Read Tobelo O HOSEA 14 Bible Online

O HOSEA 14 - Tobelo bible

O HOSEA 14

¹O Samaria kokiani ta hukumu karana yo satiaokaua de ihi lawani Ngohi. Ma kawaha aha yo honenge o parangi magoronaka; manga ngoha-ngohaka ma gogil̄au aha yä wede-wederuku, deʼ manga ngongoheka yo roe-roehe yä belaka manga mamata.”

²Nima kilioro ma Jouika nia Jou Madutu, hei Israel manyawa! Nia baradoha idadioka o hababu ngini ni paakoro deʼ ni ruba.

³Nima kilioro ma Jouika deʼ nihiadono o niniata nënanga hokä nia huhuba Unangika, ”Jou, nohi apongo hagala tongomi mia baradoha, deʼ na tarima tongomi mia niniata nënanga, done ngomi aha mini higiriri Ngone hokä ngomi mijä jaji oka.

⁴O Asyur aha ko yakunua ini hihalamati ngomi, deʼ o kuda ihi poparangi ko yakunua imï riwo ngomi. Ngomi aha komi temoua o dulada-duladaika tongomi mia giama ma hirete ma manarama ënanga tongomi mia Jou Madutu. Ya Jou, Ngona nä dora hagala o nyawa komoiua o naguna dika yakunu önanga ima hingano-nganono.”

⁵Ma Jou wotemo, ”Ahi umati yo rehe-rehenohi, tal̄ë oli deʼ tä dora de ahi hininga ma gahumu; önanga aha Tä ngamo okaua.

⁶O Israel manyawaika Ngohi hokä o awana ya peha-pehaka o tonaka madududungu. Onanga aha ima hohe hokä o bunga deʼ hoka o liwewuru ma gota ma utu ma ngutuku ma l̄uku ʼku.

⁷Onanga aha yo wango deʼ yodogo-dogo hokä o dadatomo i tori kiaka honanga hokä o zaitun ma gota ma utu ma hailoa ma bounu i hemoro hokä o liwewuru ma gota ma utu!

⁸Onanga aha ima kilioro Ngohi ino deʼ yo gogere ahi gogoana magoronaka. Duru dema japati aha kai dogo i wöe manga hasili, hokä o gandum i wango o dumule ma boburere oka deʼ hokä o angguru ma dumule. Hokä o Libanon ma angguru ma akere kaya heto-hetongo toönanga manga romanga.

⁹O Israel manyawa aha yä umo hagala manga gomanga ma dulada; önanga Tä paliara deʼ Ta tarima manga niniata. Hokä o gota ma utu salalu ma ngöe ma hoka, Ngohi aha tä hohongo önanga. Ka ngohi toönanga manga barakati ma titi. Ngohi, ma Jou, to temoka.”

¹⁰Tanu mata-mata o nyawa yobobarija yo mangarati okianaga yatö tuli-tulihi nenangoka, deʼ ya tailako ihidodiai. O hidumutu-hidumutu ma Jou ino ganga i tiai, deʼ o nyawa manga wowango i tebi-tebini yo wango ya moteke o hidumutu-hidumutu gënanga. Mä o nyawa yobö baradoha yo legaikaua hiadono yo paakoro deʼ yo ruba.