Read Tobelo O BILANGAN 22 Bible Online

O BILANGAN 22 - Tobelo bible

O BILANGAN 22

¹O Israel manyawa imajoboli deʼ imä tau o Moab matonaka irata-rataoka, o Yordan ma Ngairi madaera mahonongaka, imahi tigi-tigika o Yerikho makotaika.

²Maöraha o Moab manga koano ai romanga o Balak, o Zipor aingohaka, woihene sarakia o Israel manyawa yahidiaioka o Amori manyawa, deʼ o Israel manyawa gënanga kamanga ngöe, ünanga deʼ ai kawaha yongodumu yohaharoka.

⁴De o Moab manyawa yätemo o Midian manyawa manga tutuda-tutudaika, ”Itedekanokaua o doomu gënanga yaol̄omo hagala moi-moi nanga higilolitino hokä o hapi yaol̄omo o momo o tonaka ilua-luasoka.” De ma Koano Balak

⁵ wohidingoto o huhuloko mangale iwi ahoko o Bileam, o Beor aingohaka, wogogere o Petor makotaka imahi tigi-tigika o Efrat ma ngairika o Amau madaeraoka. Onanga wähuloko ihiädono o Bileamika Balak ai behehongo nënanga, ”Nohi öriki, naga o hoana de o berera moi manyawa o Mesir de yaino; manga nyawa ima hikabarihi kiaika honanga deʼ ima hidiaioka yaparangi tongomi mia daera.

⁶Onanga iholoi yokuata de ngomi. Hoʼ naino! Nälolai önanga mangale ngohi. Mudukua ngomi miakunu mia hohihanga önanga deʼ mia duhu önanga o bereraka nënanga. Hababu ngohi tongaku o nyawa ngona nahi barakati aha yamake o barakati deʼ o nyawa ngona nalolai aha yamake o bodito.”

⁷De o Moab deʼ o Midian manyawa manga tutuda-tutuda gënanga yoiki de yoao o Bileam ai hewa hupaya ünanga wömodeke o Israel manyawa walolai. Imahi adonika o Bileamoka, önanga ihiädono unangika ma Koano Balak ai behehongo.

⁸O Bileam wätemo onangika, ”Nimä iduohi nenangoka dau. Yarehe aha ngohi tinï hiabari okia ma Jou waheto-hetongo ngohino.” De o Moab manga tutuda-tutuda gënanga yogogere o Bileam wogogoge roka.

⁹Daha ma Jou Madutu waika o Bileamika deʼ wïleha, ”Bileam o nagona o nyawa geönanga yogogogere ani ngïoka?”

¹⁰O Bileam wohaluhu, ”Onanga ma Koano Balak ai huhuloko o Moabino mangale ihiabari

¹¹o hoana de o berera moi manyawa o Mesir de yaino imahi gerewotoka kiaika honanga. Ma Kaono Balak wahuloko ngohi talolai o nyawa geönanga mangale ünanga, hupaya ünanga wakunu waparangi deʼ wäduhu önanga.”

¹²Ma Jou Madutu wato o Bileamika, ”Uha noiki de o nyawa geönanga, deʼ uha nalolai o hoana manyawa gënanga, karana önanga Tahi barakatioka.”

¹³Yarehino mawange o Bileam wätemo o Balak ai huhuloko-huhulokika gënanga, ”Nilio, ma Jou wohihi gumal̄aua ngohi toiki dede ngini.”

¹⁴De önanga imakilioro o Balakika deʼ ihi ngahu unangika o Bileam woluku waino dede önanga.

¹⁵Daha o Balak wahidingoto iholoi yowöe ai huhuloko iholoi ikokurutil̄e manga pangkati de yohö hira-hira.

¹⁶Onanga ihi ngahu o Bileamika o Balak ai behehongo gënanga, ”Ngohi tagoungu togahoko: noböa deʼ uha noluku.

¹⁷Ngohi aha tonihi döaka ani hewa duru kahangöe, deʼ nadiai okiadika ngona naheto-hetongo. Noböa, deʼ nalolai o hoana manyawa gënanga mangale ngohi.”

¹⁸Mä o Bileam wohaluhu, ”Ngarokä mata-mata o haaka deʼ o gurasi naga ma Koano Balak ai kadato magoronaka wohifangu ngohino, ngohi takunua tatilakuru Ai pareta ma Jou, ma Jou Madutu ngohi tihuba-huba. Ngaroka o hali mai teteke magoronaka ma ngohi takunua talawani.

¹⁹Mä kayaoa de nimaidu okahi nenangoka dau, hokä o huloko yohira-hira yadiai. Ngohi toigo tohiöriki boteka kanagahi Ma Jou womau wahetongo ngohino.”

²⁰O Hutu gënanga ma Jou Madutu waino o Bileamino deʼ wïtemo, ”O nyawa geönanga yoböa mangale yogahoko ngona noiki dede önanga. Hoʼ noma hidiai la noiki. Mä nodiai duga-duga okia inihi popareta ngonaika.”

²¹Yarehino mawange o Bileam wohinoa ai gogogere ai keledaioka, daha wänïki o Moab manga tutuda-tutuda gënanga.

²²Mä maöraha o Bileam woiki, ma Jou Madutu wongamo. Magogiriaka o Bileam wöbarene ai keledai, yahinoto iwï lö leleani iwi tomoteke, ma Jou Ai malaekat imaokoino o ngekomo mahi dogoronaka la witä tatoko ünanga.

²³Yamake o malaekat ima okoino genangokadau de ma oworo ya rahukil̄e o keledai gënanga yörehene o ngekomo deʼ ima loliti o dumuleika. O Bileam wagohara o keledai gënanga deʼ wao wohi gilio o ngekomika.

²⁴De ipaha ma Jou Ai malaikat ima okoino o ngekomo madodehe hotoka, hinoto o anggur madumule de o bebeno o mehele ari hohononga mahidogorona.

²⁵Maöraha o keledai gënanga yamake ma Jou Ai malaikat, ënanga imahi ditoko o ngekomo madatekika hiädono o Bileam ai l̄ou ihi dobilatu o mehelika. O Bileam wagoharoli o keledai gënanga.

²⁶De ma Jou Ai malaikat imatagali, deʼ ima okoino o ngï iholoi itehehotoli hiädono koiwa naga o ngekomo mangale ya kaika mahigilika ekola manirakika.

²⁷Ya make ma Jou Ai malaikat, o keledai gënanga ima ruba. O Bileam wongamo deʼ wagohara o keledai gënanga de ai diki-diki.

²⁸De ma Jou wadiai o keledai gënanga yakunu itemo-temo. O aiwani gënanga o Bileamika yato, ”Okia ngohi todiai ngonaika Tuanga hiädono Tuanga nohi gohara hiädono nohigali mahange?”

²⁹O Bileam wohaluhu, ”Ngona nomahigogule ngohi! O demo ade naga de ahi diaoka, maraioka ngohi toni toma!”

³⁰O keledai gënanga ihaluhu, ”Koigoungua ngohi nënanga Tuanga ani keledai madekanoka Tuanga nohi bare-barene? Mamoi iböto ngohi tonilawani ngonaika Tuanga?” ”Kowali,” o Bileam wohaluhu.

³¹Daha ma Jou wadiai o Bileam yakunu wamake ma Jou Ai malaikat-malaikat ima okoino genangokadau de maoworo imä rahukil̄e. De ma japatioka o Bileam womahi tudukuku o tonakuku deʼ wohuba.

³²Ma Jou Ai malaikat wïleha, ”Yadodoa ho ngona nagohara ani keledai hiädono nohigali mahange? Ngohi toböa mangale toni tatatoko ngona, hababu imoteke ahi damake itorou ngona noiki.

³³Maöraha ani keledai ihimake ngohi, enanga imahiditoko o o ngekomo madatekika hiädono ihigali mahange. Nako kowali, marai ngona tonitomaka, mä ani keledai gënanga tohihalamati.”

³⁴O Bileam wohaluhu, ”Ngohi tobaradohaka. Ngohi kotohi orikua Tuanga noma okoino o ngekomo mahi dogoronaka mangale no hi tatatoko ngohi. Mä o öraha nënanga, nako imoteke ani damake Tuanga itorou ngohi tohigila-gila o dodagi nënanga, ngohi aha tolio.”

³⁵Mä ma Jou Ai malaikat yato, ”Nonïki dika de o nyawa geönanga. Ma ngona duga-duga yakunu nahetongo okia toni hulo-huloko nahetongo.” Done o Bileam wohi gila-gila ai dodagi de o Balak ai huhuloko-huhuloko gënanga.

³⁶Maöraha o Balak woihene o Bileam aha woböa, ünanga woiki wïbuhuku o Bileam o Moab ma kotaika, magogere o Arnon ma Ngairi madatekoka, o Moab madaera mabatingoka.

³⁷O Balak wato unangika, ”Yadodoa ho ngona noböaua maöraha toniähoko madodihiraka? Boteka nato ngohi takunua tofangu ani hewa?”

³⁸O Bileam wohaluhu, ”Aa, öraha nënanga ngohi toböaka. Mä ngohi koiwa ahi haku tahetongo okianaga sowaliua ma Jou Madutu wohi hulo-huloko ngohi tahetongo.”

³⁹Done o Bileam woiki de o Balak o Huzot makotaika.

⁴⁰Genangokadau o Balak wohihuba o hapi o dutu muruono naga deʼ o duba. O aiwani ma akeme gënanga o hidoku moi wihi döaka o Bileamika deʼ o tutuda-tutuda ima kokomoteke dede ünanga.

⁴¹Yarehino mawange o Balak wïao o Bileam yadöa o Bamot Baal madoporonil̄e. Genangoka o Bileam wakunu wä make o Israel manyawa o hidoku moi.