Read Tobelo O BILANGAN 10 Bible Online

O BILANGAN 10 - Tobelo bible

O BILANGAN 10

¹Ma Jou wïtemo o Musaika,

²”Nodiai o trompet o haaka yatutukoka o gahumu hinoto nä ahoko o kawaha ima toomu ekola mangale nähuloko o kawaha ima toomu ekola mangale nähuloko önanga ima goraka.

³Nako hinotö yawuwu yogira-gira ngika, mamangarati o kawaha mata-mata kokiani ima toomu ini higilolitino Ahi Tau mangorana ma himangoka.

⁴Mä nako moi dika yawuwu, mamangarati duga-duga o balu-baluhu kokiani ima toomu ini higilolitino.

⁵Nako o trompet yawuwu yotengo-tengo, gënanga manonako hagala o hoana imä tau-tau o wange mahiwaroko idaduoka kokiani ima goraka.

⁶Nako yawuwu yotengo-tengo mahinotoka, hagala o hoana o korehara il̄e yodaduoka kokiani ima goraka. Hoʼ ma ilingi yotengo-tengo mamangarati o kawaha kokiani ima goraka,

⁷ho deʼ ma ilingi yogira-girangika mamangarati o kawaha kokiani ima toomu.

⁸O trompet-trompet gënanga kokiani o imam-imam yawuwu, o Harun aingoha-ngohaka. Genanga doka madatoro kokiani ngini nihi ngounu mangale kahi ado-adonika.

⁹Deʼ nako niparangi nia bereraka mangale nio riwo nia diri nia haturu ini poparangi manga himangoka, nia wuwu o trompet-trompet gënanga. Done Ngohi, ma Jou Nia Jou Madutu, aha Tinï riwo deʼ tini hihalamati ngini nia haturu-haturuino.

¹⁰Tingini nia morene mawangeokaö, enagënanga o Mede ma Hungi marame-rameoka deʼ nia wange ma amoko mahomoa, o trompet gënanga kokiani yawuwu maöraha ngini nihi huba o huhuba yatö tuhu-tuhuku Ngohino. Done Ngohi aha tiniriwo ngini. Ngohi ma Jou nia Jou Madutu.”

¹¹Ipahaika otaongo mahinotoka o Israel manyawa yamal̄a o Mesir, o mede mahinotoka o wange monaokoka, ma Jou Ai Tau il̄e o lobi idöa.

¹²De o Israel manyawa ima goraka kaima kokinïkika yamal̄a o Sinai matonaka ikokakaha, deʼ o lobi gënanga ima togumu maöraha önanga yadono o Paran matonaka makokakahaika.

¹³Genanga madodihiraka önanga ima goraka de ma Jou Ai pareta itilakuru o Musa.

¹⁴Ihira ima goraka o hurudadoka imahö hohongo o Yehuda ai rimoi mapaji-paji matimiuku, o duduono yotagali o duduono: o Nahason, o Abinadab aingohaka wätuda o Yehuda ai hoana manga duduono.

¹⁵O Nataneel o Zuar aingohaka wätuda o Isakhar ai hoana manga duduono,

¹⁶deʼ o Eliab o Helon aingohaka wätuda o Zebulon ai hoana manga duduono.

¹⁷Daha ma Jou Ai Tau yakilianga, deʼ o Gerson deʼ o Merari ai hoana ima goraka yamoku o Tau gënanga.

¹⁸De ipaha ima goraka o hurudadoka imahö hohongo o Ruben ai rimoi ma paji-paji matimiku, o duduono itagali o duduono: o Elizur o Syedeur aingohaka wätuda o Ruben ai hoana manga duduono,

¹⁹o Selumiel o Zurayadai aingohaka wätuda o Simeon ai hoana manga duduono,

²⁰deʼ o Elyasaf o Rehuel aingohaka wätuda o Gad ai hoana manga duduono.

²¹Genanga deʼ iböto o Kehat manyawa ima goraka yamoku o bara-baranga itebi-tebini. Nako önanga yadono o tau-tau ma doomu mangï moioli, ma Jou Ai Tau yadiai okali.

²²De ipaha o hurudadoka imahö hohongo o Efraim ai rimoi ma paji-paji matimiuku yahiduru, o duduono yotagali o duduono: o Elisama o Amihud aingohaka wätuda o Efraim ai hoana manga duduono.

²³O Gamaliel o Pedasur aingohaka wätuda o Manasye ai hoana manga duduono,

²⁴deʼ o Abidan o Gideoni aingohaka wätuda o Benyamin ai hoana manga duduono.

²⁵Mabobahaka ima goraka o hurudadoka imahö hohongo o Dan ai rimoi mapaji-paji matimiuku. Onanga ganga mata-mata o rimoi manga gogoana mapore-poretoka. Onanga yotagi o duduono yotagali o duduono: o Ahiezer o Amisyadai aingohaka wätuda o Dan ai hoana manga duduono.

²⁶O Pagiel o Okhran aingohaka wätuda o Asyer ai hoana manga duduono,

²⁷deʼ o Ahira o Enan aingohaka wätuda o Naftali ai hoana manga duduono.

²⁸Genanga o Israel manyawa manga duduono madatoro, o duduono yotagali o duduono, önanga ima goraka magetongo mangale ima tururu.

²⁹O Musa wïtemo ai gerika, o Hobab o Rehuel aingohaka o Midian manyawa, ”O ngï ma Jou wahetongoka aha wohi döaka ngomino genangika ngomi aha mima goraka. Ma Jou wä jaji okama oa-oa o Israel manyawaika. Ho, nomï nïki, ngomi aha minihi diai yaoa ngonaika.”

³⁰O Hobab wohaluhu, ”Tarima kase, ngohi toigo tomakilioro tongohi ahi kapongika.”

³¹”Uha nomï mal̄a ngomi,” o Musa wato, ”ngona yakunu no dadi o ngekomo nomihi dumu-dumutu ngomino, hababu ngona nohi öriki kiaka ngone yakunu homä tau o tonaka ikokakahaka.

³²Nako ngona nonïki, hagala maoa-oa ma Jou wadodiai ngomino, aha ngomi mia diaiö ngonaika.”

³³Ipahaika o Israel manyawa yamal̄a o Sinai, ol̄oku ma Jou Ai ngï, önanga yotagi o wange hange madekana. Ma Jou Ai Jaji ma Peti salalu yao yahihira önanga mangale yalingiri o ngï mangale önanga manga tau-tau ihi goko.

³⁴Nako önanga manga tau-tauoka deʼ ima goraka, ma Jou Ai lobi o wangeoka salalu naga toönanga mangal̄okuoka.

³⁵ Ihi geto-getongo o Jaji ma Peti gënanga yagoraka, o Musa wotemo, ”Nomomiki, ya Jou, nahi kokitingakoka Ani haturu hiädono o nyawa inï doha-dohata Ngona ihi oara manga diri.”

³⁶De ihi geto-getongo o Jaji ma Peti gënanga yadono madodogu mika, o Musa wotemo, ”Noma kilioro Jou, o Israel manga tau madol̄a deʼ maribu-ribuhika.”