Read Tobelo O BILANGAN 20 Bible Online

O BILANGAN 20 - Tobelo bible

O BILANGAN 20

¹O mede mamoioka magoronaka yongodumu o Israel manyawa ima hiädono o Zin matonaka ikokakahaoka deʼ yogogere ihigila o Kades ma tonakoka. O ngo Miryam mohonenge deʼ imi lungunu genangokadau.

² O öraha moiuku toönanga manga tau madoomuoka koiwa o akere. Done hagala o nyawa gënanga yahidoomuino o Musa de o Harun

³de yongamo, ”Iholoi yaoa koaho ngomi mihonenge ma Jou Ai himangoka mimako moteke de tongomi mia roriadodoto!

⁴Yadodoa hoʼ ngini nimïao ngomi o tonaka ikokakahaino nënanga? Boteka hupaya ngomi mihonenge nenangoka kamamoi de tongomi mia aiwani o gigini?

⁵Mangale okia ngini nimïao ngomi o Mesiroka de mihupu mioiki o ngï ihö hangiharaika nënanga okia-kiaua yakunu mio datomo? Nenangoka koiwa o gandum, koiwa o ara mautu, o angguru, deʼ o delima. Maboboloi o akere haoke-okere makoiwa!”

⁶O Musa deʼ o Harun yoiki yätingaka magurutika o nyawa ge önanga daha ima okoino ma Jou Ai Tau mangorana madatekoka. Onanga imahi tudukuku, de ma Jou Ai himanga madararono yadi hiwara önanga.

⁷Ma Jou wïtemo o Musaika,

⁸”Na l̄ë o diki-diki gënanga naga o Jaji ma Peti mahimangoka, daha ngona deʼ o Harun kokiani nia toomu o kawaha yongodumu. Toönanga manga himangoka mata-mata, ngona kokiani na temo o doporono o helewoika naga genangoka hupaya ihiguihi o akere. Hoko gënanga ngona nohihupu o akere o doporono o helewoino gënanga hupaya o kawaha deʼ toönanga manga aiwani o gigini yakunu iokere.”

⁹Done o Musa woiki wal̄ë o diki-diki gënanga hokä ma Jou wihipareta.

¹⁰O Musa deʼ o Harun yätoomu o doporono o helewo gënanga mahimangoka. Daha o Musa wotemo, ”Ni ihene hei kawaha nilawa-lawani! Boteka ngomi kokiani mihihupu o akere o doporono o helewoino nënanga mangale ngini?”

¹¹De o Musa wagoraka o diki-diki gënanga deʼ wagohara o doporono o helewoika gënanga wohigali mahinoto. Done o akere ihahuru makuata, hiädono o nyawa mata-mata deʼ o aiwani o gigini yakunu iokere.

¹²Mä ma Jou wätaaere o Musa deʼ o Harun wato, ”Karana ngini ikuranga nihingaku Ngohino mangale nihi nyata Ahi kuaha itebi-tebini o Israel manyawa manga himangoka, ngini aha konia tudaua önanga yongohama o berera Tahi jajaji onangika.”

¹³Genanga o Meriba majobubu. Genangoka mangï hagala o Israel manyawa iwi ngamo ma Jouika, deʼ genangokaö ma Jou wo himatoko Ai kuaha itebi-tebini o Israel manyawaika gënanga.

¹⁴O Kades de ipaha, o Musa wahi dingoto o huhuloko-huhuloko mangale iwï himanga ma koano Edom. Onanga yato, ”Ngomi o Israel manga hoanino kanagaohi o giadutu dede ngona ahi Tuanga. Ahi Tuanga maraioka nohi öriki o huha imï bänga ngomi.

¹⁵Mia ete de mia tohora yoiki o Mesirika deʼ yogogere dokengoka dema tao-taongo madekana. Tongomi mia ete de mia tohora deʼ ngomi o Mesir manyawa imihidiai itorou,

¹⁶deʼ ngomi mipoaka ma Jouika migahoko o roriwo. Unanga woihene tongomi mia böaka deʼ wahuloko o malaekat ima tengo. O malaekat gënanga womï tuda ngomi o Mesiroka de mihupu. Oraha nënanga ngomi naga o Kadesoka, moi o kota ahi Tuanga ani daera mabatingoka.

¹⁷Ngomi migahoko ahi Tuanga tanu nomau nomi higumal̄a ngomi mia tilakuru o berera nënanga. Ngomi deʼ mia aiwani o giginii aha mio rehenua o ngekomo deʼ aha komi wohamua o dumule-dumuleika ekola o angguru madumuleika. Ngomi aka komia okerua o akere ani humuino ahi Tuanga. Ngomi mia nonu o ngekomo ma amoko dika hiädono ngomi mihupu ani daeraino ahi Tuanga.”

¹⁸Mä o Edom manyawa yohaluhu, ”Ngini minï higumal̄aua nia tilakuru tongomi mia daera. Nako ngini niributu, ngomi aha minï parangi ngini!”

¹⁹O Israel manyawa yato, ”Ngomi aha mitagi mia nonu o ngekomo ma amoko, deʼ nako ngomi ekola tongomi mia aiwani o gigini yaokere nia akere, ngomi aha mifangu. Ngomi duga-duga mio igo mia tilakuru.”

²⁰O Edom manyawa yotemoli, ”Yakunua!” Daha önanga yohupu de manga tentara yokua-kuata mangale yaparangi o Israel manyawa.

²¹Done o Israel manyawa ima idulu deʼ yalingiri o ngekomo mahomoa hababu o Edom manyawa yahigumal̄aua yatilakuru toönanga manga daera.

²²O Israel manyawa yongodumu yamal̄a o Kades de ima hiädono o Hor mal̄okuika,

²³O Edom mabatingoka. Genangoka ma Jou wätemo o Musa deʼ o Harunika,

²⁴”O Harun aha kowowohamua o bereraika Tahi jajajioka o Israel manyawaika; ünanga aha wohonenge karana ngini ini honotö nia lawanoka Ahi pareta o Meriba majobubu madatekoka.

²⁵Nä ao o Harun deʼ o Eleazar, aingoha-ngohaka, nidöa o Hor mal̄okuil̄e.

²⁶Nahuputu o Harun ai pakeanga deʼ nihi nöa o Eleazaruku. O Harun aha wohonenge o ngïoka gënanga.”

²⁷O Musa wadiai okia ma Jou wohipopareta. O Musa, o Harun deʼ o Eleazar yodoa o Hor mal̄okuil̄e o kawaha yongodumu yohakihi.

²⁸ De o Musa wahuputu o Harun ai pakeanga deʼ wihinöa o Eleazaruku. Ol̄oku matubuoka gënanga o Harun wohonenge, de ipaha o Musa deʼ o Eleazar youti imakilioro.

²⁹Yongodumu o kawaha yoihene o Harun wohonengoka, deʼ önanga mata-mata yapake o huha mapakeanga mangale ünanga o wange moruange madekana.