Read Tobelo O HOSEA 6 Bible Online

O HOSEA 6 - Tobelo bible

O HOSEA 6

¹Hagala o Israel manyawa yo temo, ”Niaino ngone homa kilioro ma Jouika. Unanga wonahiri ngone ho ngone la panyake, mä Unangö aha wona hitogumu. Unanga wadiai inä l̄abo, mä Unangö aha wa hawo dewa pakiti torgore nanga nabo-nabo gënanga.

²O wange hinoto ekola o wange hange magoronaka nënanga Unanga aha wona hitogumu ngone, deʼ ngone aha ho wango Ai gogoana magoronaka.

³Karana gënanga niaino ngone hohidailako mangale ha gou-goungu hï nako ma Jou. Unanga maraioka aha wo boa ngoneino hokä tigi-tigi i boa ibating oka danengino, deʼ hokä o awana ya pehaka o dunia, o awa-awanoka maöraha ihi bobaha.”

⁴Mä ma Jou wätemo, ”Hei o Israel deʼ o Yehuda! Ngohikokiani okia ta diai dede ngini? Nia hayangi sinta de nia dora Ngohi ino i taiti i hihanga hokä o huhutu ekola o dumunitara o ngorumino.

⁵Gënanga ma hababu Ngohi tä huloko Ahi nabi-nabi la ihiadono nginiika Ahi putuhu kokiani ngini inï hukumu deʼ inï binaha. Ya ngohi tö igo-igo ngini ino i tararonoka deʼ itiai.

⁶ Ngohi i holoi tö igo ngini nihi nako Ngohi deʼ salalu nihï dora Ngohi ngaro de ngini ni harongo deʼ nihi huba o huhuba Ngohi ino.

⁷Mä hokä o Adam oka, ngini nihi pongono nia jaji dede Ngohi.

⁸O Gilead ganga o kota i omanga deo nyawa ma dorou deʼ yo toma-toma.

⁹Hagala o imam o kota ka gënanga hokä o doomu moi yo ora-ora yä gogoana o nyawa ya kokaino. O ngekomo yö dumutu o ngï i tebi-tebinika o Sikhem ö onangö ma yodiai o doma! Mata-mata o dorou gënanga önanga yadiai dede yohangaja.

¹⁰O Israel mabereraka Ngohi ta make o kianaga moi hö boborohono: Ahi umati ya peseke manga diri ya huba o gomanga.

¹¹Mangale ngini, hei Yehuda manyawa, Ngohi tohi tatapuoka maöraha la inï hukumu ngini ö karana nia manarama.”