Read Tobelo O YUNUS 1 Bible Online

O YUNUS 1 - Tobelo bible

O YUNUS 1

¹ O wange moiuku, ma Jou wïtemo o Yunusika, o Amitai aingohaka.

²Wato, ”Noiki o Niniweika o kota ma ago-agomo gënanga, mangale aha idadi o bodito, karana Ngohi tohi öriki manyawa duru yatorou.”

³Mä o Yunus koaholi woma goraka ai meta ma homoaika mangale wo mahikurutika deʼ ma Jou. Unanga woiki o Yopeika, wa dae-daenika wamake o kapa imau ima hihitomo o Spanyolika. Iböto wofangu ai dodagi ma hewa, ünanga wodöa o kapail̄e, daha yohidete ima kinïki o kapa manyawa o Spanyolika, mangale wo mahikurutika deʼ ma Jou.

⁴O Yunus wouti o ngï duru itimi-timiuku deʼ woma rubaiha gënangoka, daha womä idu ai nihu-nihuku. Ipaha ma Jou wohi boa o rato o ngöto mal̄okuino daha idadi o lulu hoboborohono, yododobotoka o kapa gënanga hiadono ngadeke iwedere. O kapa manyawa duru yohawana deʼ yopöa-pöaka yogahoko o roriwo, moi-moi manga gikirika mahirete. Mangale ihi kuranga o bahaya i woöro, önanga yaumo o kapa gënanga ma gina o ngöto ma gorona uku.

⁶Maöraha o kapa mabaluhu gënanga wouti daukuku, ünanga wimake o Yunus genangoka ai gogiriaka woma idu. Daha ünanga witemo, ”Kiaka yakunu ngona nakunu noma idu marupa hoko nënanga magoronaka! Ika, nomomiki! Noma niata ani gikirika mangale nogahoko o roriwo. Hohi orikikaua ünanga aha wona dora ngoneino hiädono ngone hobinahaua.”

⁷O Yunus deʼ o kapa mabaluhu gënanga yodöa il̄e ibötino, o kapa manyawa ima ketemo imahi koko önanga, ”Niaino, ngone hodiai o undi hupaya ngone hohi öriki o nagona yahowono hiädono ngone inä baanga o bodito nënanga!” Onanga yodiai o undi deʼ o Yunus ai romanga yadäene.

⁸Daha önanga iwi temo o Yunusika, ”Itiai ngona idadi o hababu o bodito nënanga? Ngona o kiaino? O hoana o kia? Ya dodoahö naga nënangoka?”

⁹O Yunus wohaluhu, ”Ngohi o Ibrani manyawa. Ngohi tihuba o Jou ma Jou Madutu o horogaka, wohidö dadadi o ngöto deʼ o dudungu.”

¹⁰Ipaha ünanga wohi ade-ade sarakia ünanga wohi dailako ma Jouoka deʼ wohi oara ai diri. Yoihene gënanga hagala o kapa manyawa idadi iholoioli yohawana, deʼ iwi temo unangika, ”Duru masopan koiwa ani manarama gënanga?”

¹¹O öraha gënanga iholoi ikuata o rato gënanga, daha o kapa manyawa iwi leha ünangika, ”O kia kokiani ngomi midiai ngonaika hupaya o rato nënanga irïdi?”

¹²O Yunus wohaluhu, ”Nihi umo ngohi o ngöto magoronauku, maraioka o rato aha irïdi. Hababu o öraha nënanga ngohi tohi öriki ngohi idadi hababu o rato homodo-modongo nënanga ini tapal̄u ngini.”

¹³Mä o kapa manyawa kaihi dailakohi genangö manga kuata mangale ihi dayu o kapa gënanga o dudungiha. Mä o rato gënanga kaiholoi ikiriali, hiädono toönanga manga hi dailako mata-mata kaparahaja.

¹⁴Hababu gënanga önanga yopöaka ma Jouika, ”Ya Jou, ngomi migahoko, uha ngomi mibinaha karana mia l̄e o nyawa manga jiwa yodiaiua o howono okia ö ngomino. Ya Jou, Ngona nadiaioka okia Ngona nomau.”

¹⁵Daha önanga iwi hikaweli o Yunus o ngöto magoronauku. Done o rato gënanga ital̄oko magiria iridï.

¹⁶O kapa manyawa gënanga idadi duru iwi modongo ma Jouika, de o dudungiha ima hiadonoka, önanga i hihuba o huhuba deʼ yojaji irupa-rupa o hali ma Jouika.

¹⁷ O oraha gënanga ma Jou wohi boa o nawoko mapako-pako iwi lahiri o Yunus. Daha o Yunus wogogere o nawoko mamamataka gënanga madekana o hutu hange deʼ o wange hange.