Read Tobelo O BILANGAN 25 Bible Online

O BILANGAN 25 - Tobelo bible

O BILANGAN 25

¹Maöraha o Israel manyawa kayo gogerohi o Sitim ma Waioka, toönanga manga nau-nauru yomulaenge yohowono de o Moab mangongo heka naga genangokadau.

²O ngongoheka gënanga yahigaro önanga o huhuba marameangika mangale yahoromati toönanga manga gikiri. O Israel ma nyawaö imahimoteke yaol̄omo o huhuba gënanga deʼ yahuba o Moab manyawa manga gikiri.

³Karana o Israel manyawa yahuba o Baal o Peor mal̄okuoka, ma Jou wängamo onangika deʼ wïtemo o Musaika,

⁴”Niä tagoko mata-mata o nyawa yahibö balu-baluhu o nyawa geönanga deʼ nia toma önanga o kawaha manga himangoka hokä nia diai Tongohi Ahi pareta, hupaya Ngohi tä ngamo okaua o hoana de o berera gënanga.”

⁵De ipaha o Musa wätemo o Israeloka manga hakim-hakimika, ”Ngini moi-moi kokiani nia toma mata-mata nia hoana magoronaka o nyawa yahuba-hubaka o Baal o Peor mal̄okuoka.”

⁶Maöraha o Musa deʼ yongodumu o kawaha magogiria yododora ma Jou Ai Tau mangoranoka, önanga iwï make womatengo o Israel manyawa womiao o Midian mangoheka momatengo yowohama manga tau magoronaika.

⁷Maöraha o Penehas, o Eleazar aingohaka, ma Imam Harun ai danongo wamake o hali gënanga, ünanga womaoko deʼ wamal̄a o o doomu gënanga. Woma l̄ë o tutuduku o gahumu moi

⁸de waginïki o nauru deʼ o ngoheka gënanga manga tau ma goronakaika. O nyawa yahinoto gënanga wätuduku de ai kuama gënanga de imatogumu o bodito magogiriaka ikinïki o Isreail manga hidogoronaka gënanga.

⁹Mä o öraha gënanga yohonengoka naga yamonaoko de iata manga ribuhu monaoko deiata.

¹⁰De ma Jou wïtemo o Musaika,

¹¹”O Pinehas o Eleazar aingohaka, ma Imam Harun ai danongo, wakai goungu wöriwo Ahi horomati o Israel manyawa manga hidogoronaka, hiädono Ahi gangamo itoruhu deʼ Ngohi idadiua täbi naha o hoana de o berera gënanga.

¹²Hoʼ nahetongo o Pinehasika Ngohi todiai moi o jaji dede ünanga.

¹³Unanga deʼ aidifauku tohitatapu hokä o imam kahi ado-adonika, karana ünanga duru wakai goungu wohiriwo Ngohi, ai Jou Madutu, deʼ wadiaioka o hikadame o Israel manyawa manga baradoha.”

¹⁴O Israel manyawa iwitö toma-toma ihi kutuono de o Midian mangoheka gënanga ai romanga o Zimri o Salu aingohaka o tau madol̄a mabaluhu o Simeon ai hoanino,

¹⁵o ngoheka gënanga ami romanga o ngo Kozbi; münanga o Zur ngoi ora, o ahali moi manga baluhu o Midian mabereraka.

¹⁶Ma Jou wohidöaka o pareta nënanga o Musaika,

¹⁷”Nia lawani o Midian manyawa deʼ nia binaha önanga,

¹⁸karana o dorou önanga yatä tatoroka nginika o Peor mal̄okuoka deʼ karana o ngo Kozbi womatengo o ahali mabaluhu ngoi ora o Midian mabereraka. O ngo Kozbi gënanga o ngoheka mo hö hone-honenge imitoma maöraha o bodito idö dadadi karana okianaga idadadi o Peor mal̄okuoka.”