Read Tobelo O BILANGAN 14 Bible Online

O BILANGAN 14 - Tobelo bible

O BILANGAN 14

¹O hutu yahaiwatiki o Israel manyawa yopöa-pöaka deʼ yoari

²O nanga yängamo o Musa deʼ o Harunika deʼ yotemo, ”Iholoi yaoa ngone hohonenge o Mesiroka ekola o tonaka ikokakahaka në nanga! Mal̄aika ngone hohonenge dika!

³Mangale okia ma Jou Wonä ao ngone o bereraika gënanga? Ahao ngone hohonenge o parangi magoronaka deʼ nanga heka-hekata inoli nanga ngoha-ngohaka yatagoko. Koigoungua iholoi yaoa homa kilioro dika o Mesirika!”

⁴De önanga ima ketemo moi deʼ moi, ”Kayaoa deʼ ngone homä ngiriki o tutuda womatengo deʼ homakilioro o Mesirika!”

⁵Daha o Musa deʼ o Harun yatilabukuku o kawaha yongodumu manga himangoka,

⁶O Yosua o Nun aingohaka deʼ o Kaleb o Yefuna aingohaka, yahinoto o tonaka yotö tailako gënanga manga hidogoronaka, yakakihi toönanga manga pakeanga manonako manga hininga ihuha.

⁷Onanga yätemo o kawahaika yongodumu gënanga, ”O berera ngomi miatö tailako gënanga duru o tonaka maoa-oa.

⁸Nako ma Jou wona igumal̄a, Unanga aha Wonä ao ngone dokengika deʼ Wonahi döaka o tonaka ikaya-kaya deʼ iboburere gënanga ngoneino.

⁹ Uha hïlawani ma Jou, deʼ uha hämodongo o nyawa yogö gogerika o berera gënanga, hababu de magapanga aha hahohihanga önanga. Wagö goa-goana önanga wämal̄aka önanga, deʼ ma Jou dede ngone. Hoʼ uha nihawana.”

¹⁰O kawaha yongodumu yomau yakaweli önanga de o helewo hiädono yohonenge. Mä itodokanino o nyawa geonanga yamake ma Jou Ai dararono maletongo iböa ai Tau mal̄okuoka.

¹¹Ma Jou Wïtemo o Musaika, ”Hoko kiahi madekana o nyawa neonanga ihi lawani Ngohi? Hiädono muruonoka önanga yoluku ihi ngaku Ngohino, ngarokä Ngohi todiaioka ihera-heranga hoko gënanga mangöe, toönanga manga hidogoronaka?

¹²Ngohi aha täbinaha önanga de tädotagao o panyake o bobaku. Mä ngona aha tonihidadi manga ama o hoana de o berera moi iholoi yoamoko deʼ iholoi yokuata de önanga!”

¹³ Daha o Musa wïtemo ma Jouika, ”Ya, Jou, done o Mesir manyawa yoihene o hali gënanga. Ena hioko de ani kuaha Ngona nomï aoka ngomi mihupu o bereraino gënanga,

¹⁴deʼ önanga aha ihijarita o berera nënanga manyawaika, yoihe-ihenoka bari Ngona, ma Jou, nomi tomoteke ngomi. Onanga yoihenokali Ngona nohi matokoka Ani diri ngomino maöraha Ngona notagi mia himangoka o wange-wange o lobi magoronaka, deʼ o hutu-hutu o uku magoronaka.

¹⁵Nako Ngona nätoma Ani umati yongodumu nënanga, done hagala o hoana de o berera manyawa yoihe-ihenoka kaini heto-hetongo gënanga aha yato,

¹⁶Ngona nätoma Ani umati o tonaka ikokakahaka karana Ngona nakunua na ao önanga o berera Nahi jajajika.

¹⁷Hababu gënanga, Jou, ngohi togahoko, nohi matoko Ani kuaha ngomino deʼ nadiai okia Nomihi jajajioka. Ngona notemoka,

¹⁸ ’Ngohi, ma Jou, koitaitua tongamo. Ngohi tohi matoko Ahi dora deʼ Ahi satia de maboboloi. Ngohi tahi apongo o nyawa yobö baradoha deʼ ihi lawa-lawani Ngohi. Ngaro hoko gënanga ma, o dimono manga howono aha tabalahi manga ngoha-ngohakika deʼ manga dano-danongika, hiädono manga tohora deʼ manga dotumika.’

¹⁹Oraha nanga, Jou, karana ma amoko Ani dora de Ani hayanga deʼ Ngona nosetia Ani jajika, ngohi togahoko, nohi apongo o nyawa neönanga manga baradoha hokä Ngona nohi apongoka önanga kadema dero önanga yamal̄a o Mesir matonaka.”

²⁰De ma Jou wohaluhu, ”Kayaoa, Ngohi aha tahi apongo önanga hokä ngona nogaho-gahoko.

²¹ Mä Ngohi tojaji de tongohi Ahi diri deʼ dede Ngohi towö wango-wango deʼ tokokuaha o duniaka nënanga,

²²o nyawa neönanga kao nyawa moiö ma, koyo wangoua mangale yongohama o berera Tahi jajajioka toönanga manga ete deʼ manga tohoraika. Hababu önanga yoluku ihihi ngounu, deʼ kahoko gënangika ihi taili Ngohi. Ena hioko önanga yamakeoka Ahi dararono ileto-letongo, deʼ ihö hera-heranga Tadodiai o Mesiroka, deʼ o tonaka ikokakahaka.

²³Kowali! Onanga aha yö ngohamua o berera gënanga. Toönanga manga hidogoronaka, ihilö lawa-lawani Ngohi, kao nyawa moiö ma aha koyadokoua o berera gënanga.

²⁴ Mä hoko genangua de ahi gilaongo o Kaleb. Unanga ka hirahi wosetia Ngohino. Hababu gënanga Ngohi aha tïao ünanga o berera ünanga wongoha-ngohamokaika gënanga. Oraha nënanga o Amalek manyawa deʼ o Kanaan manyawa yogogere o tonaka irata-rata gënanga. Mä o daera gënanga aha idadi madutu o Kaleb aidifauku, Ahi gilaongo gënanga. Yarehe ngini kokiani nima idulu deʼ ni oiki o tonaka ikokakahaika yameta o Akaba ma Jiko.”

²⁶Ma Jou watemo o Musa deʼ o Harunika,

²⁷”Hiädono muruonoka hagala o nyawa madorou gënanga yö taiana ngohino? Toönanga manga daiana mata-mata Ngohi toihenoka.

²⁸Ngini kokiani niä baluhu önanga hoko nenanga: Ma Jou wato, ’Ngohi tokoboto karana Ngohi towo wango-wango ngini aha tinidiai hokä ngini nia heto-hetongo Ahi himangoka. Ngohi, ma Jou, totemoka.

²⁹ Ngini nitaianoka Ngohino. Hababu gënanga ngini aha nihonenge, deʼ nia mayeti imahi kabarihika o tonaka ikokakahaka nënanga.

³⁰Mahomoa deʼ o Kaleb deʼ o Yosua nia hidogoronaka nia umuru o taongo monaoko de ihika il̄e kao nyawa moiö ma, aha koyö ngohamua o berera Tini jajajioka nginika gënanga.

³¹Ngini nitemoka nia ngoha-ngohaka aha yatagoko. Mä önanga aha Ngohi ta ao o bereraika ngini nia olu-oluku gënanga.

³²Enahioko ngini aha nihonenge o tonaka ikokakahaka nënanga.

³³ O taongo moruata madekana nia ngoha-ngohaka aha yakaika yakaino yodagi-dagi o tonaka ikokakahaka. Karana ngini nisetiaua, nia ngoha-ngohaka gënanga aha yohuha de yohangihara, hiädono o nyawa mabobahaka tingini nia hidogoronaka yohonengoka.

³⁴Ngini aha nia tagongo nia baradoha mahasili otaongo moruatino madekana; o wange moruata ngini nia pake mangale nia tailako o tonaka gënanga hoʼ o taongo moi yaetongo o wange moi Ngini aha nihi öriki sarakia nia mao nako Ngohi tinï kawingi ngini.

³⁵Ngohi tokoboto Ngohi aha tadiai o hali gënanga nginika, o nyawa madorou nima hikagaro mangale nihi lawani Ngohi. O tonaka ikokakahaka nënanga ngini mata-mata aha nihonenge. Ngohi ma Jou, totemoka.’ ”

³⁶Hagala o nyawa o Musa wahulo-hulokoka mangale ya tailako o tonaka gënanga, yogilio yoao o ade-ade ihingahu i tiaiua mangale o berera gënanga, deʼ o hali gënanga, dadi o hababu o Israel manyawa yotaiana ma Jouika. Karana gënanga ma Jou wähukumu önanga hiadono önanga yohonenge yakorona o panyake.

³⁸Yangimoi de yahinoto yotö tailako gënanga duga-duga o Yosua deʼ o Kaleb kayowangohi.

³⁹O Musa wahiädono ma Jou Ai behehongo o Israel manyawaika de ipaha, o Israel manyawa gënanga yapake o huha mapakeanga deʼ manga hininga ihuha.

⁴⁰Yarehino mawange duru o ngoru-ngorumino, önanga imahi diai yomau yodoa o loku matubuil̄e, ”Igoungu ngomi mibaradohaka. Mä o öraha nanga ngomi mimahi diaioka mangale mioiki o ngï ma Jou womihi dumu-dumutika.”

⁴¹Mä o Musa watemo, ”Yadodoa hoʼ o öraha nënanga nimau nia tilakuru ma Jou Ai pareta?

⁴²Uha nioiki! Ngini aha nia haturu ini hohihanga karana ma Jou winï tomotekua.

⁴³Maöraha ngini nimateke rihimanga de o Amelek manyawa deʼ o Kanaan manyawa gënanga, ngini aha nihonenge o parangi magoronaka. Ma Jou aha dede nginiua karana ngini nioluku niwihi ngounu Unangika.”

⁴⁴Mä o Israel manyawa gënanga kayö nekatohi yodumutu ol̄oku matubu gënanga, ngarokä o Musa deʼ o Jaji ma Peti koya mal̄aua o tau madoomu gënanga.

⁴⁵De o Amelek deʼ o Kanaan manyawa yogogogere genangoka yaparangi deʼ yahohihanga o Israel manyawa gënanga inoli yaginïki önanga hiädono o Hormaika.