Read Tobelo O AMOS 5 Bible Online

O AMOS 5 - Tobelo bible

O AMOS 5

¹Ni ihine hei Israel ma umati! Ngohi to mau tohinyanyi moi o duka ma nyanyi mangale ngini:

²I otakoka o Israel kai o moholehe maborohi, ënanga aha koimomikokaua! Ma ai tonaka mal̄okuoka mahirete ënanga yö dogumal̄aika, moiua yariwo ënanga ima oko.

³Ma Jou Duru Wokö kurutil̄e wotemo, ”Moi o kota o Israel, mabereraka yä toomu o tentara ya ribuhu moi, mä ima kilioro yo lio duga-duga ya ratuhu moi; o kota ma homoa yä toomu o ratuhu moi, ima kilioro yo lio duga-duga ya ngimoi.”

⁴Ma Jou wätemo o Israel ma umati ika, ”Nima kilioro ni lio Ngohi ino, done ngini aha ni wango.

⁵Uha nioiki o Bersyeba ika mangale ni puji. Uha nihilingiri Ngohi o Betel mabereraka, hababu o Betel aha i hihanga. Uha oli nioiki o Gilgal ika, hababu yogö gogere o kota gënanga aha yä toraka o tabuangika.”

⁶Nima kilioro ni lio ma Jouika, done ngini aha ni wango. Nako ngini nima kiliorua ni lio Unangika, Unanga aha wo boa hokä o uku itahe ihora deʼ ya tuhuku o Israel manyawa yamata-mataka. O Beteloka mabereraka moiua o nyawa ya hohonenge o uku gënanga.

⁷Ni bodito ngini, ngini nia takaidulu o adili deʼ nia ora o nyawa manga haku!

⁸ Kama Jou wo diai hagala o murumu o gitaoaka — o murumu Belantik deʼ o murumu Kartika. Unanga wa ngali o huhutu idadi o dararono deʼ o wange-wange idadi o hutu-hutu; o akere o ngötoka ya uhe o dudungika. Wododiai mata-mata gënanga Ai romanga enagenangala ma Jou.

⁹Unanga wä binaha o nyawa yo kokuaha kamamoi de toönanga manga dadatoko.

¹⁰Ngini niä dohata o nyawa ya lawa-lawani iadi-adilua deʼ yo temo-temo ma diai o juru hakimi magoronaka.

¹¹Ngini niä tuku o nyawa mihikini deʼ manga gandum ngini nia ora. Karana gënanga ngini aha konigogerua nia tau-tau ma hö hailoa magoronaka, ngini nihigoko-goko ka gënanga. Ngini aha koni okerua o angguru nia angguru ma dumuleino ngini ni dato-datomo.

¹²Ngohi tohioriki hokokia ma amoko nia dorou deʼ hokokia ma ngöe nia baradoha. Ngini niä tuku o nyawa ma oa; ngini nia tarima o uru bokumu deʼ nia mal̄aika o nyawa mihikini yä hidiai koi adilua o juru hakimoka.

¹³Karana nia manarama gënanga, done hagala o nyawa yo bobarija ya mao iholoi yaoa ima rï ridokadika ma orahoka o dorou hokä hokogënanga.

¹⁴Nihidailako ni diai o oa deʼ uha ni diai o dorou, hupaya ngini ni wango. Done ma Jou o Jou Madutu Duru Wo kokuaha aha igou-goungu Wo gogere tingini nia hidogoronaka hokä ngini nia heto-hetongo.

¹⁵Niö dohata o dorou de niö igo o oa-oa, deʼ nia totiail̄e o adili. Yakunu idadi ma Jou aha wä dora hagala o nyawa ma hou-houohi o Israel manyawa ino.

¹⁶Ma Jou o Jou Madutu Duru Wo kokuaha wotemo, ”O kota ma ngeko-ngekomika, o nyawa aha yo dodora deʼ yo liwolu karana manga hininga ihuha. Ma boboloi yo totumule aha yä ahoko ima himoteke yo ari kamamoi deo nyawa yä hewa-hewa la yä dodora o nyawa yo hone-honengoka.

¹⁷Mata-mata o angguru ma dumuleoka, o nyawa aha yo dodora karana Ngohi to boa deʼ tinï hukumu ngini. Ngohi, ma Jou, to temoka.”

¹⁸Igoungu ni bodito ngini nio nö nahihu ma Jou Ai wange! Okia ma guna o wange gënanga ngini ika? O wange gënanga duga-duga ma rupa o wange ma hohohutu, ko o wange ma dodararonua ngini ika.

¹⁹Ha make hokä o nyawa ihi oara manga diri deo singa, maʼ ima kamake deo beruang. Ekola hokä o nyawa yo lio manga tau ika deʼ ima hidudukuika de manga giama o bebeno o mehelika, deo dodiha iwi tuduku.

²⁰Ma Jou Ai wange itiai yö dotagao o huhutu, ko o dararonua — o wange kai lobi-lobi kai hohutuku.

²¹ Ma Jou wotemo, ”Ngohi tö dohata deʼ yatoka to wunanga ta make nia agama ma rame-rame!

²²Nako ngini ni ao o huhuba ya tuhu-tuhuku deʼ o huhuba o gandum, Ngohi aha ta tarimaua. Ngohi toluku ta tarima hagala nia aiwani-aiwani ma boburere gënanga ngini nihi hö huba-huba Ngohi ino hokä o dame ma huhuba.

²³Nia togumukuohi hagala nia nyanyi ikokapusakuku gënanga; Ngohi toluku tohi gihene nia kecapi nihigogule.

²⁴Iholoi ya oa, nihidailako hupaya o adili ihahuru hokä o akere, deʼ hininga irikoto hokä o ngairi komaiwa idudungu.

²⁵ Hei Israel ma umat, maöraha Ngohi tinï tuda nia nonu o tonaka i kokakaha o taongo moruata ma dekana, Ngohi togahokua nihi hö huba-huba deʼ o huhuba ngini ino.

²⁶Mä öraha nënanga ngini nia huba o Sakut ngini nia pulono nia koano gënanga, deʼ o Kewan o murumu ngini nima hi gikiri gënanga. Karana gënanga hagala o dulada nia dodiai gënanga kokiani ngini nia toraka ma hirete nia umo.

²⁷Nako Ngohi tinï umo ngini o berera moika iholoi ikurutika deo Damsyik. Ngohi ma Jou ahi romanga ma Jou Madutu Duru Wo kokuaha to temoka.”