Read Tobelo O HOSEA 8 Bible Online

O HOSEA 8 - Tobelo bible

O HOSEA 8

¹Ma Jou wotemo, ”Nia toilingi o guguli o bahaya ma nonako! O haturü yaparangi Ahi berera, hokä o totaleo o kawihi ya utuku ma inomo! Ahi umati ya tilakuru Ahi jaji dede önanga, deʼ ya lawani hagala Ahi dodotoko.

²Ngaroko önanga ihi hetongo Ngohi toönanga manga Jou Madutu deʼ yo temo önanga ganga Ahi umati ihi nako-nako Ngohi,

³mä önanga yoluku ya tarima okianaga ma oa-oa. Mangale karana gënanga önanga aha yoginake toönanga manga haturü yä giniki.

⁴Ahi umati ima ngiriki o koano ko ima lehaua Ahi damake. Onanga imä goraka manga tutuda ma Ngohi ko tata rimaiua. Onanga ya l̄ë toönanga manga gurasi deʼ manga haaka daha yo diai o gomanga ma dulada idadi magurehau o hababu toönanga manga bodito ma hirete.

⁵Ngohi tö dohata o hapi o gurasi ika yahö huba-huba o Samaria ma kota manyawa, Ngohi duru tä ngamo onangika. Hiadono muruonoka önanga aha ka hokogënanga kaya peseke manga diri de ya huba-huba o gomanga?

⁶O hapi o gurasi yahö huba-huba o Samariaoka, gënanga ganga manga muraa la o Israel manyawa yogö gao-gao. Gënanga ma Jou Madutu ua, deʼ kokiani ya wede-wederuku!

⁷Ahi umati yo datomo o hidal̄oko önanga aha yautuku o rato ma ngutuku! Toönanga manga gandum ma dumule koi kuratiua aha ihi hasilua o gopuno mangale manga inomo. Mä nako o dumule gënanga kai kurati dika, done ma gandum aha o hoana ma homoa ya mata.

⁸Hokä o bohoko ibelaka, hoko genangoli o Israel koiwa ma mangarati oli, deʼ yo dadi oka o hoana biaha dika hokä o hoana deo berera ma homoa.

⁹Hokä o keledai ihü huhuku ko ima himotekua, hoko genangoli o Israel manyawa ya moteke manga mau ma hirete. Onanga yo lingiri o bobatumu o Asyur ino, deʼ i ma ija i ma teke dodiawo de o hoana de o berera ma homoa.

¹⁰Hoʼ hoko gënanga Ngohi aha ta toomu deʼ ta hukumu önanga. I tedekanokaua önanga aha yotidono ka manga hiri, nako önanga o Asyur manga koano wä tuku.

¹¹I dogo i woe o huhuba mangï ihigoko o Israel manyawa la yaehe o baradoha, i dogo i woe oli o ngï mangale önanga la yodiai o baradoha!

¹²Ngohi to tulihi duru kaha ngoe o dodotoko mangale önanga, mä mata-mata gënanga önanga ya oluku karana ya pulono koiwa naga ma dungutu dede önanga.

¹³Onanga yö igo ihi huba o huhuba Ngohi ino, deʼ ya olomo aiwani ma akeme o huhuba gënanga, ma Ngohi ma Jou, to sanangiua de hagala o huhuba gënanga. Oraha nënanga Ngohi aha tö hininga toönanga manga baradoha deʼ Ta hukumu önanga karana hagala o baradoha gënanga; Ngohi aha ta hidingotoli önanga o Mesirika!

¹⁴O Israel manyawaihigoko hagala o kadato, mä önanga iwi wohanga toönanga manga dodadi ika, o Yehuda manyawa yawöe manga kota-kota dema bebeno o meheleka, Mä Ngohi aha tohi guti o uku la yatuhuku ya mata hagala o kadato deʼ toönanga manga kota-kota.”