Read Tobelo O BILANGAN 11 Bible Online

O BILANGAN 11 - Tobelo bible

O BILANGAN 11

¹O wange moiuku o Israeloka gënanga yomulaenge yotaiyana ma Jouika mangale toönanga manga huha deʼ manga hangihara. Wo ihene manga daiyana-daiyana gënanga, ma Jou wongamo deʼ wä dotagao o uku onangika. O uku gënanga ihora toönanga manga hidogoronaka deʼ youku manga tau-tau madoomu o hidoku moi.

²Hagala o nyawa gënanga yopöa-pöaka yogahoko o roriwo o Musaika. Daha o Musa wohubayanga ma Jouika, deʼ o uku gënanga ihonenge.

³Karana idadadi gënanga, o ngï gënanga ihi romanga o Tabera karana genangoka ma Jou Ai uku ihora-hora toönanga manga hidogo ronaka.

⁴O Israel manyawa manga dodagi magoronaka gënanga nagaö o nyawa maporetino yonïki. Onanga gënanga duru yonahihu o hiode ma akeme yol̄omo, deʼ o Israel ma nyawaö yomulaenge yota iana. Onanga yato, ”Uwe abeika tanu naga o hiode ma akeme mangale ngone!

⁵Ngone homa hininga o nawokika o Mesir mabereraka ngone hol̄omo deʼ mabobangu koiwa, o timu, o hamaka, o bawa mahoka, o bawa madoka-dokara deʼ o bawa magare-garehe!

⁶O öraha nënanga tongone nanga kuata koiwaka karana ma homoa deʼ o manna ngone hamo make-make o inomo mahomoa koiwa.”

⁷ Ma rupa o manna gënanga hokä o mui ma alu-aluhu, magare-garehe hatoli ikurati.

⁸ O hutu-hutu o manna gënanga itifa kamamoi deʼ o dumunitara o tau-tau madoomuku. O ngoru-ngorumino o nyawa yotagi yakaika yakaino mangale yatoomu, daha yawedere ekola yatutuku idadi o go puno, deʼ yadiai idadi o kukisi mabobal̄aana. Ma jame hokä o kukisi yal̄ofo-l̄ofo deʼ o zaitun maminya.

¹⁰O Musa woihene o Israel manyawa gënanga yotaiyana, inoli ima oko-okoino ima totoomu toönanga manga tau-tau mangorana mahimangoka. De ma Jou Ai dohata itoka-tokara hiädono o Musa wa mao ai hininga ihuha.

¹¹De ünanga wïtemo ma Jouika, ”Yadodoa ho Ngona nohidiai o huha hoko nënanga! Boteka Ngona nosanangiua ngohino? Yadodoa ho Ngona nohihi tagongo o nyawa mata-mata nënanga ngohino?

¹²Boteka ngohi tahi ao-ao ahi roëhoka ekola tahi ngohaka geönanga? Yadodoa ho Ngona nohi huloko todadi hokä womatengo o ngohaka wohi danu-danu watotiri o ngohaka mahohumujuru, hiädono ngohi kiani tahi danu-danu önanga kahoko genangika manga dodagi magurutu o tonaka Ngona nahijä jajika toönanga manga ete de ma nga tohoraika?

¹³Nä make, önanga kahoko genangika ima orehe yogahoko o hiode ma akeme. Deʼ kiaka yaika ngohi kokiani talingiri o hiode ma akeme mangale o nyawa mata-mata gënanga?

¹⁴Takunua ngohi tamoku ohi tagongo hoko gënanga ma amoko; itubuho holi o manarama gënanga mangale ngohi!

¹⁵Nako Jou kahoko genangika nohi hidiai ngohi hoko gënanga, nohidora ngohi; iholoi yaoa nohitoma ngohi de majapatioka hupaya ngohi tatagongokaua o hangihara nënanga.”

¹⁶Daha ma Jou wïtemo o Musaika, ”Nä toomu o Israel manyawa manga hidogoronaka yamori tumidi o balu-baluhu yängaku hokä o kawaha manga tutuda. Nä ao önanga Ahi himangoka Ahi Tau magoronaka deʼ nähuloko önanga ima okoino genangokadau ani datekoka.

¹⁷Ngohi aha touti deʼ homä ade-ade genangoka, deʼ o kuaha Tonihi döa-döakoka ngonaika o hidoku moi, aha Ngohi Tahi döaka onangika. Done önanga yakunu inï riwo ngona yamoku ihi tago-tagongo mangale o kawaha nënanga, deʼ ngaro uha ngona namoku noma tengo-tengo.

¹⁸O öraha nënanga nahetongo nënanga o kawahaika gënanga: Nia tebini nia diri mangale iyarehino ngini aha niol̄omo o hiode ma akeme. Ma Jou woihenoka ngini niari deʼ nitaiana ngini nio nahihu ni ol̄omo o hiode ma akeme, deʼ okianaga idadadi nia wowa ngoka iholoi yaoa maöraha o Mesiroka. O öraha nënanga ma Jou aha winihi döaka ngini ohiode ma akeme, deʼ ngini yakunu nia ol̄omo.

¹⁹Ngini aha nia ol̄omo duga-duga kawange moiua ekola o wange hinotoua, ekola o wange motoaua, ekola o wange ngimoiua, maboboloi kao wange monaokua,

²⁰mä madekana o mede moi iahumu ngini nia ol̄omo, hiädono ngini nihi popanyake, deni wuna-wunanga karana enanga. O hali gënanga idadi karana ngini niwi umoka ma Jou naga tingini nia hidogoronaka. De inoli karana ngini niarioka Ahi himangoka deʼ nitaiana ngini nia mal̄aka o Mesir matonaka.”

²¹Daha o Musa wïtemo ma Jouika, ”O kawaha ngohi tä tuda-tuda nënanga manga ngöe yaribuhu o ratuhu butanga. Sarakia Ngona yakunu notemo Ngona aha nahi döaka önanga o hiode ma akeme yä wedono o mede moi madekana?

²²Kiaka yaika naga o hapi deʼ o duba hoko gënanga mangöe kokiani yatoaka mangale önanga yäpunuhu? Boteka mata-mata o nawoko o gahioka yä wedono mangale hahi ol̄omo önanga?”

²³Ma Jou wïbaluhu, ”Boteka naga Ahi kuaha deʼ mabatingi? Ngona aha deʼ majapati namake boteka Taheto-hetongo gënanga igoungu idadi ekola kowali!”

²⁴De o Musa wohupu deʼ wohi ädono o kawahaika gënanga okia ma Jou waheto-hetongoka. O Musa watoomu yamori tumidi deʼ wähuloko önanga ima okoino ma Jou Ai Tau yakilolitino.

²⁵De ma Jou wouti o lobi magoronaka deʼ wï temo-temo o Musaika. O kuaha wihi döa-döakoka o Musaika ma Jou wal̄ë o hidoku moi deʼ wahidöaka o tutuda yamori tumidika gënanga. Maöraha ma Jou Ai Womaha gënanga iuti onanguku, önanga yo mulaenge yopöaka hokä o nabi, mä itedekanua.

²⁶Yamori tumidi o tutuda gënanga manga hidogoronaka yahinoto, o Eldad deʼ o Medad, yogogogere manga tau-tauoka deʼ koyoikua kamamoi deʼ manga dodiawo mahomoa ma Jou Ai Tauika. O tau-tauoka o Womaha iuti onanguku, deʼ önanga yahinoto mayo mulaenge yopöa-pöaka hokä o nabi.

²⁷De womatengo o goduru wohupu woma popäta mangale wohi ngahu o Musaika okia idö dadadi o Eldad deʼ o Medadika.

²⁸O Yosua o Nun aingohaka, wïriwo-riwoka o Musa kawoma goduruikahi, wïtemo o Musaika, ”Bapa, nähuloko önanga ima togumu!”

²⁹O Musa wohaluhu, ”Yadodoa hongona nohipikiri ngohi? Ngohi duru tö nganono hupaya ma Jou wohidöaka Ai Womaha yo ngodumu o nyawaika, deʼ yadiai o nyawa mata-mata önanga yo dadi o nabi!”

³⁰De o Musa womakilioro o tau madoomuika kamamoi de yamori tumidi o Israeloka manga tutuda gënanga.

³¹Itodokanino ma Jou wao o hidal̄oko o gahiha; o hidal̄oko gënanga iao o totaleo o habiana ihoho duru madigi-digiuku, hiädono o tonakoka deʼ o metere moi il̄e. O totaleo-totaleo kai höhoho o tau madoomu gënanga mal̄okuino magurutika hiädono o kilo muruono naga magilolitino.

³²O wange magurutu gënanga deʼ o hutu yahaiwatiki, deʼ o wange magurutu de kai yarehinoli, hagala o nyawa imahi rorahai ya tagoko o totaleo o habiana. O nyawa moi-o nyawa moi yatagoko duru kai hutulu o kilo o ribuhu moi. O totaleo-o totaleo önanga ihi gerewotika o tau-tau madoomu magilolitino hupaya itore.

³³Kahä ngöeohi naga mahiode ma akeme mangale yaol̄omo, ma Jou wangamo o Israel ma nyawaika gënanga deʼ wadotagao moi o panyake o bobaku toönanga manga hidogoronaka.

³⁴De o ngï gënanga ihi romanga ”O Kal̄il̄u malungunu”, karana genangokadau o nyawa yohonenge karana o kal̄il̄u.

³⁵Genangokadau deʼ o Israel manyawa gënanga imatagali o Hazerat madaeraika, deʼ imä tau genangokadau.