Read Tobelo O AMOS 8 Bible Online

O AMOS 8 - Tobelo bible

O AMOS 8

¹Ngohi ta make moioli o lolega ma Jou Duru Wokö kurutil̄e ino. Ngohi ta make o gahumu moi o karaja ma lol̄a o hohoko-hohoko ma gomuku.

²Ma Jou wohi leha, ”Ngona okia na make, Amos?” Ngohi to haluhu, ”O gahumu moi o karaja madol̄a o hohoko-hohoko ma gomu-gomuku.” Ma Jou wotemo, ”Maöraha iamukoka mangale o Israeloka Ahi umati. Ngohi aha ta ngaliokaua Ahi datoro deʼ marai oka aha tä hukumu önanga.

³O wange gënanga hagala o nyanyi o kadatoka aha idadi o dodora. Kiaika honanga kai lü luluika manga mayeti ya umo kayapongono.”

⁴Ni ihene hei ngini niä tuku-tuku o nyawa mihikini o bereraka nënanga hiadono önanga yo binaha!

⁵Ngini nia temo nia diri ika ma hirete, ”O goguleua ma dekana nanga rameanga mawange. Ngone hö nahihu itai-taiti homa hukunoli tongone nanga gandum, mä o rameanga gënanga koi togu-togumua. Muruonoka o Sabat mawange ipaha, hupaya yakunu ngone ho mulaengoli homa hukunu? Ngone duru hö nahihu homa dagang, ho tipu de nanga duduga deʼ ho rusi de nanga didibanga.

⁶O gandum ma dodorou yakunu ngone ho hukunu dema ija ikurutil̄e. Ngone ha lingiri o nyawa mihikini yaku-akunua ya fangu manga nagimi, ngaroko manga nagimi gënanga duga-duga o hapato o habi moi ma ija, deʼ ngone hï ija ünanga idadi tongone nanga gilaongo.”

⁷Ma Jou, o Israel manyawa manga Jou Madutu, wo kobotoka, ”Ngohi hakali-kali aha ko tawohangua toönanga manga manarama i totorou.

⁸O dunia aha ihahara deʼ mata-mata o nyawa manga hininga ihuha. O berera ya mode-modekika aha igiwi deʼ kai l̄ahi-l̄ahini hokä o Nil ma Ngairi.

⁹Aha iböa maöraha Ngohi ta diai o wange i tumunu o wange ikokoronauku, deʼ o dunia idadi ihuhutu o wange oka. Ngohi ma Jou Duru Wokö kurutil̄e, to temoka.

¹⁰Hagala nia rameanga aha Ta ngali idadi nia huha de nia duka, deʼ hagala nia nyanyi idadi o dodora. Ngohi aha ta diai nia tadauru nia kori deʼ nia pake o ngoere o karongo ma nonako nia hininga ihuha. Ngini aha ni dadi hokä o ama deʼ o ayo yö gari manga ngohaka ima tengo-tengoka i honenge. O wange gënanga aha ihi bobaha deo hininga ma huha.”

¹¹Ma Jou Duru Wokö kurutil̄e wotemo, ”Aha iböa maöraha Ngohi tö dotagao o habirokata o bereraka nënanga. O nyawa aha yä hahini, mä o inomua yö hahini. O nyawa aha manga kiriti ma dudungu, ma o akerua yö kiriti ma dudungu. Onanga yä hahini deʼ manga kiriti ma dudungu mangale Ahi behehongo.

¹²O nyawa aha yo tagi-tagi ya kaika ya kaino o koremie deyaile o korehara il̄e, deʼ o wange ma hiwaroka deyaiha o wange ma dumuniha la imä make Ahi behehongo, mä onanga aha koyamakeua.

¹³O wange gënanga ma boboloi hagala o nyawa o gikiri magö yo popanyakeua ma aha yo kiditoko karana manga kiriti ma dudungu.

¹⁴Hagala o nyawa yo kobo-koboto, de o Samaria ma gomanga de yo temo, ’De o Dan ai hoana manga gikiri’, ekola ’De o Bersyeba manga gikiri’ — aha i ruba deʼ koimomikokaua.”