Read Tobelo O HOSEA 1 Bible Online

O HOSEA 1 - Tobelo bible

O HOSEA 1

¹ Nënanga doka o behehongo wohi dö doa-doaka ma Jou o Hosea ika o Beeri aingohaka ma orahoka o Yehuda ma popareta ima kokinikika ya pareta ma Koano Uzia, o Yotam, o Ahas, inoli o Hiskia, deʼ o Israel ma popareta wa pareta o Yerobeam o Yoas aingohaka.

²Maöraha ma Jou madodihiraka ma Jou wätemo o Israel manyawaika womä de ma dodohanga wohikulaho ngohi, ma Jou wato, ”Hosea nomi kawingi moma tengo mö igo-igo ami roehe ma huku-hukunu deʼ ani ngoha-ngohakö aha yo dadi hokä münanga. Ahi umati imatero hokaʼ ngoni hekata gënanga; önanga yo satiaua Ngohi ino, deʼ ihï dogumal̄aika Ngohi.”

³Daha ngohi tomi kawingi o ngoheka moma tengo ami romanga ongo Gomer o Diblaim ngoi ora. Münanga de iboto mo ngohaka tongomi mia ngohaka madodihiraka, woma tengo o ngohaka o nauru, ma Jou wohi temo ngohino,

⁴ ”Nihi romanga ani ngohaka genanga o Yizreel hababu i tedekanokaua Ngohi aha tï hukumu o Israel manga koano karana o doma wadodiai o Yehu, ai ete de ai tohora, o Yizreel. Ngohi aha tohi bobahaka o Yehu aidifauku manga popareta.

⁵Ma orahoka gënanga o Yizreel ma Wai oka Ngohi aha tä wedere o Israel ma tentara manga kuata.”

⁶Deipaha ngohi hekata genanga mo ngohaka tongomi mia ngohaka ma hinotoka, o ngohaka o ngoheka moma tengo. Ma Jou wohi temo ngohino, ”Hosea nomi hiromanga ngoni ora gënanga ’Koyä Dora Ua’, karana Ngohi aha tä doraokaua o Israel manyawa, deʼ hakali-kali tahiapongua önanga.

⁷Mä o Yehuda manyawa aha Tä dora. Ngohi ma Jou toönanga manga Jou Madutu, aha ta hihalamati önanga, mä deo parangiua ekola o oworo o toimi ekola o kuda deʼ yo bare-barene.”

⁸Tongomi mia ngohaka mahinotoka o huhu ma pidili dei boto, ngohi hekata mo roeholi demo ngohaka woma tengo o ngohaka o nauru.

⁹Ma Jou wohi temo ngohino, ”Nihi romanga ani ngohaka genanga ’Ko Ahi Umatua’, hababu o Israel manyawa ko Ahi umatua, deʼ Ngohi toönanga manga Jou Madutu ua.”

¹⁰ O Israel manyawa aha yo dadi yo woe hokä o dowongi o gahi oka, hiädono yakunua ya tuga ekola ya etongo. Oraha nënanga ma Jou Madutu wätemo onangika, ”Ngini ko Ahi umatua,” mä aha i boa maöraha Unanga aha wätemo onangika, ”Ngohi ma Jou Madutu to wango-wango deʼ ngini Ahi ngoha-ngohaka!”

¹¹O Yehuda deʼ o Israel manyawa aha yahirimoioli. Onanga aha iwi goraka woma tengo manga tutuda, deʼ önanga yo hero yo dogo-dogo deʼ okia-kiaua yo kuranga oli toönanga manga bereraka. I goungu, o Yizreel mawange aha idadi o wange ma amo-amoko!