Read Tobelo O HOSEA 4 Bible Online

O HOSEA 4 - Tobelo bible

O HOSEA 4

¹Ma Jou de ai perekaraka de o berera nënanga yogö gogere. Hei Israel, ni ihene okianaga Wahö heto-hetongo, ”O bereraka nënanga koiwa o satia ekola o deʼ yogö gogere ihi ngakua Ngohi hokä ma Jou Madutu.

²Onanga yo koboto, ma önanga ya ganapiua; önanga yo eluku, yo toma, yo tohiki, deʼ yo howono. O dorou i dogo, deʼ o doma i dadi ka ima kokinikika.

³Hababu gënanga o berera nenanga aha idadi i dudungu, deʼ hagala iwö wango-wango genangokadau aha i honenge. Hagala i rupa o aiwani o gitaoaka, o dudungoka deʼ o ngootoka aha i binaha.”

⁴Ma Jou wätemo, ”Hei imam-imam, uha naga nia hihowono ekola nia ngamo Ahi umati, hababu ngini Tini hihowono.

⁵O hutu de o wange ngini ni diai o howono, hoko genangoli o nabi-nabi. Hababu gënanga Ngohi aha ta binaha o Israel, nia ayo.

⁶Ngini, o imam-imam, nihihaduliua Ngohi, done Ahi umati ma ihihaduliua Ngohi hiädono önanga yo bodito. Ngini nia tila hagala Ahi dodotoko. Hoʼ, Ngohi ö tinï tila ngini, deʼ nia ngoha-ngohaka aha To mangakua hokä Ahi imam-imam.

⁷I holoi ngini i dogo ni woe, i holoi oli ngini ni baradoha Ngohi ino, hei imam-imam! Hababu gënanga nia wowango aha Ta ngali: Ngini aha inï horomati okaua, duga-duga inï hikauku.

⁸Ngini ni dadi kaya karana Ahi umati manga baradoha, hababu gënanga ngini niö igo hupaya önanga i gila-gila yo baradoha.

⁹Done ngini aha ni huha deni hangihara ima tero hokä o kawaha. Ngohi aha Tinï hukumu ngini tohitero de hagala nia manarama.

¹⁰Ngini aha nia ol̄omo hagala o huhuba ihi huba-hubaino, ma ngini aha kahirahi inï hahini. Ngini aha nia huba hagala o gikiri ya boburere, mä nia berera manyawa kahirahi koyo dogoua, hababu ngini nihi mal̄aka Ngohi mangale nia huba hagala o gikiri ma homoa.”

¹¹Ma Jou wotemo, ”Hei Ahi umati, kayaoa o angguru i hira-hira kayaoa o angguru ma hungi ya hihangoka ani kuata mangale noma pikiri de madodagi itomoloa ma oa-oa.

¹²Ngini ni gahoko o hidumutu o gota ma dobikino! O gahumu moi o diki-diki ini hingahuika okianaga ngini nio nö nahihu ni hioriki! Ngini hokä moma tengo o hekata mo dadi ami roehe ma huku-hukunu; ngini nihi malaika ngohi deʼ nima hidoaka nia diri o gikiri ma homoa ika.

¹³O gomanga ya huba-huba mangï oka o doporono deʼ o loku ma tubu oka, ngini nihi huba o huhuba, deʼ ni tuhuku o dupa hagala o gota ma utu ma pako-pako dema hoka i rubu-rubu ma timiuku doke ngoka karana o ngï gënanga i ridi. Mä okia ma baha ika? Nia momoholehe yo dadi manga roehe ya huku-hukunu deʼ nia momol̄oka o ngoheka yo howono.

¹⁴Mä Ngohi aha tä hukumua toönanga manga manarama-manarama gënanga, hababu ngini ma hirete ö ma nioiki manga roehe ya huku-hukunika ya momanarama hagala o gomanga ma tau oka, deʼ kamamoi dede önanga ngini nihi huba o huhuba o gikirika. I goungu i tiai o demo nënanga: ’O hoano deo berera ma nyawa koiwa-iwa manga mangarati mangale ma Jou Madutu aha yo kilianga.’

¹⁵Hei ngini o Israel manyawa, ngini ni satiaua Ngohi ino. Mä, Ngohi to nganono o Yehuda yo diaiua o howono kaima tero gënanga! Uha ni puji o Gilgaloka ekola o Beteloka. Uha ni koboto dokengoka dema Jou wo wango-wango ai romanga.

¹⁶Ngini, hei o Israel manyawa, duru i togowini nia haeke! Sarakia Ngohi yakunu tinï goana ngini hokä o duba o tonaka mamomo i lua-luasoka?”

¹⁷O Israel manyawa manga hininga i laketoka de o gomanga. Hababu gënanga hä mal̄aika önanga.

¹⁸De iböto yä dalukoka karana yokere ma amoko o angguru, önanga manga roehe ya hukunu de manga hininga i sosanangi. Onanga iholoi yö igo yä hikauku ngaro deʼ yahoromati.

¹⁹Hababu gënanga önanga aha yo hïhanga hokä o hidaloko ya wuwu. Onanga aha ya make o mal̄eke karana hagala o huhuba huba hagala o gikirika.