Read Tobelo O BILANGAN 19 Bible Online

O BILANGAN 19 - Tobelo bible

O BILANGAN 19

¹Ma Jou wahipareta o Musa deʼ o Harun

²mangale ihidöaka o datoro-datoro nënanga o Israel manyawaika: yal̄ë o hapi mabeka madoka-dokara o dutu moi koiwa manabo deʼ komaiwahi yapake ihimoku o gina.

³Ihi döaka o hapi gënanga ma Imam Eleazarika. O aiwani gënanga kokiani yao ihihupu o tau madoomuoka deʼ yatoaka ma imam ai himangoka.

⁴De ma Imam Eleazar kokiani wal̄ë mahuhutulu o aiwani gënanga ma awunu deʼ wodohurero wohigali matumudi mahimangino ma Jou Ai Tauika.

⁵O aiwani gënanga ingodumu, makai, ma akeme, ma awunu deʼ ma mamata madol̄a, kokiani yatuhuku ma imam ai himangoka.

⁶De ihi gali-galioli ma imam kokiani wal̄ë o aras ma gota mahuhutulu, o hisop o tage moi deʼ o gumini madoka-dokara o ramini moi de wohikaweli o uku magoronaika magogiriaka yatuhuku o hapi madoka-dokara gënanga.

⁷De ipaha ma imam kokiani wafoka ai pakeanga deʼ woma ohiki. Genanga de iböto ünanga yakunu wowohama o tau madoomu magoronaika, mä ünanga kawopesekohi hiädono o wange itumunu.

⁸O nyawa watö tuhu-tuhuku o hapi gënanga kokiani wafoka ai pakeanga deʼ womaohiki; unangö kawo pesekohi hiädono o wange itumunu.

⁹ De ima tengo ani yopese-pesekua kokiani yatoomu o hapi gënanga makafo deʼ yakelenga o ngï madebi-debinoka o tau ma doomu maporetoka. O kafo gënanga igogono genangoka hupaya o Israel manyawa yakunu yapake mangale yodiai o debini ma upacara ma akere mangale o baradoha iehe.

¹⁰O nyawa watotoomu o hapi makafo gënanga kokiani wafoka ai pakeanga, mä ünanga wopeseke hiädono o wange itumunu. O datoro gënanga ipake kahi ado-adonika, kayaoa mangale o Israel manyawa kayaoa o nyawa maporetino yogogogere tingini nia hidogoronaka.

¹¹O nyawa yakorona o mayeti idadi yopeseke madekana o wange tumidi.

¹²Mawange mahangeoka deʼ matumidoka ünanga kokiani watebini ai diri de o upacara ma akere, dahao ünanga wotebini. Mä nako mawange mahangeoka deʼ matumidoka ünanga watebinua ai diri, ünanga kahirahi wopeseke.

¹³O nyawa yakorona o mayeti deʼ watebinua ai diri gënanga wopeseke, karana ünanga iwi tuagi owahi de o upacara ma akere. Unanga wapeseke ma Jou Ai Tau deʼ karana gënanga iwi etongoka ua ma Jou Ai umati.

¹⁴Nako imatengo ani yohonenge moi o tau magoronaka, o nagona dika naga o tau gënanga magoronaka ekola yowohama magoronaika, yodadi yopeseke madekana o wange tumidi.

¹⁵Mata-mata o kendi de o bohoko koiwa-iwa madadamunu idadi ipeseke.

¹⁶Moi-moi o nyawa yakorona o nyawa yätoma de yohonenge manga mayeti, ekola yohonenge mahirete o dumuleoka yopeseke o wange tumidi madekana. Hoko genangoli o nyawa yapeke-peke o lungunu ekola o nyawa yohone-honengoka manga kobongo.

¹⁷Mangale yatebini o nyawa yopese-peseke gënanga, kokiani yal̄ë o kafo mahuhutulu o hapi mabeka madoka-dokara yatuhu-tuhukoka mangale o baradoha ma apongo. O kafo gënanga kokiani ihi ngohama moi o bohoko magoronauku, daha yöguhe o akere yol̄o l̄ë l̄ë o akere ihä hahurino.

¹⁸O hali madodihiraka magoronaka, enagënanga nako naga o nyawa yohonenge o tau magoronaka, o nyawa yopese-pesekua kokiani yal̄ë o hisop o tage moi, yatono o akere gënanga ma goronauku, daha wodohurero o tauika gënanga deʼ hagala moi-moi naga magoronaka de hagala o nyawaö naga genangokadau. O hali mahinotoka magoronaka, enagënanga womatengo ani iwi korona o mayeti, o lungunu ekola o nyawa yohone-honengoka manga kobongo, o nyawa yopese-pesekua kokiani wïdohurero o nyawa wo pese-pesekika gënanga de madodagi kaimatero dika.

¹⁹Unanga kokiani wïdohurero o wange mahangeoka deʼ o wange matumidoka. O wange matumidoka gënanga ibötoka o nyawa yo pese-peseke madebini gënanga ma upacara. O nyawa gënanga kokiani wafoka ai pakeanga deʼ womaohiki. Imulaenge maöraha o wange itumunu ünanga idadi wotebini.

²⁰O nyawa yopese-pesekoka deʼ yadiaiua ai diri madebini ma upacara, kahirahi wopeseke karana iwi tuagi owahi de o upacara ma akere. Unanga wapeseke ma Jou Ai Tau, deʼ iwi etongokaua ma Jou Madutu Ai umati.

²¹O datoro gënanga ipake kahi ado-adonika. O nyawa wadö dohurero o upacara ma akere gënanga unangö kokiani wafoka ai pakeanga, deʼ o nyawa iwi kokorona o akere gënanga idadi wopeseke hiädono o wange itumunu.

²²O baranga wapeke-peke idadi yopeseke, de o nyawa mahomoa yapeke, idadi ipeseke hiädono o wange itumunu.