Read Tobelo O HOSEA 12 Bible Online

O HOSEA 12 - Tobelo bible

O HOSEA 12

¹Ma Jou wotemo, ”O Israel manyawa ihi higilolitino Ngohi de o tengeluku deʼ o tipu; o Yehuda manyawa kahirahi ihi lawani Ngohi, ma Jou Madutu To Tebi-tebini deʼ To satia.

²Hagala moi-moi yadodiai o Israel manyawa o ngorumino hiadono yö hutu ma guna koiwa deʼ ma rupa i bobinaha hokä o hidal̄oko o wange ma hiwara. O rusi deʼ koiwa o dora deo hayangi kai ilape toönanga manga hidogoronaka. Onanga yo diai hagala o jaji deo Asyur deʼ yo ao o minya o Mesirika hokä o nonako ima ko hobata.”

³ Ma Jou naga de Ai parekara deo Yehuda manyawa; Unangö aha wä hukumu o Israel karana toönanga manga kalakuanga. Unanga aha wa balahi toönanga manga manarama.

⁴ I mulaenge ngoi ayo ami mamata kahi o Yakub toönanga manga ete de manga tohora wï ora ka o Esau ai hago ma riaka; deʼ wo baluhoka, o Yakub ima tagoko dema Jou Madutu.

⁵Unanga ima tagoko deo Malaekat woma tengo deʼ unanga wo utumu. Daha unanga wo ari deʼ wo gahoko iwi hibarakati. Deipaha o Betel mabereraka, ma Jou Madutu wo boa o Yakubika tongone nanga ete de nanga tohora gënanga, deʼ ima temo-temo dede unanga.

⁶Ma Jou Madutu gënanga ma Jou Duru Wo kokuaha. Ai romanga ena gënangala ma Jou. Deo romanga gënanga Unanga wo mau o nyawa yo puji Unangika.

⁷Karana gënanga, hei ngini o Yakub aidifauku, niwi ngaku nia Jou Madutu ika deʼ nima kilioro Unangika. Ni wango de inï omanga deo dora deʼ o hininga ma riko-rikoto, deʼ ni tamä de nia sabari hiadono nia Jou Madutu okianaga wo diai.

⁸Ma Jou wätemo o Israel manyawaika, ”Ngini ni rusi-rusi hokä o Kanaan manyawa; ima hö huku-hukunu yö igo yä tipu yo ija-ija de o didibanga ma dutu ua.

⁹ ’Ngone oraha nënanga ho kaya,’ önanga yato. ’Ngone ho utumu! Moiua o nyawa yakunu inä kalaki ngone ha make o kaya gënanga dema dodagi ho rusi-rusi.’

¹⁰Mä ngohi, ma Jou nia Jou Madutu, tinï ao-ao ngini o Mesir mabereraka deni hupu, aha Ta diai ngini ni gogeroli o tau-tau oka hokä ma hiraino maöraha Ngohi to boa ngonaika o tonaka i kokakaha ka.

¹¹Ngohi tä temo ka o nabi-nabi ika, deʼ ta hidoaka ma ngöe o lolega onangika. I tilakuru önanga ngohi Tohi ngahu hagala Ahi datoro mangale ngini, Ahi umati,

¹² mä ngaro hoko gënanga ka naga ohi ya huba-huba o gomanga o Gilead mabereraka, deʼ ihi huba o hapi o huhuba mangï ma loku oka o Gilgal mabereraka. Mä önanga yahö huba-huba o gomanga gënanga aha yo honenge, deʼ hagala o huhuba mangï o Gilgal mabereraka gënanga aha idadi o helewo ma doomu hagala o dumule oka.”

¹³ O Yakub tongone nanga ete de nanga tohora wo piringana o Mesopotamia ika, daha mangale womä make o hekata, ünanga woma gilaongo dokengoka manyawaika deʼ wö goana o nyawa geünanga ai duba-duba.

¹⁴Ma Jou wï huloko woma tengo o nabi la wä ao o Israel ma nyawa yo hupu o gilaongino o Mesir ma tonakoka, deʼ mangale wä goana önanga.

¹⁵O Israel manyawa ya diaioka ma Jou duru wo ngamo, önanga i patutu yä hukumu karana toönanga manga dorou. Ma Jou aha wä hukumu önanga karana önanga ya diaioka o nyawa iwi hikauku Unanga.