo wïgoraka wodadi yokokuaha o popareta yamode-modekika.

⁵Mä o gubernur-gubernur deʼ yotötailako gënanga ihidailako yalingiri o Daniel aihowono o popareta ma manarama magoronaka, mäönanga koyohasilua, karana o Daniel wosatia deʼ woirikoto inoli wodiaiua woalipäua ekola o howono okianaga.

⁶Daha önanga yotemo, ”Ngone yakunu hamake o Daniel aihowono duga-duga imadohanga de o agama mahali magoronaka.”

⁷Deipaha önanga imakutuono kamamoi yoiki iwïhimanga ma koano deʼ yotemo, ”Ya ahi Tuanga ma Koano Darius, nowango ahi Tuanga kahiado-adonika!

⁸Ngoni mata-mata mihidödailako anipopareta ahi Tuanga, kayaoa yotötailako, o gubernur-gubernur, manga waki-wakili o gubernur deʼ o popareta mahomoa, mima teke fakatioka mangale miagogahoko hupaya ahi Tuanga nohihupu o pareta demahurata kokiani ihingounu igou-goungu. Kokiani ahi Tuanga no nohipareta hupaya o wange moruangeino madekana kaonyawamoiö mayahigumal̄aua ihiadono manga gogahoko manga gikirika ekola o nyawaika, sawaliua ahi Tuangika mahirete. O nagona honanga yatilakuru o pareta gënanga aha yahikaweli o singa maaruku magoronauku.

⁹Ngomi migahoko hupaya ahi Tuanga o pareta dema hurata gënanga aniromanga nohinonakouku hupaya idadi o Media deʼ o Persia ma undang-undang yakunokaua irahukoli.”

¹⁰Done ma Koano o Darius o pareta dema hurata gënanga wohinonako airomanga.

¹¹Maöraha o Daniel woihene o hali gënanga, ünanga wolio aitauika, Ai kamari malape dakuil̄e idaduoka il̄oku-l̄okuil̄e dema jangela-jangela ihimanga madumutu o Yerusalemika. Deʼ hokä ai biaha, ünanga womäniata ai Jou Madutuika deʼ wïhigiriri o wangemoi wohigali mahange de watilabukuku o jangela-jangela ihohelengaika gënanga mahimangoka.

¹²Maöraha o Daniel aihaturü-haturü iwimake o Daniel magogiriaka womäniata ai Jou Madutuika,

¹³önanga mata-mata yoiki iwïhimanga ma koano la iwikalaki o Daniel. Onanga yotemo, ”I tiai ahi Tuanga o pareta dema hurata aniromanga nohi nonakoka yälaranga o nyawa mata-mata o wange moruangeino madekana nënanga ihiadono manga gogahoko o gikirika ekola o nyawaika sawaliua ahi Tuangika dika? De inoli, o nagona honanga yatilakuru o pareta gënanga aha yahikaweli o singa maaruku magoronauku?” Ma koano wohaluhu, ”Igoungu itiai, deʼ o pareta gënanga i dadi o Media deʼ o Perdia manga undang-undang de yakunokaua yatotagali.”

¹⁴Daha önanga iwitemo ma koanoika, ”O Daniel, womatengo o tabuanga manyawa o Yehudaino, wonïlegaikaua ahi Tuanga deʼ wohikauku anipareta ahi Tuanga. Unanga womä niata wamoteke madatoro wohigali mahange o wange moi.”

¹⁵Woihene gënanga ma koano aihimanga ihuha deʼ wohawatere, hiadono ünanga wolingiri o akali mangale wïhihalamati o Daniel. Hiadono o wange o bimaoa ma koano kawoma piki-pikirohi.

¹⁶De ipaha hagala o nyawa gënanga ihigalioli iwïhimanga ma koano deʼ yotemo, ”Ahi Tuanga kokiani ahi Tuanga nomä hininga imoteke o Media deʼ o Persia maundang-undang, o pareta wohihupu-hupuoka ma koano yakunua yatotagali.”

¹⁷Done mabaha ma koano wohipareta hupaya o Daniel iwitagoko deʼ iwihikaweli o singa maaruku ma goronauku. Ma koano wïtemo o Danielika, ”Tanu ani Jou Madutu nihuba-huba de anisatia gënanga wonihihalamati ngona.”

¹⁸Gënanga de iboto o gahumu moi o helewo mapako-pako yögelenga o aruku gënanga mauruoka, deʼ ma koano wacap o helewo gënanga deo popareta macap deʼ o pegawe yolago-agomo manga cap, hiadono moiua o nyawa yakunu iwihibebasi o Daniel de hagala o singaino gënanga.

¹⁹De ipaha makoano wolio o kadatoika. Unanga woluku wol̄omo ekola iwil̄aru. Deo hutu moi yahaiwatiki gënanga ünanga wakunua womä idu.

²⁰I tigi-tigi i batingi ma koano womomiki deʼ woiki woma tai-taiti o singa maarukika.

²¹Woma hiadonika dakengoka, ünanga wo poaka o hawana maböaka, ”Daniel, ma Jou Madutu wowango-wango aigilaongo! Boteka ani Jou Madutu nïhuba-huba de ani satia gënanga wakunoka wonihihalamati ngona hagala o singaino gënanga?”

²²Dewo woihene aiilingi o Daniel wohäluhu, ”Nowango ahi Tuanga kahiado-adonika!

²³Ahi Jou Madutu wahulokoka ai malaekat lawatamunu hagala o singa mauru gënanga hiadono ënanga koihi dodoaua ngohi. Ma Jou Madutu wohihihalamati ngohi hababu Unanga wohioriki ngohi todiaiua o howono Unangika deʼ ahi Tuangika.”

²⁴O goguleua ma koano aihininga isanangi deʼ ünanga wahipareta o Daniel iwihihupu o arukino gënanga. O pareta gënanga yadiai deiboto, i nyata kama huhutulö makoyamakeua o Daniel ainabo, karana ünanga wongaku ai Jou Madutuika.

²⁵De ipaha ma koano wahipareta o nyawa hupaya yätagoko hagala o nyawa iwikokalakioka o Daniel. Daha önanga kamamoi de toönanga manga ngoha-ngohaka deʼ manga heka-hekata ya hikaweli o singa maaruku gënanga magoronauku. Onanga ima hiadonowahi o tonakuku gënanga, hagala o singa gënanga yä golioka önanga deʼ yawede-wederuku toönanga manga kobongo.

²⁶Gënanga de iboto ma Koano o Darius wohidingoto o hurata hagala o nyawaika hagala o hoano deo berera, ”O hoano deʼ o bahasa o dunia yamode-modekika.

²⁷Ahi tabea i sosanangi! Ngohi tohipareta o nyawaika mata-mata naga ahipopareta madaeraka hupaya iwï modongo deʼ iwihoromati ma Jou Madutuika wïhuba-huba o Daniel! Unanga ganga ma Jou Madutu wowango-wango kahiado-adonika, hiadono o oraha ma baha Unanga wo pareta. Ai popareta koi binahaua. Ai kuaha koi paha-pahaua.

²⁸Unanga wahi halamati deʼ wahi bebasi, wodiai o nonako i hera-heranga deʼ ihö hera-heranga o dihangoka kayaoa o duniaka. O Daniel wïhihalamatoka hagala o singa ma goli ino.”

²⁹Hoko gënanga o Daniel kahirahi ai pangkati i kurutil̄e hokä ma dekanino o Darius aipopareta deʼ o Koresy, aipopareta o Persia manyawa gënanga.