Read Tobelo O BILANGAN 23 Bible Online

O BILANGAN 23 - Tobelo bible

O BILANGAN 23

¹O Bileam wato o Balakika, ”Nohigoko o ngïoka nënanga o huhuba mangï o gahumu tumidi mangale ngohi, deʼ nasadiauku nenangoka dau o hapi manauru o dutu tumidi deʼ o duba manauru o dutu tumidi.”

²O Balak wadiai hokä o Bileam waheto-hetongo unangika. Huhuba mangï mal̄okuoka yogetongo gënanga önanga ihihuba o hapi manauru o dutu moi deʼ o duba manauru o dutu moi.

³Daha o Bileam wïtemo o Balakika, ”Noma okoil̄e ani huhuba itö tuhu-tuhuku Tuanga madatekoka. Magogiriaka gënanga ngohi toiki tïlega ma Jou boteka womau mimamake dede ngohi ekola kowali. Dahaö ngohi tohi ngahu hagala moi-moi ma Jou wahö heto-hetongo ngohino.” De o Bileam woiki woma tengo moi o doporono matubuil̄e,

⁴deʼ genangokadau ma Jou Madutu woböa unangika. O Bileam wato ma Jou Madutuika, ”Ngohi tohi gokoil̄eoka o huhuba mangï o gahumu tumidi deʼ tohihuba o hapi manauru o dutu moi deʼ o duba ma nauru o dutu moi o huhuba mangï moi-moi mal̄okuoka gënanga.”

⁵De ma Jou wohingahu o Bileamika okia kokiani wahetongo, deʼ wïhuloko ünanga womakilioro o Balakika mangale wohiädono ma Jou Ai behehongo unangika.

⁶O Bileam womakilioro deʼ wïmakeika o Balak kawoma okoinohi ai huhuba itö tuhu-tuhuku madatekoka, kamamoi de o Moab manga tutuda mata-mata.

⁷De o Bileam wohidodemo o nubuat nënanga, ”O Aramino, l̄oku mabuturungu doka o wange mahiwaroka, o Balak, o Moab ma koano ngohi wohiahoko de wato, ’Naino, mangale ngohi notemo-temo, Nalolai o Israel manyawa gënanga!ʼ

⁸Kayakunu ngohi talolai, nako ma Jou Madutu walolai ua? Kayakunu ngohi tahukumu, nako ma Jou wahukumua?

⁹Ol̄oku-l̄oku matubuoka tä make-make önanga; o doporono-doporonino katä pulono önanga. Nia make moi o hoana de o berera ima tengo-tengoka yahi detongua o hoana de o berera mahomoa madoomu.

¹⁰O Yakub aidifauku hokä o tonaka makafo hakunua häetongo; o Israel manyawa o goguleua manga ngöe. Tanu ngohi tohonenge hokä o nyawa manga hininga iriko-rikoto tanu ahi ajali hokä o nyawa geönanga manga ajali.”

¹¹De o Balak wïtemo o Bileamika, ”Okia ngona nodiai ngohino? Ngohi toniao nengino mangale nalolai ahi haturu-haturu. Mä ngona iholoi nahibarakati önanga.”

¹²O Bileam wohaluhu, ”Ngohi takunu tahetongo duga-duga okia ma Jou wohihö hulo-huloko tahetongo.”

¹³Daha o Balak wïtemo o Bileamika, ”Naino ngone hoiki homa tuono o ngï mahomoaika; genangokadau ngona yakunu namake duga-duga o hidoku moi o Israel manyawa. Nalolai önanga nenangoka dau.”

¹⁴Done o Balak wïao o Bileam o Zofim matonaka ilua-luasika, o Pisga mal̄oku matubuil̄e. Genangokadau ma ünanga wo higoko o huhuba mangï o gahumu tumidi deʼ wohihuba o hapi manauru o dutu moi deʼ o duba manauru o dutu moi o huhuba mangï moi-moi ol̄okuoka gënanga.

¹⁵O Bileam wato o Balakika, ”Nogogogere nenangoka dau, ani huhuba itö tuhu-tuhuku ahi Tuanga madatekoka, tohi jai-jai ngohi toiki mimamake de ma Jou genangokadau.”

¹⁶Ma Jou ima make de o Bileam deʼ wihingahu unangika okia kokiani wahetongo, de wïhuloko ünanga womakilioro o Balakika mangale wohiädono ma Jou Ai behehongo gënanga.

¹⁷Done o Bileam womakilioro deʼ wïmakeika o Balak kawoma okoinohi ai huhuba itö tuhu-tuhuku madatekoka, kamamoi deʼ o Moab manga tutuda-tutuda. O Balak woleha okia ma Jou waheto-hetongoka,

¹⁸de o Bileam wahetongo o nubuat nënanga, ”Hei, Balak, o Zipor aingohaka, naino, noihene okianaga tomau tahetongo.

¹⁹Ma Jou Madutu hokä o nyawaua igapanga ima toduba deʼ yöigo yoeluku. Nako ma Jou Madutu wojaji, maraioka ünanga waganapu! Nako ünanga wotemo, marai aha idadi!

²⁰Ngohi wohihuloko tohibarakati; deʼ nako ma Jou Madutu wohibarakati, takunua tatauru tohigilio.

²¹O Yakuboka koiwa hamake o dorou; o Israeloka koiwa marupa o huha. Ma Jou toönanga manga Jou Madutu, naga dede önanga. Onanga youlili: Unanga o Koano!

²²Ma Jou Madutu wä ao önanga o Mesiroka deyohupu; hokä o banteng ihuhuhuku Unanga woparangi mangale önanga.

²³Koiwa naga o matara iwil̄abo o Yakubika koiwa naga o maihi yadukuata o Israelokaika. Mangale o hoana de o berera gënanga o nyawa aha yotemo, ’Nia make ihö hera-heranga wadodiai ma Jou Madutu!ʼ

²⁴O hoana de o berera gënanga yomomiki hokä o singa mabeka, deʼ ima oko yototiail̄e hokä o singa manauru. Enanga koima idu owahi ihira demainomo yaol̄omo deʼ yaokere o honenge ma awunu yagö goli-goli.”

²⁵De o Balak wïtemo o Bileamika, ”Iböto, nako ngona noluku nalolai o Israel manyawa; mä uha hakali-kali nahi barakati önanga!”

²⁶O Bileam wohaluhu, ”Koigoungua ngohi tahetongoka ngonaika ahi Tuanga ngohi aha tadiai hagala ma Jou wohi popareta!”

²⁷O Balak wätemo, ”Nia ino ngone hoiki o ngï mahomoaika. Hohi orikikaua ma Jou Madutu woni higumal̄a ngona nalolai o Israeloka mangale ngohi o ngïoka gënanga.”

²⁸De wiao o Bileam o Peor mal̄oku matubuil̄e yohimangika o tonaka ikokakaha.

²⁹O Bileam wïtemo o Balakika, ”Nohigoko o huhuba mangï o gahumu tumidi nenangoka deʼ nasadia uku nenangoka o hapi manauru o dutu tumidi deʼ o duba manauru o dutu moi.”

³⁰O Balak wadiai hokä o Bileam wahö heto-hetongo. Unanga wohihuba o hapi manauru o dutu moi deʼ o duba manauru o dutu moi o huba mangï moi-moi mal̄okuoka gënanga.