Read Tobelo O BILANGAN 13 Bible Online

O BILANGAN 13 - Tobelo bible

O BILANGAN 13

¹Ma Jou wïtemo o Musaika,

²”O Israeloka manga hoana yogetongo nä huloko womatengo manga tutuda-tutudaino manga hidogoronaka mangale yato tailako o Kanaan matonaka aha Tahi döa-döaka o Israel manyawaika.”

³Imamoteke de ma Jou Madutu Ai pareta gënanga, o Paran matonaka ikokakahaoka de o Musa wähuloko önanga. Mata-mata o nyawa geönanga o tutuda-tutuda o Israel manyawa manga hidogoronaka: [Ai hoana] — [Manga tutuda] o Ruben — o Syamua o Zakur aingohaka o Simeon — o Safat o Hori aingohaka o Yehuda — o Kaleb o Yefune aingohaka o Isakhar — o Yigal o Yusuf aingohaka o Efraim — o Hosea o Nun aingohaka o Benyamin — o Palti o Rafu aingohaka o Zebelon — o Gadiel o Sodi aingohaka o Manasye — o Gadi o Susi aingohaka o Dan — o Amiel o Gamali aingohaka o Asyer — o Setur o Mikhael aingohaka o Naftali — o Nahbi o Wofsi aingohaka o Gad — o Guel o Makhi aingohaka

¹⁶Genanga o berera yotö tailako o Musa wähulo-huloko mangale ihidahe o berera gënanga. O Hosea o Nun aingohaka o Musa watagali ai romanga idadi o Yosua.

¹⁷Maöraha o Musa wähuloko önanga ima goraka, ünanga wahi behehongo onangika, ”Nitagi o koremieuku, nïo dumutu o Kanaan matonaka o koreharail̄e idaduoka, de nigila-gila madaera itoto poronika.

¹⁸Nia tailako sarakia o berera gënanga, boteka maberera ma dutu kamanga ngöe ekola manga huhutulu, boteka önanga kamanga kuata ekola yobole.

¹⁹Nia tailako boteka o berera gënanga yaoa ekola kowali, deʼ boteka maberera madutu yogogere o kapo-kapongo imatota wangeuku ekola o kota dema bebeno o mehele magoronaka.

²⁰Nia kekete nia hininga. Nio lega boteka matonaka iburere deʼ magota mautu mangöe. Uha nia wohanga nilio niao mahuhutulu o hohoko iwö wango-wango dokengoka.” O öraha gënanga o ang guru imulaenge ihohoko.

²¹De o nyawa geönanga yoiki o koremieuku deʼ yatailako o berera gënanga yomulaenge o Zin matonaka ikokakahaka o koreharail̄e idaduoka o koremieuku hiädono o Rehob ma kota, o ngekomo o Hamatika madatekoka.

²²Madodihiraka önanga yoiki o bereraika gënanga o korehara il̄e idaduoka deʼ imahiädono o Hebron makotaika, o Ahiman ma nyawa manga ngï, o Sesai deʼ o Talmai, o Enak aidifauku. O Hebron ihigoko o taongo tumidi ihira de o Zoan makota o Mesiroka.

²³De önanga ima hiädono o Eskol mawaioka. Genangokadau önanga yatobiki o jaga moi o angguru mahohoko duru madodubuho, hiädono kokiani yamoku de o gota o dobiki moi yohinotoil̄e. Onanga yoaoli gahumu muruono naga o delima mahohoko deʼ o ara mahohoko.

²⁴O ngï gënanga yahetongo o Eskol mawai karana genangokadau o Israel manyawa yatobiki o angguru mahohoko ma jaga.

²⁵O berera gënanga yatailako madekana o wange moruata de ipaha, o berera yotö tailako gënanga ima kilioro

²⁶deʼ ihi ngahu yoade-ade o Musaika, o Harun deʼ yo ngodumu o Israel manyawa magogiriaka ima toomu o Kades mabereraka o Paran matonaka ikokakahaka. Onanga ihi ade-ade okianaga önanga yamö make-makeoka deʼ ihi matoko o hohoko önanga yao-ao.

²⁷Onanga yato o Musaika, ”Ngomi mia tailakoka o berera gënanga deʼ mia make matonaka ikaya deʼ iburere, deʼ nënanga mahuhu tulu o hohoko dokaino.

²⁸Mä o berera madutu gënanga yokua-kuata. Toönanga manga kota kahä ago-agomo deʼ mabebeno o mehele. De inoli, ngomi mia make o nyawa manga ago-agomo manga difauku.

²⁹O Amalek manyawa yogogere o berera gënanga o korehara il̄e idaduoka; o Het, o Yebus deʼ o Amori manyawa yogogere madaera itotoporonoka; hode o Kanaan manyawa yogogere imoteke ma gurutu o ngöto deʼ imoteke magurutu o Yordan ma Ngairi.”

³⁰Mä o Kaleb wohi rïdi manga hininga o nyawa yototaiana o Musaika. O Kaleb wato, ”O berera gënanga kokiani ngone ha parangi deʼ ngone haora öraha nanga dika, karana ngona kayaoa nanga kuata mangale hahohihanga.”

³¹Mä o nyawa ima idulu yolo lio-lio de o Kaleb gënanga yo temo, ”Kowali, ngone hakunua haparangi önanga. O berera madutu gënanga iholoi yokuata de ngone.”

³²Daha önanga ihi ngahu ihi ade-ade o jarita ielu-eluku o Israel manyawa manga hidogoronaka mangale o berera önanga ya tö tailakoka gënanga önanga yato, ”O berera gënanga duru de mabodito, maboboloi mangale maberera madutu mahirete. O nyawa-nyawa ngomi miä make-make dokengoka duru ma ago-agomo manga roëhe.

³³ Maboboloi mïa make o nyawa hokä o meki, enagënanga o Enak manyawa manga difauku. Mimahi tero de önanga, ngomi mima mao hokä o kahoho, deʼ maraioka hoko gënanga önanga manga damake ngomino.”