Read Tobelo O OBAJA 1 Bible Online

O OBAJA 1 - Tobelo bible

O OBAJA 1

¹ Nenanga ai hidodemo o Obaja; ünanga wohiädono ma Jou Duru wokö Kurutil̄e ai behehongo yakorona o Edom manyawa: Ma Jou wahidingotoka Ai huhuloko hagala o hoana de o berera ika, deʼ ngone hoihenoka o behehongo yaö oa-oa hokä hokonënanga, ”Homa hidiai mangale hoparangi! Niaino ngone homagoraka haparangi o Edom.”

²De o Edomika, ma Jou watemo, ”Ngona Tonidiai nobole, hiädono inihikauku mangale mata-mata o höano deʼ o berera.

³Ngona initipu anihininga i kokurutil̄e. Ani kota matiti naga ol̄oku o helewo makua-kuata; anigögere mangï ol̄oku matubu ikokurutil̄eoka. Karana gënanga ngini nimapikiri, o naguna yakunu ihihitifa ngohi?

⁴Ngaroka ani tau nadiai ima teroino magurutil̄e o totaleo rajawali maigutu, deʼ imateroino magurutil̄e hagala o murumu o dihangoka, ngona maraioka aha Tonihitifa.

⁵Yo tohi-tohiki ekola yoora-ora yoboa maöraha o hutu-hutu, duga-duga yal̄e yonönahihu. O nyawa yopagele o angguru o dumuleoka, salalu yamal̄aika mahohoko muruono naga. Ma ngona inihehara inimata hagala anihaturü.

⁶Hei Esau aidifauku, ngona initol̄okini deʼ aniarata iö iu-iunuö yaora.

⁷Ngona initipu nima tekerörorimoi, deʼ iniduhu anibereraka. Ngona inihihanga hagala anidodiawo, initagoko deʼ o dadagoko o nyawa nimakokiniki niol̄omo. Onanga yoleha-leha mangale anidiri, ’Kiaka öraha nënanga hagala ai sawaro?ʼ

⁸Mawange Ngohi tahukumu o Edom, hagala manyawa yososawaro Tabinaha. De hagala manga barija toönanga aha ihihanga, koiwa mario.

⁹O Temanino yopoparangi aha deʼ manga hawana, deʼ o Edom manga tentara mata-mata aha yohonenge.”

¹⁰”Ngona nodiaioka madora koöiwa-iwa ani rororiadodotika o Yakub aidifauku. Hababu gënanga ngona aha inibinaha, deʼ inihohedu o nyawa o öraha magurutu.

¹¹Ngona magogurutoka nomaokoino, mawange o haturü yakilianga o Yerusalem mangorana deʼ yahohihanga o kota gënanga. Ngona kanoma riridoka dika maöraha önanga mata-mata yatoraka o Yerusalem ma kaya mata-mata deʼ imahikodoku önanga manga hidogoronaka. Ngona kaimatero anidorou deʼ o haturu gënanga.

¹²Ipatutua ngona nosanangi mangale o Yehuda manyawa manga wowango i hasilua deʼ nomorene mawange aniriadodoto gënanga yobinaha. Ipatutua ngona noma hil̄e maöraha ünanga wohuha.

¹³Ipatutua ngona no ngohama Ahi umati manga kota, deʼ nahi uli-ulili hagala o nyawa magogiria yatagongo o hangihara, okia hongoli yaora aiarata aibodito mawangeoka!

¹⁴Ipatutua ngona nomaokoino o ngingiunoka, mangale nagogoana hagala o nyawa magogiria manga haturüoka deʼ ihi oara manga diri, ekola nahilapahi önanga manga lawanika mawange önanga yatapal̄u o huha.”

¹⁵”Igoungu, i tigioka mawange, Ngohi, o Jou, tä juru hakimi o höana deʼ o berera maago-agomo. Okia yadodiai o Edom aha Ta balahi onangika. Onanga aha yamaooli okia onanga yadodiaioka.

¹⁶Ahi l̄oku i tebi-tebini mal̄okuoka Ahi umati yaokeroka iö oke-okere ihinonako mahukumanga. Mä yaö oke-okere mangale o höana deʼ o berera ma ago-agomo o duniaka nënanga iholoioli imali. O hukumanga gënanga yakunua önanga imahirehene. Onanga kiani yaokere hiädono imata, ipaha önanga yo hihanga koiwa mario.”

¹⁷”Mä o Sion mal̄okuoka, aha naga o halamati, deʼ ol̄oku gënanga idadi o ngï yodinga-dingakoka mangale Ngohi. Done o Yakub aidifauku aha imahito onaokali toönanga manga puhaka matonaka.

¹⁸Ahi umati o Israeloka aha hokä o uku yatuhuku yamata o Esau aidifauku, hokä o uku yatuhuku yamata o gandum maröehe ma doolenge o dumuleoka. Kaima tengo makoiwa o Esau aidifaukuino aha yootana. Ngohi, o Jou totemoka!

¹⁹Hagala o Yehuda manyawa o Koreharail̄e aha yögogere o Edom. Hagala o nyawa ol̄oku mabuturungino o wange madumuniha idaduoka aha yähihanga o Filistin madaira. O Benyamin ai höana aha yögogere o Gilead, deʼ Ahi umati o Israeloka aha yakuaha o Efraim deʼ Samaria yamode-modekika.

²⁰O Israel manyawa o koremieuku aha o tabuangoka deʼ yolio deʼ yogogere o Finisia hiädono o Sarfatika. Hagala o Yerusalem manyawa yatotabuanga o Sardisoka, aha yolio deʼ imahitoona hagala o kota o Yehuda o koreharail̄e i daduoka.

²¹O Yerusalem manyawa yoö utu-utumu aha yaparangi o Edom deʼ yautumu. Done Ngohi o Jou aha topareta hokä o koano.”