Read Tobelo O YUNUS 4 Bible Online

O YUNUS 4 - Tobelo bible

O YUNUS 4

¹O Yunus kautuö deʼ wosanangua deʼ o hali gënanga; ünanga idadi holoi wongamo.

² Daha ünanga woma niata, ”Ya Jou, koigoungua totemoka mahiraahi tauoka toma gorakuahi, Ngona maraioka aha nodiai hoko nënanga? Genanga mahababu ngohi tohi gila-gila tohi oara ahi diri o Spanyolika! Ngohi tohi öriki Ngona o Jou Madutu notahayanga deʼ notodora, ani sabari ikurutu, Ani hininga ya bole, deʼ salalu nomasadia mangale nangali Ani hukumanga ma datoro.

³ Oraha nënanga, ya Jou, mal̄aika ngohi tohonenge dika, hababu deʼ towango iholoi yaoa ngohi tohonenge.”

⁴Ma Jou wohaluhu, ”Ngona koiwa ani hababu mangale idadi nongamo hoko gënanga.”

⁵Ipaha o Yunus woiki o kota o wange mahiwaroko idaduoka, daha wogogeruku genangoka. Unanga woma diai moi o tau-tau deʼ woma hohongika magoronaka, ikali wododamä okia aha idadi o Niniwe ma kotaoka.

⁶Daha ma Jou o Jou Madutu wohi wango moi idö dato-datomo itahe iwihi döaka o hohohongo o Yunusika hiädono ünanga wa mao wosanangi. Igoungu, o Yunus duru wosanangi deʼ o dadatomo gënanga.

⁷Mä iyarehino maöraha ma hohuhutuinohi, ma Jou wadiai moi o pipiti yatetoro o dadatomo mangutuku gënanga, hiädono imaai.

⁸O wange ipotoka ibötino ma Jou Madutu wohi boa o hidal̄oko ihau-hauku iwuwu o wange mahiwariha. O Yunus ngadeke wokiditoko karana iwi pairuku o wange mahauku matero-tero yatuhuku ai haëkuku. Unanga idadi ai nganono itoaka deʼ womau kawo honenge. Wato, ”De towango iholoi yaoa ngohi tohonenge dika!”

⁹Ma Jou Madutu wïtemo ünangika, ”Ngona ipatutua idadi hoko gënanga ani hininga ihuha karana o dadatomo gënanga!” O Yunus wohaluhu, ”Yadodoa hokowali? Ipatutu ngohi idadi duru tongamo hiädono tohonenge.”

¹⁰Daha ma Jou wïtemo unangika, ”O dadatomo nënanga iwango o hutu moi dika magoronaka, deʼ o wange yaino enanga imaai; ngona hakali-kali nohi wango ua ekola napaliaraua. Ngaro hoko gënanga ngona namao ani hininga ihuha karana enanga imaai.

¹¹Kiaka iyakunu Ngohi aha ahi hininga ihuhaua tatibanga o Niniwe, o kota ma amo-amoko gënanga. Hababu mahomoa hagala o aiwani hakunua haetongo gënanga, gënangokaö tamake iholoi o nyawa ya ratuhu moi deʼ yamonaoko manga ribuhu o ngohaka yakunuahi ihi tingaka okia ma oa-oa deʼ okia ma dodorou.”