Read Tobelo O YUNUS 3 Bible Online

O YUNUS 3 - Tobelo bible

O YUNUS 3

¹Mangale mahinotoka ma Jou wïtemo o Yunusika.

²Wato, ”Noiki o Niniweika, o kota ma amo-amoko gënanga, deʼ nohiädono o kawahaika, o behehongo Tohi döa-döaka ngonaika.”

³Done o Yunus wïhi ngounu ma Jou deʼ woiki o Niniweika, moi o kota duru ma ago-agomo; hiadono iparalu wodagi mangale o wange hangeino.

⁴ O Yunus wongohama o kota gënanga deʼ o wange moi magurutu wodagi iböto, ünanga womulaenge woriwayati, wato, ”Wange moruatohi, o Niniwe aha ibinaha!”

⁵O Niniwe manyawa yangaku ma Jou Madutu Ai behehongika gënanga. O kawaha yongodumu ya putuhu mangale yopuaha, deʼ mata-mata o nyawa, yaoa yopako-pako yaoa yohohumujuru, ima hinoa o pakeanga o karongo mangale ihi matoko önanga ima toduba hagala toönanga manga baradoha.

⁶Maöraha o Niniwe manga koano woihene o abari gënanga, ünanga deʼ majapatioka wouti o pareta makuruhioka. Wahuputu aipareta majuba deʼ woma hinoa o pakeanga o karongo, daha ünanga wogogeruku o kafo mal̄okuoka.

⁷Unangö wohi ngahu-ngahu o hibobita gënanga, ”O pareta nënanga ihihupu o Niniweoka mangale ma koano deʼ menteri-menteri manga putuhu: Mata-mata o nyawa, o hapi, o duba o duba deʼ o aiwani io gigini mahomoa yakunua io l̄omo deʼ io kore.

⁸O nyawa deʼ o aiwani kiani imahinoa o pakeanga o karongo. Hokä o doduba manonako o nyawa mata-mata kiani ima niata deʼ ya gou-goungu ma Jou Madutuika. Önanga kiani yatiai manga kalakuanga itö totorou deʼ manga manarama iomanga o baradoha.

⁹Mudukua ma Jou Madutu aha wangali Ai niati deʼ wona ngamookauaoli hiadono ngone idadiua wonabinaha!”

¹⁰Ma Jou Madutu wamake toönanga manga manarama; Unanga wä make önanga yamal̄aoka toönanga manga manarama itotorou. Done Unanga wangali Ai putuhu, deʼ idadiokaua wähukumu önanga.