Read Tobelo O BILANGAN 1 Bible Online

O BILANGAN 1 - Tobelo bible

O BILANGAN 1

¹ O mede mahinotoka mawange moioka o taongo mahinotoka ipahaika o Israel manyawa yamal̄a o Mesir maberera, ma Jou wï temo-temo o Musaika ma Jou Ai Tauoka o Sinai matonaka ikokaka haka. Wato,

²”Ngona deʼ o Harun kokiani nia diai o sensus o Israel ma nyawa mata-mata, imoteke o hoana deʼ o tau moi-o tau moi madol̄a. Nia tulihi mata-mata o nau-nauru manga romanga

³manga umuru o taongo monaoko deʼ ihi kail̄e yaku-akunu yo dadi o tentara. Onanga kokiani nia hitulihi imoteke moi-moi manga doomu maduduono.

⁴O hoana moi-o hoana moi ino nigahoko womatengo o hoana matutuda mangale inï riwo ngini.”

⁵Neönanga doka manga roma-romanga yä iri-iriki o kawaha ino mangale yariwo o Musa deʼ o Harun deʼ yodadadi o hoana moi manga tutuda, enagënanga: [Ai hoana] — [Manga tutuda] O Ruben — O Elizur o Syedeur aingohaka O Simeon — O Selimuel o Zurisyadai aingohaka O Yehuda — O Nahason o Aminadab aingohaka O Isakhar — O Netaneel o Zuar aingohaka O Zebulon — O Eliab o Helon aingohaka O Efraim — O Elisama o Amihud aingohaka O Manasye — O Gamaliel o Pedazur aingohaka O Benyamin — O Abidan o Gideoni aingohaka O Dan — O Ahiezer o Amisyadai aingohaka O Asyer — O Pagiel o Okhran aingohaka O Gad — O Elyasaf o Rehuel aingohaka O Naftali — O Ahira o Enan aingohaka

¹⁷De o nyawa yangimoi de yahinoto gënanga manga roriwo, o Musa deʼ o Harun

¹⁸wä huloko o kawaha yongodumu ima toomu o mede mahinotoka o wange mamoioka, de toönanga manga silisila yatatoro daku deʼ yauku imamoteke manga hoana madoomu naga moi-moi toönanga manga hoana magoronaka. Mata-mata o nau-nauru manga umuru o taongo monaoko de ihikail̄e manga romanga nia tulihi deʼ niä etongo,

¹⁹hokä ma Jou wohi popareta. Genanga mata-mata o Musa wadiai o Sinai matonaka ikokakahaka.

²⁰O nau-nauru manga umuru o taongo monaoko deʼ ihikail̄e yaku-yakunu yodadi o tentara, manga romanga nihi tulihi imamoteke manga hoana deʼ manga tau madol̄a, o Ruben deʼ imulaenge, o Yakub aingohaka mariaka hiädono o Naftali. Onanga naga manga ngöe. [Ai hoana] — [Manga ngöe] O Ruben — 46.500 O Simeon — 59.300 O Gad — 45.650 O Yehuda — 74.600 O Isakhar — 54.400 O Zebulon — 57.400 O Efraim — 40.500 O Manasye — 32.200 O Benyamin — 35.400 O Dan — 62.700 O Asyer — 41.500 O Naftali — 53.400 Mata-mata manga ngoë: — 603.350

⁴⁷O Lewi manyawa uha nia hitulihi kamamoi de o hoana ma homoa,

⁴⁸karana ma Jou wotemoka o musaika,

⁴⁹”Maöraha ngona nohi tulihi o nyawa manga roma-romanga yaku akunu yodadi o tentara, o Lewi ai hoana ngarouha nia hi tulihi.

⁵⁰Nähuloko önanga ihi dailako Ahi Tau de hagala ma pakakaha. Toönanga manga manarama enagënanga yamoku Ahi Tau de toënanga mapakakaha ikali ihidö dailako. Onanga kokiani imä tau ihi gilolitino.

⁵¹Nako ngini nimatagali, o Lewi manyawa gënanga kokiani yakilianga Ahi Tau, daha ihi diai ihi gokoli o ngïmahi gëtongo nimä tau ma hungioli. Mahomoa de önanga, o nagona dika yatigi-tigika o Tau gënanga kokiani yahukumu yahohonenge.

⁵²O Israel manyawa mahomoahi kokiani ihi goko manga tau o doomu moi-o doomu moi, o nyawa moi-nyawa moi manga doomu magoronaka moi-moi ihi gilolitino manga paji-paji mahirete.

⁵³Mä o Lewi manyawa kokiani imä tau Ahi Tau magilolitino. Onanga kokiani yogoana hupaya o nyawa moiua imahi tigika hiädono idadi o hababu Ngohi tongamo deʼ Tä hukumu o Israel ma nyawa.”

⁵⁴De o Israel manyawa yadiai hagala wohi popareta ma Jou o Musaika.