Read Tobelo O BILANGAN 15 Bible Online

O BILANGAN 15 - Tobelo bible

O BILANGAN 15

¹Ma Jou wohidöaka o Musaika

²o datoro-o datoro nënanga kokiani o Israel manyawa ya diai o bereraka aha ma Jou wahidöaka onangika.

³Mangale o huhuba yatö tuhu-tuhuku ekola o huhuba ifangu manga jaji ekola o huhuba hininga mahuka ekola o huhuba o wange ma amoko biaha, ngini yakunu nihihuba ma Jouika: o hapi manauru, o duba manauru, o duba ekola o kabingi. O huhuba-huhuba gënanga mabounu yasanangi ma Jou Ai hininga.

⁴O nagona honanga ihihuba o duba ekola o kabingi mangale o huhuba yatö tuhu-tuhuku ma Jouika, önanga kokiani yoaoli ihi domoteke de o aiwani o gigini gënanga o dutu moi-moi, o gopuno o kilo moi ihi ganu de o zaitun maminya o litere moi mangale o huhuba ihi dodiaiuku, deʼ o litere moioli o angguru,

⁶Nako ihihö huba-huba gënanga o duba manauru o dutu moi, kokiani ihi hubaö o kilo hinoto o gopuno ihiganu de o zaitun maminya o litere moi de mahononga mangale o huhuba ihi dodiaiuku,

⁷deʼ o angguru o litere moi de mahononga. O huhuba gënanga mabounu yasanangi ma Jou Ai hininga.

⁸Nako ihihö huba-huba gënanga o hapi manauru o dutu moi mangale o huhuba yatö tuhu-tuhuku ekola o huhuba o jaji ma bobangu ekola o dame mahuhuba,

⁹kokiani ihihubaö o gopuno o kilo hange ihi ganu de o zaitun maminya o litere hinoto mangale o huhuba ihi dodiaiuku, deʼ o angguru o litere hinoto.

¹⁰O huhuba gënanga mabounu yasanango ma Jou Ai hininga.

¹¹Genanga doka kokiani ihihuba ihi domoteke de o hapi manauru o dutu amo moi, o duba manauru, o duba ekola o kabingi.

¹²Nako ihihö huba-huba gënanga iholoi de o dutu moi o aiwani o gigini, done o gopuno ihi huba-huba, o minya de o angguru gënanga makokiani yodogo ima kokadaene.

¹³O hali gënanga kokiani moi-moi o Israel manyawa yadiai maöraha önanga ihihuba. O huhuba gënanga mabounu yasanangi ma Jou Ai hininga.

¹⁴O nyawa maporetino womatengo wogö gogere tingini nia hidogoronaka kayaoa wohijai-jai ekola wohigila-gila, kokiani wamoteke mata-mata o datoro gënanga maöraha ünanga wohihuba o huhuba o inomo mabounu yasanangi ma Jou Ai hininga.

¹⁵ Mata-mata o tita deʼ o datoro gënanga kai maketero mangale ngini deʼ o nyawa maporetino yogogogere tingini ni hidogoronaka, hababu ngini deʼ önanga gënanga kani maketero ma Jou Ai lolega magoronaka. Deʼ o hali gënanga imadadi kahi ado-adonika.

¹⁷Ma Jou wohi döaka o Musaika

¹⁸o dato-datoro nënanga o Israel manyawa kokiani yadiai o bereraka aha ma Jou wahi döaka onangika.

¹⁹Nako ngini nimulaengoka nia ol̄omo okia ihihö hasi-hasili o berera gënanga ngini kokiani nia tingaka o hidoku moi mangale ihihö huba-huba yatinga-tingakika mangale ma Jou.

²⁰Nako ngini niharongo o roti o gandum madodi hirakaino nia utuku, o roti gënanga kokiani ihihuba hokä o huhuba yatinga-tingakoka ma Jouika. Nihihuba madodagi imatero de madodagi nihi huba o gandum madodihiraka nia tutuku.

²¹Moi-moi o roti o gandum madodi hirakaino nia utuku gënanga kokiani kahi ado-adonika ngini nihi döaka hokä o huhuba yatinga-tingakoka ma Jouika.

²²Nako ngini nihangajaua nialipa moiani o datoro ma Jou wohi döa-döaka o Musaika, imulaenge mawange ma Jou wo hidöaka o datoro gënanga deʼ igila-gila o ngohaka de o danongo, deʼ o howono gënanga yadiai karana o umati ihiörikua o datoro gënanga, done o umati yongodumu kokiani ihihuba o hapi manauru o dutu moi mangale o huhuba yatö tuhu-tuhuku. Ihidomoteke de gënanga kokiani ihihuba o huhuba ihi dodiaiuku deʼ o angguru hokä ihitö tantuoka. O huhuba gënanga mabounu yasanangi ma Jou Ai hininga. Mahomoa de gënanga kokiani ihihuba o duba manauru o dutu moi mangale o baradoha ma apongo mahuhuba.

²⁵De ma imam kokiani wodiai o baradoha ma apongo ma upacara mangale o umati. Done önanga aha yä apongo karana önanga yodiai o howono gënanga koyohangajaua, deʼ karana önanga yoaoka o bara doha ma apongo mahuhuba de inoli o huhuba yatö tuhu-tuhuku ma Jouika.

²⁶Yongodumu o Israel manyawa deʼ o nyawa maporetino yogo gogere toönanga manga hidogoronaka aha tahi apongo, karana mata-mata koyohangajaua yö ngohamoka o howonika gënanga.

²⁷ Nako womatengo dika wohangajaua wobaradoha, done ünanga kokiani wohihuba o kabingi mabeka o dutu moi maumuru o taongo moi mangale o baradoha ma apongo mahuhuba.

²⁸Ma imam kokiani wadiai o baradoha ma apongo ma upacara ma Jou Ai himangoka, hupaya o nyawa geünanga ai baradoha iapongo.

²⁹O datoro gënanga idadioli mangale o nagona dika yohangaja ua yodiai o baradoha, kayaoa ünanga gënanga o Israel manyawa ekola o nyawa maporetino yogogogere toönanga manga hidogoronaka.

³⁰Mä nako o Israeloka womatengo ekola o nyawa maporetino wo hangaja wodiai o baradoha ünanga wihikauku ma Jou. O nyawa geünanga kokiani iwi hukumu iwi hohonenge,

³¹karana ünanga wilawani ma Jou deʼ wohangaja watilakuru ma Jou Ai tita. O nyawa geünanga wohonenge karana ai howono mahirete.

³²Maöraha o Israel manyawa naga o tonaka ikokakahaka, o nauru womatengo iwimake magogiriaka wotoomu o gota homahi dofo-dofo o Sabat mawangeoka.

³³O nyawa geünanga iwiao wähimanga o Musa, o Harun deʼ yongodumu o umati,

³⁴de iwï tumungu karana yanako itiai owahi ünanga kokiani iwï sarakia.

³⁵Ma Jou witemo o Musaika, ”O nyawa geünanga kokiani iwi hukumu iwi hohonenge. Unanga kokiani iwi hihupu de o tau madoomu deʼ dokengoka yongodumu o umati kokiani iwi kaweli de helewo hiädono wohonenge.”

³⁶De yongodumu o umati iwiao iwihi duono o tau madoomu maporetika de iwi kaweli ünanga de o helewo hiädono wohonenge, hokä ma Jou wohi popareta.

³⁷Ma Jou wïhuloko o Musa

³⁸ wahetongo o Israel manyawaika, ”Nia pakeanga mabarenika barenika nia diai o rami-ramini deʼ maramini yogetongo nihiliko o lawe mabihi-bihi. Genanga kokiani nia diai hiädono nia ngohaka de nia danonguku.

³⁹O rami-ramini gënanga mangale o hohininga. Ngini nia make magetongo, ngini niohininga hagala Ahi pareta deʼ nihi ngounu. Deʼ karana gënanga ngini aha konihi wohangua Ngohi mangale nia moteke nia nahihu deʼ nia hininga mahuka mahirete.

⁴⁰O rami-ramini gënanga aha inihidöaka o hohininga mangale mata-mata Ahi pareta, hiädono ngini igou-goungu nidadi Tongohi madutu.

⁴¹Ngohi ma Jou nia Jou Madutu; Ngohi tinïao ngini nihupu o Mesirino hupaya Ngohi todadi nia Jou Madutu. Ngohi nia Jou.”