Read Tobelo O BILANGAN 18 Bible Online

O BILANGAN 18 - Tobelo bible

O BILANGAN 18

¹Ma Jou wïtemo o Harunika, ”Ngona, ani ngoha-ngohaka deʼ hagala o Lewi manyawa kokiani mabahaika nia tagongo hagala o howono idö dadadi Ahi Tau magoronaka, mä duga-duga ngona deʼ ani ngoha-ngohaka dika kokiani nia tagongo mahowono o imam-imam manga manarama magoronaka.

²Ani roriadodoto, o Lewi ai hoana, kokiani ngona nahidomoteke hokä yorö riwo-riwo manga manarama yadiai magoronaka deʼ ani ngoha-ngohaka manga manarama.

³O Lewi ai hoana kokiani yadiai okianaga yadodiai deʼ yakarajanga toönanga manga manarama Ahi Tauoka, mä önanga yakunua yatigika o huhuba mangï ekola yapeke o bara-baranga madebi-debini o Ngï iTebi-tebinoka. Nako önanga yatilakuru o datoro gënanga, kayaoa önanga kayaoa ngini aha nihonenge.

⁴Onanga kokiani yakarajanga nimako moteke dede ngini deʼ yadiai hagala o manarama imadohanga de hagala o leleani Ahi Tau magoronaka, mä yahidöakua o haku mangale gënanga, yaduhunu yokarajanga nimakomoteke dede ngini.

⁵Duga-duga ngona, o Harun, deʼ ani ngoha-ngohaka kokiani yadiai o manarama o Ngï iTebi-tebinoka deʼ o huhuba mangï, hupaya Ngohi botohi tängamo o Israel manyawaika.

⁶Igou-goungu, Ngohi tä irikoka ani roriadodoto hagala o Lewi manyawa o Israel manyawa manga hidogoronaka hokä o ngongike mangale ngona. Onanga yätingakoka mangale Ngohi, mangale yoleleani Ahi Tauoka.

⁷Mä duga-duga ngona deʼ ani ngoha-ngohaka dika yakunu ihi dagi o manarama hokä ma imam, hagala o manarama magoronaka ima dohanga de o huhuba mangï deʼ okianaga yamake-make o Ngï Duru i Tebi-tebinoka. Genanga ngona nomahi tagongo, karana Ngohi tini hidöakoka ngini nia pangkati hokä ma imam. Moi-moi o nyawa yahidöakua o haku gënanga aha yahukumu yahohonenge nako yatigika o bara-baranga madebi-debini gënanga.”

⁸Ma Jou wïtemo o Harunika, ”Nohohininga! Mata-mata o huhuba yatö tinga-tingaka ihidöaka Ngohino, yatö tuhu-uhukua gënanga mangale ngona. Genanga ani hidoku ihitö tantuoka mangale kahiädo-ädonika. Genanga Tonihi döaka ngonaika deʼ ani ngohaka deʼ ani danongo manga ngoha-ngohakika.

⁹O huhuba-huhuba duru itö tebi-tebinino gënanga yatö tuhu-tuhukua o huhuba mangï mal̄okuoka, imakoki nïkika nënanga ganga mangale ngona: O huhuba ihi dodiaiuku, o baradoha ma apongo mahuhuba deʼ o rugi madagali mahuhuba. Mata-mata gënanga o huhuba itebi-tebini idadi ani hidoku deʼ ani ngoha-ngohaka manga hidoku.

¹⁰Genanga ganga itebini mangale ngona, hoʼ kokiani ngini nia ol̄omo o ngï itebi-tebinokali. Duga-duga o nau-nauru yakunu yaol̄omo.

¹¹Hagala o huhuba yatö tinga-tingaka mahomoahi ihihö huba-huba o Israel manyawa, gënangö mangale ngona. Ngohi tohidöaka ngonaika inoli ani ngoha-ngohakika o nau-nauru deʼ o ngoheka. O datoro gënanga yakunu ipake mangale kahi ädo-ädonika. Moi-moi ani tau madol̄a yopese-pesekua yakunu yaol̄omo.

¹²Tonihi döaka ngonaika hagala duru maoa-oa yautuku madodi hiraka ihihö huba-huba o Israel manyawa Ngohino o taongo ihi getongo, enagënanga o zaitun maminya, o angguru mateongo deʼ o gandum.

¹³Mata-mata gënanga ganga mangale ngona. Moi-moi ani tau ma dol̄a yopese-pesekua yaol̄omo.

¹⁴ Hagala moi-moi o Israel ma tonakoka yatö tinga-tingakoka mangale Ngohi, gënanga mangale ngini.

¹⁵Mata-mata madodihiraka imakil̄au o nyawa manga hidoronaka, kayaoa o aiwani ihihö huba-huba o Israel manyawa Ngohino gënanga ani hidoku. Mä ngini kokiani nia tuhuhu nia ngoha-ngohaka o riaka, nia aiwani ihoharamuö madodihiraka ingohaka.

¹⁶O ngoha-ngohaka kokiani nia tuhuhu maöraha toönanga manga umuru o mede moi. Ma ija ihitö tantu mangale gënanga enagënanga o tiwi haaka motoa, imoteke ma ija ipake-pake Ahi Tauoka.

¹⁷Mä o hapi, o duba deʼ o kabingi madodihiraka mangohaka, yakunua nia tuhuhu. O aiwani o giginii gënanga biaha ipatutu mangale Ngohi deʼ kokiani ihihuba. Nihituagi ma awunu o huhuba mangïika deʼ nia tuhuku mahaki hokä o huhuba. Maboonu yasanangi Ahi hininga.

¹⁸Ma hiode ma akeme gënanga mangale ngona, imatero hokä o alu mangunungu, magaono maniraka o huhuba ihidö dumu-dumutu Ngohino.

¹⁹Mangale kahi ado-adonika, mata-mata o huhuba yatö tinga-tingakoka yao-ao o Israel manyawa Ngohino, tohidöaka ngonaika deʼ ani ngoha-ngohakika o nau-nauru deʼ o ngongoheka. O datoro gënanga ipake mangale kahi ado-adonika deʼ idadi o jaji maninïkutu yakunua idadiokaua Ngohi dede ngona nanga hidogoronaka de ani difauku.”

²⁰Ma Jou Wïtemoli o Harunika, ”Ngini nia makeua o puhaka. O berera Tohi jajaji gënanga koiwa naga kao hidoku moiö ma idadi tingini madutu. Ngohi, ma Jou, gënanga ani puhaka ma hidoku.”

²¹ Ma Jou Wato o Harunika, ”Hagala o Israel manyawa manga huhuba yaregu ngimoi maregu moi Tahidöaka o Lewi manyawaika. Genanga toönanga manga puhaka mahidoku mangale toönanga manga karajanga Ahi Tauoka.

²²Hagala o Israel manyawa mahomoa yakunokaua yatigika o Tau gënanga hupaya önanga uha yadotagao o baradoha deʼ o hukumanga o honenge toönanga manga diriuku.

²³Mulaenge o öraha nënanga duga-duga o Lewi manyawa yakunu ihi dailako ahi Tau deʼ imahi tagongo itotomo o manaramika gënanga. O datoro gënanga ipakeoli mangale ani difauku kahi ado-adonika. O Lewi manyawa koiwa toönanga manga puhaka o Israel ma tonakoka,

²⁴karana mangale toönanga manga puhaka mahidoku Ngohi tahi döakoka hagala o huhuba yarö regu-regu ngimoi maregu moi ihi hö huba-huba o Israel manyawa Ngohino hokä o ngongike yatö tinga-tingaka. Mahababu gënanga mangale o Lewi manyawa Ngohi totemo önanga aha koya makeua o puhaka mahidoku o Israel ma tonakoka.” Ma Jou Wïhuloko o Musa

²⁵wohi ädono o pareta nënanga o Lewi manyawaika. Nako ngini nia tarima o Israel ma nyawaino o huhuba yarö regu-regu ngimoi maregu moi ma Jou Wohi döa-döaka nginika mangale nia hidoku, kokiani ngini nihi döaka yaregu ngimoi maregu moi ma Jouika mangale nia huhuba itö tinga-tingaka.

²⁷O huhuba itö tinga-tingaka gënanga nia pulono kaimatero de o huhuba o gandum mahungi deʼ o angguru mateongo mahungi.

²⁸De hoko gënanga nginiö kokiani nihihuba mangale o huhuba itö tinga-tingaka ma Jouika o hidoku moi o Israel manyawa manga huhubaino yarö regu-regu ngimoi mahidoku moi. O huhuba itö tinga-tingaka gënanga kokiani ngini nihidöaka ma Imam Harunika.

²⁹Nihidöaka mahidoku duru maoa-oa okia ngini nia totarima.

³⁰Nihidöaka o hidoku gënanga de iböto, ngini yakunu nia l̄ë mahou, hokä womatengo wototumuleö ünanga wao ai huhuba de iböto wal̄ë okianaga mahou ohi.

³¹Mahou gënanga yakunu ngini nia ol̄omo okiaka dika kama moi de ani tau madol̄a, hokä ani karajanga mahewa ma Jou Ai Tauoka.

³²Ngini nia howonua nako nia ol̄omo, iti yakunu mahidoku ma oa-oa ngini nihihubaka ma Jouika. Uha nia peseke o Israel ma nyawa manga huhuba itebi-tebini de nia ol̄omo okianaga moi o huhubaino gënanga ihira de mahidoku duru maoa-oa nia tingaka mangale ma Jou. Nako ngini nia tilakuru o pareta nënanga ngini aha nihonenge.