Read Tobelo O BILANGAN 21 Bible Online

O BILANGAN 21 - Tobelo bible

O BILANGAN 21

¹ O Arad gënanga moi o kota o Kanaan maberera mahidokuoka koreharail̄e idaduoka. O kota gënanga ma koano maöraha wo ihene o Israel manyawa yakaino yatilakuru o Atarim mangekomo, ünanga woiki wä parangi önanga deʼ wätagoko yamuruona naga toönanga manga hidogoronaka.

²De o Israel manyawa yojaji ma Jouika hoko nënanga, ”Nako Ngona nomihi döaka o utumu biaha ipatutu ngomino o nyawa geonangika, önanga deʼ hagala manga kota aha ngomi mia binaha hiädono imata.”

³Ma Jou watarima o Israel manyawa manga gogahoko deʼ wä riwo önanga wähihanga o Kanaan manyawa. Done o Israel manyawa yäbinaha o Kanaan manyawa gënanga de inoli toönanga manga kota, de o ngï gënanga önanga ihi romanga o Horma.

⁴ De ipaha o Israel manyawa yamal̄a o Hor mal̄oku, deʼ yal̄ë o ngekomo yodumutu o Akaba ma Jikoika, mangale yogiloliti o Edom madaera. Mä o ngekomo mahoanoka, o kawaha gënanga imataka manga sabari,

⁵ deʼ yongamo ma Jou Madutuika deʼ o Musaika. ”Yadodoa, ho ngona nomï ao ngomi o Mesir mabereraka de mihupu? Boteka mangale imï toma ngomi o tonaka ikokakahaka nënanga? Nenangoka koiwa o inomo, deʼ o akere makoiwa. Ngomi mio gihounu dede o inomo ma ake-akere nënanga!”

⁶Ho ma Jou wädotagao o dodiha ibiha-biha o kawaha gënanga manga hidogoronaka. O Israel manyawa manga ngoë yohonenge yätuduku o dodiha-dodiha gënanga.

⁷De o kawaha gënanga yaino iwï himanga o Musa deʼ yotemo, ”Ngomi mibaradoha karana minï ngamo ma Jouika deʼ ngonaika. Nomä niata ma Jouika hupaya o dodiha-dodiha gënanga ikurutika dede ngomi.” Done o Musa waniata o kowaha gënanga.

⁸De ma Jou wihuloko o Musa wodiai o dodiha tabaga o gahumu moi, deʼ wakelengauku moi o liate mal̄okuoka. Moi-moi o nyawa yätudu-tudukoka o dodiha, aha yotogumu nako yölega o dodiha o tabaga gënanga.

⁹ Done o Musa wodiai o dodiha tabaga deʼ wakelengauku o liate mal̄okuoka. Moi-moi o nyawa yätudu-tuduku o dodiha, yakunu yotogumu nako yapulono o dodiha tabagaika gënanga.

¹⁰O Israel manyawa imä joboli, deʼ imä tau o Obot ma kotaka.

¹¹O ngï gënanga yamal̄a de ibötoönanga imä tau o Abarim maberera magiliangoka o tonaka ikokakahaka o Moab madaera o wange mahiwaroka idaduoka.

¹²De ipaha önanga imä tau o Zered ma Waioka.

¹³Gengoka de önanga imajoboli deʼ imä tau o Arnon ma Ngairi mahonongaka, o tonaka ikokakahaka imahoheika o Amori manyawa manga daeraika. O Arnon ma ngairi gënanga marupa o batingi o Moab manyawa manga daera de o Amori manyawa manga daera.

¹⁴Mahababu gënanga ’Ma Jou Ai Parangi ma Bukuoka’ ya tulihi: ”.... O Waheb makapongo, o Sufa madaeraoka de mawai-wai, o Arnon ma Ngairi

¹⁵deʼ mawai-wai magelehoro imahoheika hiädono o Ar makapongika deʼ yödumutu o Moab manyawa manga daera ma batingika.”

¹⁶Genangoka de önanga yoiki o ngï yahö heto-hetongika o Beer, mamangarati hagala o humu. Genangoka ma Jou wïtemoka o Musaika, ”Nä huloko o kawaha imatoomu; Ngohi aha tahidöka o akere onangika.”

¹⁷O öraha gënanga o Israel manyawa ihi nyanyi o nyanyi nënanga, ”Hei, o humu-o humu, nihibuaele nia akere, ngomi aha mia tarima de o nyanyi.

¹⁸O humu yahö hai-haiti yobö balu-baluhu deʼ mia hoana de mia berera matutuda yohaiti de manga tutuda madiki-diki dede toönanga manga kuaha manonako madiki-diki.” O tonaka ikokakahaka de önanga ima tururu o Matanaika,

¹⁹deʼ genangoka de o Nahalielika daha o Bamotika,

²⁰de ipaha o Moab manyawa manga daeraika o Pisga mal̄oku matubu matimiuku yöhima-himanga o tonaka ikokakahaika.

²¹Daha o Israel manyawa ihi dingoto o huhuloko-huhuloko o Sihonika, o Amori manga koano, mangale ihiädono o behehongo nënanga,

²²”Nomi higumal̄a ngomi mia tilakuru ani berera Tuanga. Ngomi de tongomi mia aiwani o gigini aha komiö rehenua o ngekomo deʼ aha komiwohamua o dumule-dumuleika ekola o angguru madumule ekola o akere o humuoka. Ngomi aha komiö rehenua o ngekomo ma amoko hiädono ngomi mihupu de ani daeraka Tuanga.”

²³Mä ma Koano Sihon wahigumal̄aua o Israel manyawa ya tilakuru ai berera. Unanga wätoomu ai duduono de yoiki o Yahas ika o tonaka ikokakahaka deʼ yaparangi o Israel manyawa genangoka.

²⁴Mä o parangi magoronaka gënanga manga ngöe o Amori manga tentara yohonenge o Israel manyawa yätoma. Daha o Israel manyawa yogogere toönanga manga daera o Arnon ma Ngairino hiädono o Yabok ma ngairika, enagënanga o Amon manyawa manga daera mabatingi, hababu o batingi gënanga duru kahä kuata magogoana.

²⁵De hoko gënanga o Israel manyawa yaora o Amori manyawa manga kota mata-mata, ihidetongo o Hesybon deʼ mata-mata o kota maiteteke magilolitino, de önanga yogogere genangoka.

²⁶O Hesybon gënanga ma Koano Sihon ai kota ma amoko. Unanga ma moi iböto woparangi wïlawani o Moab ma koano deʼ waora ai daera magurutika hiädono o Arnon ma ngairi.

²⁷Mahababu gënanga o dola bololo yotuli-tilihi yodol̄a bololo hoko nënanga, ”Niädono o Hesybonika, ma Koano Sihon ai kotaika. Ngomi miö igo miö lega o kota nënanga ihigoko deʼ ihidiai okali.

²⁸ Mamoiuku o kotaino nënanga o Sihon manga duduono yotagi manga himangika hokä o uku. Yawö wede-wedere o Ar makota o Moab ma tonakoka, deʼ yakuaha o doporono-doporono imoteke magurutika o Arnon.

²⁹Ei o Moab manyawa, ngona nobodito! Na huba-huba o Kamos, ngona nobinaha! Ngona ani gikiri ini mal̄aika nodadi o dagi-dagino, ani ngongoheka yodadi o Amori ma koano ai dagokino.

³⁰Mä öraha nënanga toönanga manga difauku yobinaha o ngekomo magurutu o Hesybonoka de o Dibonika, o Nasyimoka de o Nofahika o Medeba madatekoka.”

³¹De hoko gënanga o Israel manyawa yögogere o Amori manyawa manga daeraoka.

³²De ipaha o Musa wähuloko hagala o nyawa yoiki yo lingiri ngekomo duru maoa-oa mangale yaparangi o Yaezer ma kota. Daha o Israel manyawa yaora o kota gënanga inoli hagala o kota maiteteke magilolitino deʼ yäduhu o Amori manyawa yo gogere dokengoka.

³³Genanga de iböto o Israel manyawa yorehene deʼ yal̄ë o ngekomo yodumutu o Basanika. Ma koano Og o Basanino wo tagi ai himangika de ai duduono mangale yaparangi o Israel manyawa o Edrei makotaka.

³⁴Ma Jou wïtemo o Musaika, ”Uha nimodongo. Ngohi aha Tonihi döaka o utumu ngonaika. Ngona aha nihohihanga ünanga hokä ni hidiaioka ma Koano Sihon wopopareta o Hesybon mabereraka.”

³⁵Done o Israel manyawa yahohihanga deʼ iwi toma ma Koano Og, ai ngoha-ngohaka deʼ yongodumu ai kawaha: koiwa naga yogogere. De ipaha önanga y ögogere o berera gënanga.