Read Tobelo O HOSEA 5 Bible Online

O HOSEA 5 - Tobelo bible

O HOSEA 5

¹Ma Jou wätemo, ”Ni ihene, hei imam-imam! Nia tailako nihi dodiai, hei Israel manyawa! Ni ihene, hei kokoano manga difauku! O hukumanga ini di tifa ka ngini uku. Hababu, kokiani ngini ni ahi juru hakimi de o adili, mä i dulu yaino ngini ni dadioka hokä o dadagoko o Mizpaoka, hokä o modoi o Tabor mal̄okuoka,

²deʼ hokä o baiti malukuku ʼku o Sitimoka. Hababu gënanga Ngohi aha tinï hukumu ngini mata-mata!

³Ngohi tohioriki hagala moi-moi mangale nia diri, hei Israel! Koi dadiua ngona na rahasia okianaga moi Ngohino. Ngona na huba o gomanga deʼ no satiaua oli Ngohi ino. Karana genanga, hagala ani nyawa i patutokaua ihi huba Ngohi.”

⁴O dorou yadodiai o Israel manyawa idadi o hababu önanga yakunukaua ima kilioro toönanga manga Jou Madutu ika. Onanga ya hokotoka o gomanga ma huba-huba, hiadono önanga iwi haduliokaua ma Jou.

⁵O Israel manyawa manga hininga ma gurutil̄e ha make dema diai, deʼ idadi manganyata toönanga manga howono. Toönanga manga baradoha idadi o hababu önanga yo peleke deʼ yo ruba, deʼ o Yehuda manyawa ima niki yo ruba kamamoi dede önanga.

⁶Onanga yoiki iwi lingiri ma Jou deyoao o duba deʼ o hapi mangale o huhuba, mä mata-mata gënanga koiwa ma baraguna. Hababu ma Jou wä mal̄aka önanga, deʼ önanga iwi makeua Unanga.

⁷Onanga yo satiaua ma Jouika; toönanga manga ngoha-ngohaka ko Aingoha-ngohakua. Karana gënanga, i tedekanokaua önanga aha yo binaha kamamoi de toönanga manga dumule-dumule.

⁸Nia wuwu o trompet o Gibeaoka! Nia toilingi ma nonako yä ahoko ima teke parangi o Ramaoka! Ni hiböaka o parangi ma ilingi o Beteloka! Ika o Benyamin manyawa, ni tagi nia himangiha ni parangi.

⁹O Israel aha i binaha, hababu ima hiadonoka mawange mangale yä hukumu onanga. Ni ihene, hei o Israel ma kawaha, o hali gënanga maraioka aha idadi.

¹⁰Ma Jou wotemo, ”Ngohi to ngamo karana o Yehuda ma tutuda-tutuda yaparangioka o Israel deʼ ya ora matonaka. Karana gënanga Ngohi aha tahitapal̄u o hukumanga onanguku hokä o nguihi.

¹¹O Israel ya tuku; to ënanga i hihangoka ma haku, matonaka karana ënanga ima togowini mangale yo gahoko o roriwo ma homoa ika imoteke ma diai yakunua yo riwo enanga.

¹²Gënanga ma hababu Ngohi aha ta wedere o Israel ma hoana dema berera, deʼ tä binaha o Yehuda manyawa.

¹³O Israel manyawa deʼ o Yehuda manyawa ya mao manga kaadanga i torou, done o Israel yoiki o Asyur ika la yogahoko o bobatumu ma koano wo momulia ino. Mä ma koano gënanga wakunua wä riwo ekola wa tiai kaadanga önanga ya oa.

¹⁴Hokä o singa i horokumu, hoko genangoli Ngohi aha ta parangi o Israel deʼ o Yehuda manyawa. Ngohi ma hirete aha tä kakihi önanga, daha Tä mal̄aika. Nako Ngohi tä tatauru önanga yoiki, moiua o nyawa yakunu ya hilapahi önanga.

¹⁵Ahi umati aha Tä dogumal̄aika hiadono önanga yaoaka ya mao o huha deo hangihara karana hagala manga baradoha, daha yo boa ihi lingiri Ngohi. Mudukua manga huha de manga hangihara ma goronaka önanga aha ihidailako ihi make Ngohi.”