Read Tobelo O AMOS 7 Bible Online

O AMOS 7 - Tobelo bible

O AMOS 7

¹Ngohi ta make moi o lolega ma Jou Duru Wokö kuruntil̄e ino. Ngohi ta make Unanga wo diai o kahoho ma tika ma ago-agomo ma orahoka o nyawa ya mal̄aino yo pairi o momo mangale ma koano, deʼ o momo ma hungi i mulaengoli iwango.

²Hagala o kahoho gënanga ngade-ngadehe yaol̄omo ol̄omo mata-mata iwe wango-wango o tonakoka. Daha ngohi to temo, ”Jou Duru Nokö kurutil̄e, nahiapongo Ani umati! Onanga yo etekeholi deʼ yo bole sarakia yakunu önanga yo tongohono?”

³Ma Jou wa ngali Ai datoro deʼ wotemo, ”Namö make-make gënanga aha koi dadiua.”

⁴Ngohi ta make moioli o lolega ma Jou Duru Wokö kurutil̄e ino. Ngohi ti make Unanga magogiria woma hidiai ma gogiria la wä hukumu Ai umati deo uku. O uku gënanga ya al̄eme yamata-mataka o ngoto ma ago-agomo o dunia ma timiuku deʼ imulaenge ya tuhuku o dumule.

⁵Ngohi to temo, ”Ya Jou ma Jou Madutu, natogumu tanu hohonenge o uku gënanga! Ani umati hoko gënanga manga mengeteke deʼ yo bole, sarakia yakunu önanga yo tongohono?”

⁶Ma Jou wa ngali oli Ai datoro deʼ wotemo, ”Nenango ma aha koi dadiua.”

⁷Ngohi ta make moi o lolega ma homoa ma Jou ino. Tï make Unanga woma okoino ma datekoka moi o bebeno o mehele ihi gö goko-goko deya pake o duduga. Ai giamoka Unanga wasö ino o rukiti gënanga mangale wa tailako boteka o bebeno o mehele gënanga itotiaiil̄e ekola kowali.

⁸Unanga wo leha ngohino, ”Ngona o kia na make, Amos?” Ngohi to haluhu, ”Orukiti, o duduga irikoto itotiail̄e, Jou.” Daha ma Jou wotemo, ”Ngohi ta pake o rukiti o duduga nënanga la ihidumutu Ahi umati hokä o bebeno o mehele iriko-rikotil̄eua, Ngohi aha ta ngali oli Ahi datoro, Ngohi marai aha tä hukumu önanga.

⁹Hagala o ngï ya pake-pake o Ishak aidifauku mangale yo puji aha ya wedere ikilianga. Hagala o Israel manyawa manga ngï i tebi-tebini aha ya kilianga binaha. Ngohi aha tä binaha ma Koano Yerobeam aidifauku.”

¹⁰O Amazia, ma imam o Betelika, wohidingoto o laporan nënanga o Yerobeam ika o Israel manga koano, ”O Amos ima teke hikagaro wo rimoi deo kawaha iwi lawani Jou Koano. Ai demo-demo wä dofo-dofo o kawaha aha idadi o hababu o berera nënanga iwedere.

¹¹Unanga wotemo Jou Koano aha wo hönenge o parangi ma goronaka deʼ o Israel manyawa maraioka yä toraka o tabuangika, magurutika detoönanga manga berera ma hirete.”

¹²Daha o Amazia wïtemo o Amos ika, ”Hei nabi, nolio o Yehudaika! Dokengoka no riwayati. Mal̄aikala önanga ini hidoaka o inono ngona ika!

¹³Uha oli no riwayati o Betel mabereraka. O kota nënanga yatingakoka mangale ma koano, deʼ o pupuji mangï tö kawaha.”

¹⁴O Amos wo haluhu, ”Ngohi koigoungua o nabi karana o jabatan. I moteke ma diai ngohi o aiwani topö paliara deʼ o ara ma hohoko to page-pagele.

¹⁵Mä ma Jou wohi l̄ë ngohi ahi manaramaka, deʼ wohi huloko ngohi tohiadono Ai behehongo o Israel manyawaika.

¹⁶Mangale gënanga no ihene okianaga ma Jou wa heto-hetongo ngona ika. Karana ngona nohï duhunu ngohi to riwayati tä lawani o Israel manyawa.

¹⁷Ma Jou wotemo ngoni hekata aha ami roehe ma huku-hukunu o kota ma ngeko-ngekomika, deʼ ani ngoha-ngohaka yä toma o parangi magoronaka. Ani tonaka aha yä hikodoku o nyawa ma homoaika, deʼ ngona ma hirete aha no honenge o nyawa iwi nako-nakoua ma Jou manga bereraka. Iogogere o Israel manyawa maraioka aha yä toraka o tabuangika magurutika de toönanga manga berera ma hirete.”